ISAÍAS 2
2
Tucuilla llactacunatami, Mandaj Dios mandanga
(Miq. 4:1-3)
1Judá llactapash, Jerusalenbash imalla tucunatami, Amoz shuti runapaj churi Isaiasca, muscuipishnalla ricushpa, cashna villajurca:
2Tucurimui punllacunapica, cashnami tucunga: Mandaj Diospaj huasipi shayajuj urcuca, shuj urcucunapaj umashna cangapajmi, shinllipacha shayachi tucunga. Tucui urcucunata yali jatunyachi tucushcami canga. Tucui llactacunamandami, chai urcuman calpamunajunga. 3Ashtaca gentecunami, cashna nishpa shamunajunga: “Shamuichi, Mandaj Diospaj urcuman vichai rishunchi. Jacobopaj Taita Diospaj huasiman jacuchi. Chaipimi, pai munashcashna causanaguta yachachinga. Chaita yachajushpami, paipaj ali ñangunata cati ushashun” ninajungami. Sion pueblomandami, mandashca shimicuna llujshinga. Jerusalenmandami, Mandaj Diospaj Shimica llujshinga. 4Llacta puracunapica, Diosmi aliguta ricushpa mandajunga. Ashtaca gentecunatami, jarcashpa rimanga. Chashna rurajpimi, paicunapaj espadacunataca, yapuna rejacunaman tigrachinga. Lanzacunatapash, hocescunamanmi tigrachinga. Llacta puracunapash, na ashtahuan macanajungapaj espadacunahuan llujshingachu. Macanajuita yachachinapash, na ashtahuan tiangachu.
Mandaj Diosca, paita jariyajcunataca llaquichingami
5Jacobopaj huasi ucu puracunalla, shamuichi. Mandaj Diospaj michagupimi purishunchi. 6Mandaj Dioslla, can agllashca Jacobopaj huasi ucu purataca saquishcanguipachami. Paicunaca, indi llujshimuj lado llactapi causajcuna imashna rurashcatami rurashpa causanajun. Filisteo brujocuna rurashcashnallatami ruranajun. Shuj llacta runacunahuanmi, imata rurashpa pactachingapajpash, ari ninajun. 7Paicunapaj llactaca culquilla, orolla jundami. Paicuna imata juyailla charishcacunapash, na cuentai ushanallami. Paicunapaj llactapica caballocunapash, carretacunapash na cuentai ushanalla ashtacapachami. 8Chai jahuapash paicunapaj llactapica, yanga dioscunahuan jundami. Paicunapaj maquihuan, dedohuan rurashca dioscunatami cungurinajun. 9Paicunaca, chaicunatami cungurishpa urai cumurinajun. Chai juchataca, ama cungashpa saquipaichu. 10Jatun manllana Mandaj Dios ricushpa, ninan ushaihuan punchayachijujmandaca, ñutu alpa ucucunapi satirichi. 11Jariyashca purijcunapaj ñavitaca, urai cumuchingami. Jariyashpa jatun tucushcacunatapash, pingaichichishpami urai cumuchinga. Chai punllapica, Mandaj Diosllami jatunyachi tucushca canga. 12Tucuita Mandaj Dios llaquichina punllami chayamugrin. Ñavi alsashca purijcunata, jariyashcacunata, jatun tucushcacunata llaquichina punllami chayamugrin. Chaipimi, paicunapaj ñavitaca, urai cumuchinga. 13Líbano shuti urcupi tiaj tucui cedro quirucunata, Basán llactapi tiaj tucui encina quirucunata, 14tucui jatun urcucunata, tucui jatun lomacunata, 15tucui jatun torrecunata, pipash na urmachi ushanalla tucui pircacunata, 16Tarsis pueblomanda jatun barcocunata, juyailla pintashcacunatapash tucuchina punllami chayamugrin. 17Jariyashca purijcunapaj ñavitaca, urai cumuchingami. Jariyashpa jatun tucushcacunatapash, pingaichishpami urai cumuchinga. Chai punllapica, Mandaj Diosllami jatunyachi tucushca canga. 18Yanga dioscunatapash, tucuillatapachami anchuchinga. 19Jatun manllana Mandaj Dios ricurishpa ninan ushaihuan punchayachijujmandaca, jaca utujucunapi, alpa chijtarishca ucucunapimi satirinajunga. Cai pachapi causajcunata llaquichingapaj jatarijpimi, chashna tucunga. 20Chai punllapica, runacunaca paicunallata cunguringapaj culquita, orota rurashca yanga dioscunataca, perecoteshnallacuna, murcielagocuna causaj pushtumanmi shitanajunga. 21Chashna shitashpami, jatun manllana Mandaj Dios ricurishpa punchayachijujmandaca, jaca huaicucunapi, jatun rumi utujucunapi satirinajunga. Cai pachapi causajcunata Dios llaquichingapaj shayarijpimi, chashna tucunga. 22Runacunata yariajlla causanataca saquichi. Paipaj samaica, singapillami tian. Runataca, ¿imapaj ali cajpita yarinajunguichi?
Currently Selected:
ISAÍAS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.