Matewuzhu 28
28
Osisimuwa wa Yinsa
1Paata ya ovirisa Saapatu, yeettelaka waaziwa siikhu ya mwanzo ya sumana, Mariyamu Mataleena na Mariyamu nkina khulawa woona khapuri.
2Aphano khupuwa esikinyaatthi khuluyeene, maana nlayikha la Mbwana leetta wiishukha pinkuuni khuta mpakha vakhapuri khususisa liwe ntthile laafukaniweeyo khwiikhalela. 3Ozerima wawe waari nkhama taari na kuwo zawe zaari zoolakala nkhama maphovu. 4Anamweekesela khusala athukumela mwaasa wa woova khumpuwa nkhama afwiiye.
5Nlayikha ntthile khuwooza aakha apale yoori: “Mwihoove, kajuwa yoori mweeyo mwinimweekesa Yinsa otule aakhomeliweeyo. 6Ye khaamo mphu, asisimuwa, nkhama etthiipo aalupiyeezo. Mwite moonevo apha aattattikheliweevo. 7Mwilawe mwawooze anakhiyoni awe yoori Yinsa asisimuwa muufwa na alokoza Kalileya. Mwinttela omoona ottuukho. Mattakhuzi aya pi atthaapa kiwuuziyeenini.” 8Aakha apale khusaruwa nkhapuri mphule na waakuva eettaka woova na arina furaha, na khusala atthira olawa owooza anakhiyoni a Yinsa. 9Nasaapiru, Yinsa khuwaapuwelela na khuwooza yoori: “Salaama!” Yo khumwaattama na khupatikha moolu awe khumwaaputu. 10Aphano Yinsa khuwooza yoori: “Mwihoove, mwilawe mwawooze attwiizaku apale eette Kalileya; anttela okoona ottuukhu.”
Hapari za anamweekesela
11Aakha apale nalelo ari ntarikhi, anajanka akina aari weekeselaaye vilalo etile khurutela ositati khuwooza mahaakhimu a tiini zooshi zaarettikhaniyeeyo. 12Wakathi mahaakhimu a tiini aakusanyeyiyeevo na attunkhulu a tiini, khuwaza shawuri. Khuwenkha anajanka nzurukhu wa waatta, 13awoozaka yoori: “Alupe yoori: ‘Aatiiye anakhiyoni awe osikhu khumwiiya fweeyo neettaka olala.’ 14Yoori amana zifiya omashiilo wa nsatoro, fweeyo nintta omweeleza na nintta owaakisani khwa wakhula nlattu.” 15Etthiipile, anajanka khupwekhera nzurukhu opule na khuretta etthiipo anozeliweeyo. Mattakhuzi aya apo khumwazeyela vakatthi wa mayaahuuti mpakha leelo eti.
Khaazi khuluyeene
16Maaswihaapa apale khumi na mmote khulawa Kalileya, omwaako okhule Yinsa awooziyeewo. 17Wakathi amoniyeevo khumwaaputu, ila akina khumwakanyera. 18Aphano Yinsa khuwaattama khuwooza yoori: “Kenkhiwa ofwalume pinkuuni na vathi. 19Nakataalikha, mwilawe mwawaarette anakhiyoni khwa khapila zooshi, mwiwoosaka khwa nzina la Paapa, la Mwaana, na Rooho Ttakatthiifu, 20mwiwaasomisaka oshututela zooshi epile kirumiyeezo. Na miiyo kinttela wiiya vamote na mweeyo mpakha mwiisho wa wakathi.”
Currently Selected:
Matewuzhu 28: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.