Olaawo 18
18
Othotola wa Yeeturu
1Aphano Yeeturu, haakhimu wa Midiyaani, nkhwewe Munsa, khusiila vitthu zooshi Nluku anretteliyeeyo Munsa vamote na atthu a Ezirayiilu khwa nanna Nnyizinku awaalaziyeewo Misuri.
2Munsa anrumiye Zipoora muukha awe wankhwewe Yeeturu, ye khumpwekherela, 3vamote na aana awe awiri. Mmote aya aari wiitthiwa Yeerisoni#18:3 Nzina la Yeerisoni lina maana a omaka., maana aalupiye yoori “Miiyo kaasafireliye nti wa malaponi”; 4nkina aari wiitthiwa Elizeeri, maana aalupiye yoori: “Nluku wa paapa ti eeyiye awuni yaka na akaawuni khwa phanka ya Firawuuna.”
5Yeeturu, nkhwewe Munsa, khutana na aana na muukha wa Munsa, okutthanana n'yaara omwaako wa Nluku okhule aamakiyeewo. 6Yeeturu khuruma wuuziwa Munsa yoori: “Miiyo, nkhwewo, kintta ota okutthanana weeyo, kintana muukhaawo na aanaawo awiri.”
7Aphano Munsa khumwaattama nkhwewe khumwiinamela khumpatikha, khusala enkhana hapari mmote na nzaawe, nawiisha khuvira nheema. 8Elottelanaka Munsa khwaaza omuuza nkhwewe vitthu zooshi Nnyizinku anretteliyeeyo Firawuuna na amisuri mwaasa wa pheta ya meezirayiilu na tafwawuthi zooshi akholiyeeyo ntarikhi na nanna Nnyizinku awaataphuliyeeyo.
9Yeeturu noosiila mattakhuzi apale ooshapweya Nnyizinku awaretteliyeeyo meezirayiilu, awaataphulaka mmakhono wa amisuri, khwiiya woofurahi. 10Yeeturu khulupa yoori: “Woottottopeliwa eeye Nnyizinku, ootaphuliyeenini mmakhono wa amisuri na mmakhono wa Firawuuna na khuwaataphula atthu awe vathi wa nkhono wa amisuri. 11Aphano kajuwa yoori Nnyizinku nwulweene zayita miluku zooshi, maana khwa vitthu epile aari ojikhutupulanaaye atapanya.” 12Aphano Yeeturu nkhwewe Munsa, khuretta twaha yoolukuziwa khwa Nluku; khuta Haruni na attunkhulu ooshi a meezirayiilu, yoori aje etthu yoojiwa na nkhwewe Munsa omaasho wa Nluku.
Akhili za Yeeturu
13Mmeesho mwaya Munsa khwiikhala yoori aphuke onyakulisana wa atthu, atthu apale khweemela ya supu mpakha makaaripi. 14Wakathi nkhwewe ooniyeevo epile aari owaarettelaaye atthu apale, khuri: “Eto onrettaayo niini? Mwaasa aya niini wiikhalaka weeyo paasi yoori ophuke, na atthu ooshi khusala oweja ettiye weemela, supu yooshi mpakha makaaripi?”
15Aphano Munsa khunjipu nkhwewe yoori: “Atthu apa anikeekesa yoori miiyo kiwooze vitthu za Nluku. 16Wakhula swaafu aniiyanaavo tafwawuthi antta okitiisela yoori kimanyamanye khwa phantte zoopiiri, na kiwaasomisaka mwentto wa kano za Nluku.”
17Nkhwewe Munsa khulupa yoori: “Eto onrettaaye khahiyo yooshapweya. 18Weeyo na atthu awo mwinttela oshokhera, maana khaazi yaya eto ti yoolipa channu; khunwahi oretta otthowe. 19Osiile shawuri zaka! Nluku ti eeye vamote na weeyo. Wiiye namalokozela wa atthu omaasho wa Nluku na othuula tafwawuthi zaya zooshi khwa Nluku. 20Owooze mwentto wa kano na owaajuwise tarikhi ya weettettela na khaazi ya okhola. 21Ila weeyo vakatthi wa atthu apo, owaathawule atthu a makhaamu ooretta etthu, oomoova Nluku, atthu a haakhi eniweephiraaye opattha fwayita ya haraamu. Owenkhe ottunkhulu wa atthu alufu wa atthu miiya wa atthu hamusiini wa atthu khumi. 22Yo anttela wiiya vakatthi wa atthu yoori asala aphuka tafwawuthi zaya. Nka ootiiselaka weeyo tafwawuthi epile zoolipa; epile zookhweya anttela waattalela ottho. Amana oretta toowo enttela wiiya yookhweya khaazi yawo, maana yo anttela waawanyana na weeyo. 23Amana weeyo oretta, na nkhama Nluku aruma, weeyo ontta owahi ovilela tafwawuthi zaya epo na atthu apa ooshi eettaka orutela onti, tafwawuthi zaya ziri zawaattaleliwa.”
24Munsa khukhupalela shawuri za nkhwewe na khuretta etthiipile ooziweezo. 25Khuwaathawula atthu amakhaamu vakatthi wa meezirayiilu ooshi khuwaaretta wiiya anamalokozela atthu aya apale; nttunkhulu wa atthu alufu, wa atthu miiya, wa atthu hamusiini, na wa atthu khumi. 26Apa khwiiya nkhama anamaphuka awakhula siikhu, atafwawuthi za atthu. Amana wiiya mwaasa woolipa aari weettiseliwaka Munsa, amana ziiya zookhweya aari ophukaka atthaapo.
27Aphano Munsa khuleezana na nkhwewe, Yeeturu khusala arutela owawe.
Currently Selected:
Olaawo 18: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
