ISAÍAS 3
3
Mandaj Diosmi, Judá llactatapash, Jerusalendapash llaquichinga
1Ricuichi, tucuita Mandaj Jatun Diosca Jerusalenmanda, Judá llactamandaca shinllichijtapash, ninan shinllitapash anchuchingami. Tucui imatalla micushpa shinlli tucunatapash, yacunayaita yalichij ufiana tucui yacutapashmi anchuchinga. 2Ali macanajuj ninan shinlli runatapash, jueztapash, Dios ima nishcata villajtapash, yachajtapash, mandaj rucutapash, 3picha chunga soldadocunata mandajtapash, alicachi tucushca runatapash, ali yuyaita cuj runatapash, imatapash juyailla ruranata yachaj runatapash, juyailla shimicunata rimaj runatapashmi anchuchinga. 4“Chai jipaca, chairalla viñai huambracunatami paicunata mandachun churasha. Huambracunami, paicunataca mandanga”. 5Shina rurajpimi gentecunaca, ladollapi causaj puracunallata caishuj chaishuj macanajunajunga. Huambracuna jatarishpami, rucucunata llaquichinga. Yanga purij runacunami, alicachi tucushcacunata llaquichinga. 6Chashna llaqui tiajpimi, paipaj taitapaj familiapura runata maijambash japishpa, cashna ninajunga: “Canga, churajunatallapash charinguimi. Ñucanchipaj mandaj tucushpa, cai jatun llaquitaca alichipai” ninajungami. 7Shina nijpimi chai runaca, chai punllapica cashna nishpa juramentunga: “Ñuca huasipica ima churajunata, ima micunatapash na charinichu. Cai llaquicunata alichingapaca, napacha japishachu. Ñucataca, gentecunata mandachunga, na churanachu cahuanguichi” ningami. 8Jerusalenga, tucuilla tucurishca, Judá llactapash urmashcami. Paicunaca, Mandaj Jatun Diosta nalicachishpa rimashpa, nalita rurashpami fiñachinajushca.
9Paicunapaj juchataca, paicunapaj ñavillatami ricuchijun. Sodoma pueblopi causashcacunashnami, tucuicuna ricujta juchata ruranajun. Imatallapash na pinganllu. ¡Aij, paicunapaj almalla, imachari tucunga! Paicunapajllatami, jatun llaquitaca ninandapacha mirachishca. 10Imatapash cashcatapacha rurajtaca, aligutapachami causangui nichi. Paica, aliguta rurashcamandaca, alitallatami japinga. 11¡Aij, Diosta na manllaj runalla! Jatun llaquimi tucunga. Paimanga, paipaj maquihuan imashna rurashcashnallatami cunga.
12Ñuca llactata llaquichijcunaca huambracunami, paicunataca huarmicunami mandanajun. Ñuca llactapi causajcunalla, cangunata pushajcunaca umachishpalla yachachishpami, panda ñanda pushanajun. 13Mandaj Diosmi, tucui gentecuna imatalla rurashcata ricuchishpa llaquichingapaj shayajun. 14Mandaj Diosca, pai agllashcacunata mandanajuj rucucunatapash, mandajcunatapash llaquichingapajmi shamunga. Cangunami, uvas chagracunata quichushpa micurcanguichi. Imagutapash na charijcunata imatalla quichushcatapash, cangunapaj huasicunapimi charinguichi. 15Tucuita Mandaj Jatun Diosmi, cashna nin: “¿Ima yashpata ñuca agllashcacunataca, chashna llaquichinguichi? ¿Imamandata imagutapash na charijcunataca, ñavipi sarunguichi?” ninmi.
Sion shuti pueblopi causaj huarmicunatapash llaquichingami
16Mandaj Diosca, cashnatapashmi nin: “Sion shuti pueblopi causanajuj huarmicunaca, jariyashpa jatun tucushpa ñavitapash alsashca, pingai illajmi purinajun. Bailarinman bailarinman purishpami, chaquipi churajushcacunatapash tsilin nichishpa rinajun” ninmi. 17Shinamandami Mandaj Jatun Diosca, Sionbi causaj huarmicunataca, ajchata tucuilla rutushpa saquinga. Paicunapaj pinganayai lluchullatapashmi ricuchinga.
18Chai punllapica, Jatun Diosca paicuna juyailla ricuringapaj, chaquipi churajushcacunata, ajchata pilluna uchilla linllicunata, uchilla lunacunataca anchuchingami. 19Hualcacunata, orejerascunata, maqui huatanacunata, 20umata quilparishca telacunata, juyaillagu ricurichun changapi huatarinacunata, ajchata chaupina ñajchacunata, mishquillagu ashnajuj jambicunahuan uchilla botellacunata, zarcillocunata, 21surtijascunata, singapi churajunacunatapashmi anchuchinga. 22Juyailla churajunacunatapash, jahualla fachalishcacunatapash, ñavita quilparina telacunatapash, aisana muchilacunatapash, 23espejocunatapash, juyailla lino churajunacunatapash, ñañulla churajunacunatapash, umata huatarina telacunatapashmi anchuchinga. 24Mishquilla ashnajuj aceitella ashnana randica, millanayaitami ashnanajunga. Chumbipaj randica, huascahuanmi huatanga. Ajchata juyailla alichirishca puringapaj randica, ajcha illaj huarmicunami tucunga. Juyailla churajunapaj randica, cañamutami chumbilichinga. Juyailla ñavipaj randica, rupashca ñavimi tucunga.
25Cangunapaj cusacunaca, espadahuanmi huañuchi tucunga. Cangunapaj shinlli runacunapash, jatun macanajuipimi huañunga. 26Pueblo pungucunapipash, ninan llaqui tiajpimi, yanata churajushca tianajunga. Jichushca cashcamandami, ninanda llaquirishpa alpapilla tiarinajunga.
Currently Selected:
ISAÍAS 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.