Olaawo 13

Otwahareshiwa wa aana a mwanzo

1Nnyizinku khumuuza Munsa yoori: 2“Okithawulele aana aalume ooshi a mwanzo. Aana aalume a mwanzo a meezirayiilu pi aka, khahiyo atthu paasi na nyama zooshi za mwanzo zeelume.”

3Aphano Munsa khuwooza atthu yoori: “Mwifikhirele siikhu eti mweeyo mwiliyeewo Misuri, nti opule mwarettiweeyo oviitthwaana, maana Nnyizinku oolazaniwo okhule khwa owahi wa makhono awe. Tiito mwihije hatha etthu yootthiiwa fwaramento. 4Siikhu ethiiti ya mweezi wa Habibi mweeyo mwintta olaawo Misuri. 5Amana Nnyizinku oofisani nti wa akanaani, wa ahiiti, wa amoori, wa ahaveewu na wa ayepuzi nti opule alaphaniyeeyo amarehemu apapazetthu yoori aari oteela owinkhani, nti liniittikhaawo leethi na asali, mweeyo mwina yooretta njampo ntthi mweezi otthuupo. 6Nkatthi wa siikhu sapa mwina yooja phaawu yoohiina fwaramento siikhu yaya eti ya saapa mwitthapele njampo la Nnyizinku. 7Mwije phaawu yoohiina fwaramento nkatthi wa siikhu sapa epo, mwihithuule hatha etthu ya wiiyana fwaramento, wala mmuti mweenu wooshimo ehiiyemo.

8“Siikhu yaya etile wakhula mmote ona yoomuuza mwanawe yoori: ‘Mwaasa wa epi Nnyizinku oretteliyeenini mwilankhaka Misuri.’ 9Epi enttela wiiya nkhama alama ya mmakhono mwawo na opheleleza wa mmwishwa mwawo yoori oruma wa Nnyizinku wiiye vanlimi vawo, maana Nnyizinku oolaza Misuri khwa nkhono awe wa owahi. 10Mwishututele oruma opu khwa siikhu etthomiweeyo, mwaakha khwa mwaakha.

11“Amana Nnyizinku oofisani nti wa a Kanaani na khuwinkhani, nkhama etthiipo alaphaniyeeyo mweeyo na amarehemu apapazenu, 12mwinthawulele Nnyizinku aana ooshi amwanzo ovokoliwa aalume. Nyama za mwanzo ovokoliwa zooshi zeelume za maphanko enu pi za Nnyizinku. 13Mwiwoosuru aana a puuru ooshi a mwanzo mwipatilanaka pwittipwitthi, ila amana mwihitakhi owoosuru waya, mwivuje siiko zaya. Mwiwoosuru theenya aana enu ooshi aalume amwanzo.

14“Meesho amana aaneenu awuuzelani yoori: ‘Maana aya niini?’ Mwiwooze yoori: ‘Khwa oowahi wa nkhono awe, Nnyizinku anilazawo Misuri, nti narettiweewo oviitthwaana. 15Wakathi Firawuuna aari okhijilaaye na okatthala onilikha olaawo, Nnyizinku khuwoola aana ooshi a mwanzo Amisuri, waaza aalume mpakha aana a mwanzo a nyama. Tiito ninimwinkhaaye twaha Nnyizinku aana aalume a vitthu zooshi na niniwoosuru aaneetthu ooshi a mwanzo ovokoliwa.’

16“Eto enttela wiiya nkhama alama mmakhono mweenu na nthoonyezo wa vaajihi venu yoori Nnyizinku anilaza Misuri na owahi wa nkhono awe.”

Olawa wa meezirayiilu

17Wakathi Firawuuna awaalikhiyeevo olaawo meezirayiilu, Nluku khawaavirisiye tarikhi ya Afiliishiti, yeettiye wiiyaru tarikhi yoofupheya. Khulupa yoori: “Yo amana awoomanana, talili antta ozukuluwa arutele Misuri.” 18Etthiipile, Nluku khuwaazukulelisa atthu apale n'yaara mphule, phantte ya pahari yookhuttuwa. Meezirayiilu khulaawo Misuri ajitthenkiye yoori oomane.

19Munsa khuthuula makhonkolo a Yuusufu, mwaasa aalaphisaniye na aana a meezirayiilu wakathi aalupiyeeyo yoori: “Weekhweele Nluku onta awaakiseni mweeyo, amana mwilawaka mwithuulewo makhonkolo aka.”

20Meezirayiilu khulankha Sukooti khulawa khumaka Eetani, ohali yaaziyeewo yaara. 21Nnyizinku aari vamote na yo, nthana aari owaalokoza khwa nripu la liwiku yoori eettette saana ntarikhi; amana wiiya osikhu aari owaalokoza na nuuru ya nripu la moottho amwasikhelaka tarikhi; etthiipo pi aari owahaaye weettetta nthana na osikhu. 22Nripu la liwiku ntthile khalaari owaasusa meezirayiilu nthana, wala nripu la moottho, osikhu khalaari owaasusa.

Currently Selected:

Olaawo 13: eko

Highlight

Copy

Compare