Olaawo 19
19
Nluku onttakhulana Munsa vamwaako Sinaayi
1Mweezi wa ttaatthu siikhu ethiitile, paata ya meezirayiilu olaawo Misuri, khufiya mpakha n'yaara ya mwaako Sinaayi. 2Noolaawo Refidimu, khulawa mpakha n'yaara ya Sinaayi, meezirayiilu khulawa khumaka ottuukho omaasho wa mwaako Sinaayi.
3Elottelanaka Munsa khuwela vamwaako yoori akutthanane Nluku. Nnyizinku khunkhuwela vamwaako attaaphale araka: “Olupe mattakhuzi apa wuuzaka ojama wa Yaakhumpa, atthu ooshi a meezirayiilu yoori: 4‘Mweeyo moona etthu kiwaaretteliyeeyo amisuri na nanna kiwaathamisiyeeyo nkatthi wa mapaphelo a saaka kijitiiselaka miiyo. 5Aphano, amana mwikishututela wa waamineyavo mwisiila huula yaka na khuthokorela wahati aka, mweeyo mwinttela wiiya atthu aka, ootafikhana zayita khapila kiina, maana olumwenku wooshi pi waka. 6Khwa miiyo mweeyo mwinttela wiiya ofwalume wa ohaakhimu a tiini wa khapila ttakatthiifu.’ Apo pi mattakhuzi onttelaaye owooza meezirayiilu.”
7Munsa khuruti khulawa khuwaakhuwela attunkhulu ooshi atthu a meezirayiilu na khuwooza zooshi Nnyizinku anrumiyeeyo olupa. 8Atthu ooshi khujipu wa swaafu moote yoori: “Ninretta zooshi epile Nnyizinku arumiyeezo.” Aphano Munsa khulawa khumuuza Nnyizinku mattakhuzi ajipwiyeeyo atthu apale.
9Nnyizinku khumuuza Munsa yoori: “Woone! Kinttela ojittha nkatthi wa liwiku looriipa yoori atthu awahi okisiila kittakhulanaka weeyo asala ookhupali weeyo khwa mileele.”
Aphano Munsa khumuuza Nnyizinku mattakhuzi ooziweeyo pi atthu apale. 10Nnyizinku khurutela omuuza theenya Munsa araka: “Olawe vakatthi wa atthu apo, wawaattakatthise leelo na meesho. Yo ana ya ofula kuwo zaya, 11yoori eeye oolikana siikhu ya ttaatthu, maana siikhu ya eto Nnyizinku onttela wiishukha vamwaako Sinaayi, mooshi mweeyo mwimoone. 12Otthe mwiinano nkerekhere wa mwaako na owooze atthu yoori: ‘Eeyane phoole ya ohiweli mwaako na ohisapi. Otule anttelaaye osapa mwaako, ona ya wuuliiwa. 13Ahiiyevo aninsapaaye na nkhono ila avonyiwe na mawe ama nttetthe, hatha nkhama ntthu ama nyama, ahiiye haayi.’ Ila amana nlope livuma swaafu moote apho pi anttelaavo owela.”
14Munsa khwiishukhela aphale aariivo atthu apale khuwaattakatthisa na yo khufulaza kuwo zaya. 15Khuwooza atthu apale yoori: “Mwiiye woolikana ovirisa siikhu ya ttaatthu. Ila ahiiyevo antakhaaye okutthanana muukha awe.”
16Noocha, siikhu ya ttaatthu khupuwa taari na ozerima, liwiku looriipa khufinikha mwaako na khuvumisiwa nlope channu. Atthu ooshi khuwaapattha woova aphale aarivo. 17Munsa khuwaalazavo atthu apale aphale vaya yoori akutthanane Nluku, yo khulawa khweemela waattamanana mwaako. 18Mwaako Sinaayi wooshi weetaaliye loosi, maana Nnyizinku eeshukheliye attaapho na moottho na loosi laya leetta owela nkhama loosi la vanjocho na mwaako wooshi weetta othukumela channu. 19Ovuma wa nlope weetta ovira otepaka, elottelanaka Munsa khuttakhula, huula ya Nluku khunjipu.
20Nnyizinku khwiishukhela vatulu wa mwaako Sinaayi, khunkhuwela Munsa vatulu attaaphale Munsa khuwelela khulawa. 21Nnyizinku khumuuza Munsa yoori: “Wiishukhe wawooze atthu apo yoori ahivikane mwiinano yoori amoone Nnyizinku; nooretta toowo, enkeene antta ofwa. 22Hatha anamalokozela a tiini amana amwaattamelaka Nnyizinku ana yoojittakatthisa. Amana ahijittakatthisi, Nnyizinku ontta owaatapanya.”
23Aphano Munsa khumuuza Nnyizinku yoori: “Atthu khanwahi owela vamwaako Sinaayi, maana weeyo waanilikhisiye oraka: ‘Mwirette mwiinano nshini wa mwaako na nitukhuru ottakatthifu.’ ”
24Nnyizinku khunjipu Munsa amuuzaka yoori: “Wiishukhe orutele owela theenya, operekhiwaka ti Haruni. Ila anamalokozela a tiini na atthu ahirukhe mwiinano yoori awelele apha ariivo Nnyizinku, amana aretta toowo Nnyizinku ontta owaatapanya.”
25Aphano Munsa khwiishukha khuwooza atthu apale.
Currently Selected:
Olaawo 19: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
