Maaruku 2
2
Ovonisiwa wa namarakala nti wa Kafwaranaawu
1Paata ya siikhu vattitthiiru, wakathi Yinsa aaruteliyeeyo theenya Kafwaranaawu, atthu khusiila elupiwaka yoori ye aari owawe. 2Aphano atthu awaatta khweetta ottuukhule, khwa nanna yahaariivo puuro hatha vamilako, khusala awaatafusirela nttakhuzi la Nluku. 3Khutavo atthu akina antiisiyeeyo nasupiyaani, athuuliwe pi alume wane. 4Khuhisala awahi onfiisa aphale aariivo Yinsa mwaasa wa atthu waatta. Elottelanaka khulawa khutamula phantte ya liphala la nyuupa, khuphenyisavo nrepa opule arapaleliyeevo nasupiyaani. 5Ooniyeevo amini etile aariina, Yinsa khumuuza nasupiyaani otule yoori: “Mwanaka, twampi zawo zaswaamihiwa.” 6Eekhaliye attaaphale anamanozela a kano akina na khwaaza wuupuwela: 7“Mwinyi otu onttakhula toowo mwaasa wa niini? Ontta okufuru! Anwahaaye oswaamihi twampi ti paani, woohiiyi Nluku paasi?” 8Yinsa nasaapiru khumweeleya nroho mwawe yoori zaari etthiipo epile yo aari wuupuwelaaye na khuwooza yoori: “Mwaasa aya niini mweeyo muupuwelaka vitthu epo nroho mweenu? 9Etthu yookhweya omuuza nasupiyaani titiivi, omuuza yoori: ‘Twampi zawo zaswaamihiwa’ ama ‘Olankhe othuule nrepa lawo weettette?’ 10Ila mwijuwe yoori Mwaana wa Pinaatamu onaaye owahi wa oswaamihi twampi” — khumuuza nasupiyaani — 11“Miiyo kiniwuuza: Olankhe, othuule nrepa lawo olawe owawo.” 12Wakathi otthuupule mwinyi otule khulankha ooniwaka pi atthu ooshi, khuthuula nrepa lawe khusaruwa. Yo khwiiya ooshanka na khunttitthimisa Nluku, alupaka yoori: “Khaninoone vitthu nkhama epi!”
Okhuweliwa wa Matewuzhu Leevi
13Yinsa khulawa theenya kharipu ya ntthatta. Atthu awaatta khumwaattama na khwaaza owaasomisa. 14Eettaka ovira etthiipile, khumoona Matewuzhu mwaana wa Alufeeyu eekhaliye ariphisaka lumpuru, khumuuza yoori: “Okilotte.” Ye khulankha khunlotta.
15Wakathi wa etthu yoojiwa, Yinsa eekhaliye va meeza owawe Matewuzhu. Vamote na anakhiyoni awe, na aarivo anamariphisa lumpuru awaatta na “anatwampi” maana atthu aari onlottaaye aari enkeene. 16Anamanozela a kano apale amafwarizeewu amooniyeevo ajaka na “anatwampi” na anamariphisa lumpuru, khuwoozela anakhiyoni a Yinsa yoori: “Mwaasa aya niini ye ajaka na anamariphisa lumpuru na anatwampi?” 17Yinsa noosiila, khulupa yoori: “Akumi khaninhithajiya tothoro, ila apale anlwaziwaaye. Miiyo akawaateeliye owaakhuwela anashariya, ila anatwampi.”
Yinsa onuuzeliwa monkoni wa ofuka
18Anakhiyoni a Yaahaya na mafwarizeewu eetta ofuka. Atthu akina khunteela Yinsa khusala amuuzela yoori: “Mwaasa aya niini anakhiyoni a Yaahaya na amafwarizeewu ofuka, khi awo ahifukaka?” 19Yinsa khujipu yoori: “Enretteya toovi ofuka anamalaleyiwa harusi, namaposa ari attaapho? Khinwaheya, ari vamote na yo.” 20Ila enteela ofiya siikhu mposi anteelaaye olaziwavo, siikhu zaya epo, anlawa afuke. 21Khina antthaaye yaapa pheeya kuwo yoovutta, maana yaapa etile pheeya enttela ofutthela kuwo yoovutta etepe othaala. 22Khina antthaaye viinyu pheeya nttompwiyo ya shapala ya raku, amana aretta toowo, viinyu entta ophutula ttompwiyo, waaza viinyu mpakha ttompwiyo zintta oharipweya. Ila viinyu pheeya ena ya otthiiwa nttompwiyo ya shapala pheeya.
Mbwana wa saapatu
23Saapatu moote, Yinsa eetta ovira nshini wa nshapa la tiriku. Eettaka olawa, anakhiyoni awe khwaaza ovulula phunje zaya. 24Mafwarizeewu khumuuzela Yinsa yoori: “Oniwoona, mwaasa aya niini yo arettaka etthu enkhattaziwaaye orettiwa saapatu?” 25Ye khuwaajipu yoori: “Mweeyo khamwinasome etile arettiyeeyo Daawuuda wakathi ye na ashirikha awe aathowiweeyo na aakholiweeyo ti jala? 26Wakathi wa haakhimu nwulu wa tiini Apiyataari, Daawuuda aaviriye Nnyupa ya Nluku khurafuna phaawu zoohalalishiwa enkhiweeyo Nluku na khuwenkha ashirikhaawe, aariina ruhusa ya orafuna paasi aari anamalokozela a tiini.” 27Aphano khuwooza yoori: “Saapatu yatiisiwa mwaasa wa anaatamu, khahiyo anaatamu mwaasa wa saapatu. 28Etthiipo, Mwaana wa Pinaatamu ti Mbwana hatha wa Saapatu.”
Currently Selected:
Maaruku 2: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.