Olaawo 7
7
Munsa na Haruni enakatthi ya firawuuna
1Aphano Nnyizinku khumuuza Munsa yoori: “Miiyo kooretta wiiya nkhama Nluku khwa Firawuuna na ttwiiyo Haruni wiiya nkhama napiyu awo. 2Weeyo omuuze zooshi epile kuurumiyeeyo, na ttwiiyo Haruni amuuze Firawuuna awaalikhe meezirayiilu aleemo mmuti mwawe. 3Ila miiyo kinteela wuumisa rooho ya Firawuuna na kinteela wenkeza alama zaka na vitthu zaka zootikinisa nti wa Misuri. 4Ye khanteela wuusilezani, ila miiyo kinteela wookola nkhono aka khwa Misuri, na khwa khaazi khuluzeene za ophuka, kinteela owaalazawo Misuri atthu a Ezirayiilu. 5Na amisuri phi anttelaavo ojuwa yoori miiyo ki Nnyizinku, amana kookola nkhono aka khwa Misuri kiwaalazavo meezirayiilu vakatthi vaya.”
6Munsa na Haruni khuretta etthiipo Nnyizinku awaarumiyeezo. 7Munsa aarina nyaakha thamaaniini na Haruni nyaakha thamaaniini na mittatthu, wakathi aattakhulaniyeevo Firawuuna.
Pakhora ya Haruni enthatuwa khwiiya nyookha
8Nnyizinku khumuuza Munsa na Haruni yoori: 9“Amana Firawuuna awuuzani yoori: ‘Mwirette minjuza,’ omuuze Haruni yoori: ‘Athuule pakhora yawo eeselele enakatthi ya Firawuuna,’ pakhora ya eto entta othatuwa yiiye nyookha.”
10Aphano Munsa na Haruni khulawa mpakha wa Firawuuna, noofiya khuretta etthiipile Nnyizinku aawaarumiyeeyo. Haruni khuthuula pakhora etile khweeselela enakatthi ya Firawuuna na mashawuriiya awe pakhora etile khuthatuwa khwiiya nyookha. 11Aphano naye Firawuuna khuruma olawa okhuweliwa ajuwi na ashawi; na yo khuretta etthiipo khwa oshawi aya. 12Wakhula mmote wa yo khusala eesa pakhora yawe na othatuwa nyookha, ila pakhora ya Haruni khumiza pakhora epile. 13Ila Firawuuna khuumisa rooho yawe khuhitakhi onsiileza Munsa na Haruni, nkhama etthiipo Nnyizinku aalupiyeezo.
Pala yamwanzo: Taamu
14Nnyizinku khumuuza Munsa yoori: “Rooho ya Firawuuna ti ya nthiti khanteela owaalikha atthu apo olawa. 15Olawe wakutthanane Firawuuna supuyeene; ye onlawa woowa omuttho. Weemele nshini wa muuttho osala onweja, olawaka othuule pakhora yawo mmakhono etile yaathatuwiyeeyo nyookha. 16Omuuze yoori: ‘Nnyizinku, Nluku wa meezirayiilu, akiruma owuuza yoori: Owaalikhe atthu aka alawe akaaputu n'yaara, mpakha leelo khuntakha okisiileza. 17Nnyizinku alupa toono: Ethiito ti enttelaaye wuujuwisa yoori miiyo ki Nnyizinku: khwa pakhora eti kiriina mmakhono kintakha kipiye maati a muuttho Niilu athatuwe eeye taamu. 18Swi ziriiye mmuttho zinteela ofwa zooshi, osala onukhamo woohifwayivo. Aphano amisuri khanlawa ovilela anywa maati a mmuttho mphule.’ ”
19Nnyizinku khumuuza Munsa theenya yoori: “Omuuze Haruni athuule pakhora yawo ookolele nkhono maati a Misuri, a mmuttho na mpakha a mmatthatta na a mmazuuku athatuwe eeye taamu, Misuri yooshi yiitaale taamu, mpakha zoopo za thaapwa na za mawe.”
20Munsa na Haruni khuretta nkhama etthiipo Nnyizinku awaarumiyeezo. Haruni khushashula pakhora etile, khujapha maati a mmuttho Firawuuna ari attaapho na mashawuriiya awe, maati apale ooshi khuthatuwa taamu. 21Swi zooshi zaariimo mmuttho mphule khufwa khusala onukhamo woohifwayivo, amisuri khuhisala awahi onywa maati a mmuttho mwaya mphule, nti wooshi waarina taamu.
22Na yo anamajintta a Misuri khuretta etthiipo na ojuwa waya woovitheya, ila rooho ya Firawuuna nalelo khusala eri yawuuma khuhitakhi onsiileza Munsa na Haruni nkhama etthiipo Nnyizinku aalupiyeezo. 23Firawuuna khuzukuluwa khusala alawa owawe khuhijali epile zaya. 24Amisuri ooshi khulawa khuthipa nshini wa muuttho yoori apatthe maati oonywa, maana maati apale a mmuttho khaari onyweya.
25Zaaviriye siikhu sapa paata ya Nnyizinku othatusha maati apale a mmuttho.
Currently Selected:
Olaawo 7: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
