Olaawo 6
6
Nnyizinku onaahiti owaataphula meezirayiilu
1Nnyizinku khumuuza Munsa yoori: “Aphano attaapha ontta woona etthu kinttelaaye onrettela Firawuuna; khwa nkhono aka wa owahi ontta owaalikha olawa, khwa nkhono aka wa owahi ontta owiikara mmuti mwawe.”
2Nluku khumuuza theenya yoori: “Miiyo ki Nnyizinku. 3Kampuweleliye Eburahiima, Esiyaakha, na Yaakhumpa nkhama Nluku wa owahi zooshi, ila akiwaalikheeni okijuwana nzina la Nnyizinku. 4Na theenya kaarettaniye wahati aka wa owenkha nti wa Kanaani, nti aari wiikhalaaye ari aletto. 5Nasaapi eti kasiila ojiliza wa meezirayiilu atthaapo amisuri awaarettiyeeyo oviitthwaana na kafikhiri wahati aka karettaniyeeyo.
6“Nakataalikha owooze meezirayiilu yoori: ‘Miiyo ki Nnyizinku na kinteela owaalazamo nkatthi wa oviitthwaana arettiweeyo pi amisuri. Kiwaataphule khaazi zoolipa epo enkhiweezo na kiniwoosuru na nkhono wookhomaala na owahi nwulweene na hukhumu. 7Kinuurettani wiiya atthu aka na miiyo kiiye Nluku enu, aphano pi mwinttelaavo ojuwa yoori miiyo ki Nnyizinku, Nluku enu kuulaziyeenini vathi wa khaazi zoolipa mwenkhiweeyo pi amisuri. 8Na kinuuthuulani kiweettaneni nti kaalaphiyeeyo omwinkha Eburahiima, Esiyaakha na Yaakhumpa; apho miiyo kiniwinkhani yoori wiiye weenu. Miiyo ki Nnyizinku.’ ”
9Munsa khuwooza etthiipo meezirayiilu, ila yo khuhitakhi onsiileza, mwaasa wa othunku na hukhumu aari woonaayo nkatthi wa oviitthwaana.
10Aphano Nnyizinku khumuuza Munsa araka: 11“Olawe wamuuze Firawuuna mfwalume wa Misuri yoori awaalikhe meezirayiilu aleemo mmuti mwawe.”
12Munsa khunjipu Nnyizinku araka: “Meezirayiilu khanikisiila, khi nannani anttelaaye okisiileza Firawuuna, khupe miiyo kihijuwaka ottakhula saana?”
13Ila Nnyizinku anrumiye Munsa na Haruni, yoori awooze meezirayiilu na Firawuuna, mfwalume wa Misuri, yoori etta orumiwa owaalazawo meezirayiilu Misuri.
Ojama wa Munsa na Haruni
14Apa pi attunkhulu a ojama wa meezirayiilu:
Aana a Ruubeni, mwaana nwulu wa Yaakhumpa aari apa: Enookhi, Phaalu, Hesherooni, na Khariimu. Opu pi waari ojama wa Ruubeni.
15Aana a Simiyooni aari apa: Yemuweeli, Yamiini, Ohaati, Yakhiini, Zowaari na Shawaali mwaana wa nunu mmote wa Kanaani. Opu pi waari ojama wa Simiyooni.
16Apa mazina a aana a Leevi khwa ovokoliwa waya: Yeerisoni, Kowaati, na Meraari. Leevi eekhaliye nyaakha miiya na talaathiini na sapa.
17Aana a Yeerisoni khwa ojama aya pi apa, Lipiini na Simeeyi.
18Aana a Kowaati pi apa: Anraawu, Izaari, Heporooni na Uziili. Kowaati eekhaliye nyaakha miiya na talaathiini na mittatthu.
19Aana a Meraari pi apa: Maali na Muushi. Ntthi laari lihimo la Leevi khwa nanna ya ovokoliwa waya.
20Anraawu khunrala Yokipeeti nlupu wa papaawe, khunvokolela Haruni na Munsa. Anraawu eekhaliye nyaakha miiya na talaathiini na sapa.
21Aana a Izaari pi apa: Koora, Nefekhe na Zikiiri.
22Aana a Uziili pi apa: Mizayeele, Elizaafwa na Sithiira.
23Haruni anraliye Elisheepa mwaana wa Aminataapi, nlupu wa Nashooni; ye khunvokolela Nataapi, Apiiwu, Elizaari na Itamaari.
24Aana a Koora pi apa: Asiiri, Elikana na Apiyasaafi. Ntthi laari lihimo la Akoora.
25Elizaari, mwaana wa Haruni, khunrala mwaana mmote wa Putiyeele, khunvokola Fineeya; apa pi attunkhulu a ojama wa Leevi khwa lihimo laya.
26Ti Haruni na Munsa atthaapo Nnyizinku awaarumiyeeyo yoori: “Mwilazewo Misuri lihimo la meezirayiilu.” 27Pi atthaapo, Munsa na Haruni, anttakhulaniyeeyo Firawuuna mfwalume wa Misuri na niiya ya owaalazawo meezirayiilu.
Nluku oninkhuwela Munsa na Haruni
28Siikhu Nnyizinku attakhulaniyeevo Munsa ari nti wa Misuri, 29Nnyizinku aamuuziye yoori: “Miiyo ki Nnyizinku. Omuuze Firawuuna mfwalume wa Misuri zooshi epile kiniwuuzaaye.” 30Munsa khunjipu Nnyizinku araka: “Miiyo akinttakhula saana. Firawuuna onttela okisiila toovi?”
Currently Selected:
Olaawo 6: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
