Olaawo 12
12
Njampo la Paashikowa
1Nnyizinku khumuuza Munsa na Haruni nti wa Misuri yoori: 2“Opu ona ya wiiya mweezi wa mwanzo wa mwaakha khwa mweeyo. 3Mwiwooze atthu ooshi a Ezirayiilu, mwiraka: Siikhu ya khuumi ya mweezi otthuupu, alume ooshi ana yoovalula nshapi la pwittipwitthi leelume ya wakhula liphanko ya wakhula nyuupa. 4Ojama amana wiiya vattitthiiru ohinwahaaye orafuna nyama yooshi, ona yoowaalaleya anamwaattamanana aya apale a kharipu awaameele nyama enwahaaye owaafiyela khwa thamani ya atthu aya. 5Nyama yaya enttelaaye othawuliwa ena ya wiiya yeelume ya mwaakha mmote, yoohirakali hatha vahali. Ena ya wiiya pwittipwitthi ama puuzi. 6Mwipwehe mpakha siikhu khumi na nne ya mweezi, mpakha wakathi ajama ooshi a meezirayiilu anttelaaye otwahi, njuwa leettelaka otupweela.
7“Mwittukunttele taamu yaya vatulu na mpavu wa milako za manyupa, apale mweeyo mwirafuniyeemu nyama. 8Osikhu otthuupo mwina ya orafuna nyama yoomanikhiwa va moottho, na mathapa oowaawa na phaawu yoohiina fwaramento. 9Mwihirafune nyama piishi wala yawiipikhiwa, ila yoomanikhiwa va moottho waaza eeshwa, moolu na marupo aya. 10Mwihisalise hatha etthu efiya supu; amana esala mwilukuze. 11Mwiwale, nzako n'yuunu, jampali mmoolu na mwikholele pakhora mmakhono, mwirafune wawaakuvavo; otu paashikowa wa Nnyizinku.
12“Maana osikhu aya otthuupo kinttela ovira nti wa Misuri na kiwoole aana ooshi amwanzo aalume waaza atthu mpakha a nyama, na kiwaahukhumu a miluku ooshi a Misuri: Miiyo ki Nnyizinku! 13Taamu mwivaziyeeyo milako zenu enttela wiiya alama yoori ethoonyeze manyupa mwiniikhalaaye, amana kiwaavulalisaka amisuri, miiyo kinttela woona taamu kisala kuuvikanani wooheemeli yoori mwihiiye wootapanyiwa ti pala yaya eto.
14“Mwitthapele siikhu ethiito nkhama njampo la tiini muupuwelele yoori ti miiyo, Nnyizinku, kirettiyeeyo epo. Mweeyo na peewu yenu mwina yooretta njampo la paashikowa khwa mileele. 15Nkatthi wa siikhu sapa mwina yooja phaawu yoohiina fwaramento. Siikhu yamwanzo mwilazemo fwaramento mmanyupa mweenu, maana wakhula otule anttelaaye oja etthu ya wiiyana fwaramento, ntthu aya oto ontta wiikariwa vakatthi wa meezirayiilu. 16Siikhu yamwanzo na siikhu yasaapa ona ya wiiyavo nthukumano ttakatthiifu, ahiiyevo hatha ntthu mmote antakhaaye okhola khaazi siikhu zaya epo, woohiiyi otthenkeza etthu yoojiwa ya wakhula siikhu; mwina yooretta ethiito paasi.
17“Mwirette njampo la phaawu yoohiina fwaramento, maana siikhu yaya ethiito ti kilaziyeeyo nti wa Misuri mahimo a atthu ooshi a meezirayiilu. Mwitthapele siikhu yaya eto wiiye oruma wa mileele, waaza wa apaapa mpakha wa aana aya. 18Mwina yoorafuna phaawu yoohiina fwaramento makaaripi siikhu ya khuumi na nne ya mweezi wamwanzo mpakha makaaripi siikhu zeettettaka eshiriini na moote. 19Siikhu epi sapa ahiiyevo ntthu mmote anttelaaye wiiyana fwaramento owawe. Wakhula antakhaaye oja etthu ya wiiyana fwaramento ontta wiikariwa muujama wa meezirayiilu, hatha nkhama mmalapo ama nnyunti. 20Mwihije hatha etthu ya wiiyana fwaramento mmanyupa mweenu wooshimo, ila mwina yooja phaawu yoohiina fwaramento.”
Paashikowa wamwanzo
21Munsa khuruma okhuweliwa attunkhulu a atthu ooshi a meezirayiilu khuwooza yoori: “Mwithawule nshapi la pwittipwitthi yoori ajama ooshi a Ezirayiilu ashije pwittipwitthi ya Paashikowa. 22Mwithuule zankalala mwinaanise na taamu eriiye mpasiya mwittukunttele milako zenu vatulu na mpavu mwaya. Ahiiyevo hatha ntthu mmote antakhaaye osaruwa nnyupa mwawe mpakha ocha. 23Amana Nnyizinku aviraka mmuti mphule yoori awoole amisuri, amana oona taamu etile mwittukuntteliyeeyo nlako enu phantte na phantte na vatulu vaya, Nnyizinku onttela ovira attaapho khanlawa onlikha namatapanya ovira mmanyupa mweenu yoori awuuleeni.
