Maaruku 1
1
Yaahaya Namoosa ontthenkeza Tarikhi
1Omwanzo wa hapari zooshapweya za Yinsa Al-Masiihu, Mwaana wa Nluku. 2Yaatikhiwa khwa ohupiri wa napiyu Ezaaya yoori:
“Moone, kinlawa kamperekhe omaasho wawo karumeya aka,
yoori atthenkeze tarikhi yawo;
3huula enkhuwaaye n'yaara eraka:
‘Mwitthenkeze tarikhi ya Mbwana na mookolele miphiitelo zawe.’ ”
4Aapuwiye Yaahaya aari woosaaye n'yaara, khusala atafusiri monkoni wa woosa wa othupwiya khwa nswammaha wa twampi. 5Atthu ooshi a nti wa Yudeya na apale a Yeruzaleemu aari ovira ataaka na otukhuru twampi zaya na yo aari wiiya a woosiwa khwa ye mmuttho Yorotaani. 6Kuwo aari owalaazo Yaahaya zaari za ovuzi wa enkamiiya. Ye aarina nzako awe wa shapala na aari ojaka mapalaka na asali ya ntthuttu.
Yaahaya onlawela oshaahiti wa Yinsa
7Atafusiraka aari ori: “Paata ya miiyo onta otule ariina oowahi zayita miiyo, oto akinsuhi ofukula mikhoyi za jampali zawe. 8Miiyo kiniwoosani na maati, ila ye onttela owoosani na Rooho Ttakatthiifu.”
Woosiwa na ozayiniwa wa Yinsa
9Wakathi otthuupule, khuta Yinsa wa Nazareeti ya Kalileya khoosiwa ti Yaahaya mmuttho Yorotaani. 10Nasaapiru, eettaka ovuuwa mmaati, khoona pinku efukuwiye na Rooho Ttakatthiifu yeettaka omwiishukhela nkhama jiwa. 11Aphano khuta huula pinkuuni elupaka yoori: “Weeyo o Mwanaka wa wuupheta, na wookituvela channu.” 12Nasaapiru, Rooho Ttakatthiifu khunthuula khunlawana n'yaara. 13Nttumpho eekhaliyeemo siikhu arupayiini, eettaka ozayiniwa ti Epiliisi. Ye aari vakatthi wa nyama za ntthuttu, khuta malayikha oteela onrumeyela Yinsa.
Yinsa onrutela Kalileya
14Paata ya Yaahaya ofukeliwa, Yinsa khulankha khusala alawa Kalileya, alaleyaka hapari zooshapweya za Nluku, 15alupaka yoori: “Wakathi wafiya, na ofwalume wa Nluku ori kharipu; mwithupwiye na mwikhupali hapari zooshapweya.”
Othawuliwa wa Maaswihaapa
16Eettaka olawa alottaka shiini ya pahari ya Kalileya, Yinsa khuwoona attwi awiri Simawu na Antere, eeselelaka ntthavi laya mpahari, mwaasa yoori aari anamajiya. 17Ye khuwooza yoori: “Mwikilotte, kintta wuurettani wiiya anamajiya a atthu.” 18Nasaapiru yo khulikha matthavi aya khusala anlotta. 19Eettaka olawa etthiipile, Yinsa khumoona Tiyaaku, mwaana wa Zepeteewu na ttwiiye Yaahaya ari mmwaatiya alazelaka matthavi aya. 20Khuwaakhuwela, nasaapiru khunlikha papaaya mmwaatiya vamote na anakhaazi awe khusala anlotta Yinsa.
Yinsa onimwiikara sheethwani
21Yo khulawa Kafwaranaawu, paata ya ofiya saapatu, Yinsa khusala asomisa nsinakooka. 22Atthu ooshi khusala awaatuvela masomi awe, maana aari osomisa nkhama ntthu ariinaaye ofwalume na woohiiyi nkhama anamanozela a kano. 23Aphano khuta nsinakooka mphule nlume aashinttiweeyo ti sheethwani. Khusala akhuwa araka: 24“Onnitakhelani fweeyo, Yinsa wa Nazareeti? Wata yoori onitapanye? Kajuwa yoori weeyo o Ttakatthiifu wa Nluku!” 25Ila Yinsa khummaruwela araka: “Onyamale, onsaruwe mwinyi otu!” 26Aphano sheethwani khuntatha ntthu otule woohusutivo khusaruwa mmwiili mwawe eettaka onyakula. 27Atthu ooshi khwiiya ooshanka mpakha khufiyelela wuuzelana atthaaporu yoori: “Niini epi zaya? Masomi mapheya antanaaye ofwalume! Mpakha onruma masheethwani yo khunshututela!” 28Hapari epile monkoni wa ye khumwazeyela nasaapiru nti wooshi wa Kalileya.
Owahi wa Yinsa vakatthi wa masheethwani na marati
29Khulaamo nasaapiru nsinakooka, khulawa na Tiyaaku na Yaahaya owawe Simawu na Antere. 30Nkhwewe Simawu eettiye orapalela voolili, yaari onlwaaza hooma, yo khumuuza Yinsa monkoni wa nunu otule. 31Aphano ye khumwaattama, khunkhola nkhono khunlansa, nasaapiru hooma khumwiisha, nunu otule khwaaza owaarumeyela. 32Weettelaka oripa, paata ya otupweela njuwa, atthu khuwaathuula alwele ooshi na anamasheethwani khumweettisela Yinsa. 33Atthu ooshi a nsitati mphule khukusanyeya vanlako wa nyuupa ethiitile, 34ye khuwaavonisa awaatta aari ohoochiwaaye pi marati a wakhula nanna. Theenya khwiikara masheethwani awaatta. Ye khaari olikha masheethwani apale ottakhula, maana yo aari onjuwa paani Yinsa.
Yinsa onlompa puuro yawiitthaaleyavo
35Supuyeene, nalelo ohinache saana, Yinsa khulankha khusaruwa khulawa puuro yawiitthaaleya ohali aari olompaawo. 36Simawu na ashirikhaawe khulawa omweekesa. 37Nonsikana, khumuuza yoori: “Atthu ooshi antta oweekesa weeyo!” 38Yinsa khuwaajipu yoori: “Nlaweni ohali okinoko, miti naattamananiyeeyo, yoori kilawe kalaleye, maana tithiito miiyo kiteeliyeeyo.” 39Aphano ye khweettetta Kalileya yooshi eettaka otafusiri nsinakooka na eekaraka masheethwani. 40Namaaharaja mmote khumwaattama na khunkokhorela khunvekela yoori: “Amana otakha okitwahareshe!” 41Yinsa ari wawiitaala huruma, khookola nkhono awe khunsapa na khulupa yoori: “Kintakha. Wiiye wootwahareshiwa!” 42Nasaapiru maaharaja apale khwiiya omwiisha na ye khwiiya wootwahareshiwa. 43Elottelanaka Yinsa khuwaaleeza woomaruwavo, 44aphano Yinsa khumuuza yoori: “Vitthu epi ohinthatelele hatha ntthu. Ila olawe, wanvekele haakhimu yoori awoone nkhama wavona, arette twaha etile Munsa arumiyeeyo yoori wiiye oshaahiti.” 45Ila mwinyi otule khusala alawa na khwaaza olaleya vitthu epile na omwaza hapari. Mwaasa wa vitthu epile, Yinsa khuhisala awahi theenya weetta nsitati, ila khwiikhala othetekele puuro yawiitthaaleyavo. Khusala ata atthu wakhula phantte oteela okutthanana Ye.
Currently Selected:
Maaruku 1: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.