24“Mwishututele oruma opu mweeyo na aana enu ooshi khwa mileele. 25Amana mwifiya nti opule Nnyizinku awahitiyeenini owinkhani, mwina yooretta njampo ntthi. 26Aaneenu amana awuuzelani yoori: ‘Njampo laya ntthi maana aya niini?’ 27Mwiwaajipu yoori: ‘Twaha ya Paashikowa wa Nnyizinku, aviriyeeyo vatulu wa manyupa a meezirayiilu nti wa Misuri, na khwiinanela manyupa eetthu wakathi aari owoolaavo amisuri.’ ” Attaaphale meezirayiilu khukokhora khumwaaputu Nnyizinku. 28Meezirayiilu khulaavo, khulawa khuretta nanna ethiitile Nnyizinku amuuziyeeyo Munsa na Haruni.
Pala ya Khuumi: Ofwa wa aana amwanzo oovokoliwa pi amisuri
29Aphano osikhu layili, Nnyizinku khuwoola aana ooshi amwanzo a Misuri, waaza mwaana wamwanzo wa Firawuuna, namarithi ofwalume awe, mpakha mwaana wamwanzo wa napherezu aari nkalapooso na theenya aana amwanzo a nyama. 30Osikhu otthuupule, Firawuuna na mashawuriiya awe ooshi na amisuri ooshi khulankha na wapuwiye olila nwulweene, maana khayaarivo nyuupa yahaafwiweemo.
Olaawo
31Osikhu otthuupule Firawuuna khuruma okhuweliwa Munsa na Haruni khuwooza yoori: “Mwileemo nasaapi mmuti mwaka, mweeyo na meezirayiilu! Mwilawe mwamwaaputu Nnyizinku enu, nkhama etthiipo mwivekiyeezo. 32Mwithuule pwittipwitthi zenu mompe zenu na puuzi zenu, nkhama mwaalupiyeezo na mwikiparikhiye theenya.”
33Amisuri aari owaakhanyarela atthu apale yoori aleemo mmuti mphule, alupaka yoori: “Amana mwihiliimo fooshi fweeyo nintta ofwa!” 34Aphano atthu apale khuthuula tiriku yookhattiwa yoohiina fwaramento, khuputaputela vakuwo khuttha mmapasiya mwaya khuvikela mmafuzi. 35Meezirayiilu khushututela oruma wa Munsa, khuwaavekela amisuri vitthu za feeta za weero na kuwo. 36Nnyizinku khuwaaretta atthu awe wooneliwa huruma pi amisuri, khwa nanna awenkhiyeevo etile avekiyeeyo; khwa etthiipo khusavula maali zooshi za amisuri.
37Meezirayiilu khulankha khusala alawa mwentto, khuvira Rameesi eettaka Sukooti. Aari alume alufu miiya sitha, ohiwaalaki aakha na aana. 38Khuntti khuluzeene zoofwarikhana za atthu akinoko aawaalottiye, na theenya maphanko mawulumawulu a nyama, mompe, pwittipwitthi na puuzi. 39Khoocha phaawu zoohiina fwaramento khwa tiriku etile aathuuliyeeyo Misuri, maana khayaarina fwaramento mwaasa wawiikariwa Misuri, khuhiwahi otthenkeza etthu yoojiwa.
40Meezirayiilu eekhaliye Misuri nyaakha miiya nne na talaathiini. 41Siikhu ethiito afisiyeevo nyaakha miiya nne na talaathiini, atthu ooshi a Nnyizinku eetta olaawo Misuri. 42Osikhu otthuupo, Nnyizinku eekeseliye olaawo waya Misuri wooshiwo. Tiito, osikhu nkhama otthuupu na yo anttela ojeekesela ojama khwa ojama khwa shitaha ya Nnyizinku.
Kano monkoni wa Paashikowa
43Nnyizinku khumuuza Munsa na Haruni yoori: “Epi kano za Paashikowa: ahiiyevo hatha mmalapo mmote anttelaaye onja. 44Mwiitthwaana wawuuzanyiwa ona yonja Paashikowa, amana eeya wookhiriya. 45Ila apale eettiye omaka na apale aateeliye okhola khaazi ahinje.
46“Mweeyo mwina yonja nnyupa nttumpho aattaliweemo, mwihithuule hatha phittula moote mwisarulelaka vaje, wala mwihipweche hatha likhonkolo la nyama mwinttelaaye orafuna. 47Atthu ooshi a Ezirayiilu ana yontthapela Paashikowa.
48“Wakhula mmalapo aniikhalaaye nttumphu antakhaaye oretta njampo ntthi la Paashikowa wa Nnyizinku, mwina yowaakhiriyisa alume ooshi a muujama mwaya; apo ana yontthapela nkhama aana a muujama. Ahiiyevo ntthu woohikhiriyi anttelaaye ontthapela. 49Kano ethiito ena ya orumeyeliwa pi anyunti na atthu akina apale aniikhalaaye vakatthi venu.”
50Meezirayiilu ooshi khuretta nkhama etthiipo Nnyizinku amuuziyeezo Munsa na Haruni. 51Siikhu ethiitile Nnyizinku khuwaalazawo meezirayiilu Misuri, khuwaatthenkeza lihimo khwa lihimo.
Currently Selected:
Olaawo 12: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
