GÁLATAS 6
6
1Huauquicuna, panicuna, imashpapash maijambash nalita rurajta japishpaca, Diospaj Espirituhuan causajcunami, alichina canguichi. Chai nalita rurajtaca, na fiñashpami, ali shunguhuan yachachina canguichi. Ama cambash pandachi tucungapajmi, aliguta yarina cangui. 2Ima llaquihuan cajpipash, caishujmanda chaishujmanda ayudaringuichi. Shina ayudarishpami, Cristo mandashcata pactachinguichi.
3Napash imapash cashpata, ñucami ali cani nirijushpaca, paillatami pandarijun. 4Shina cajpica alitachu rurajuni, nalitachu rurajuni nishpa, cangunallata tucuicuna yaringuichi. Shina yarishpami, na shujhuan chimbapurashpa, canguna imashna causashcatalla yarishpa, cushijuna canguichi. 5Tucuicunami, paicuna imata rurashcashnallata japinajunga.
6Diospaj Shimita yachachijmanga, tucui imaguta charishcatapash, yachajujcunaca asha asha carachun ninimi.
7Na cangunallata pandarinachu canguichi. Taita Diostaca, na pipash umashpa asi ushangachu. Maijan imata tarpushpapash, chaitallatami japinga. 8Shina cajpica, maijambash paipaj munaitalla catishpa tarpunshna rurashpaca, chai munaita rurashcamandami, chingaita chingagrinata japinga. Ashtahuangarin Diospaj Espíritu munashcata tarpunshna rurashpaca, Diospaj Espiritumandami causaita causagrinata japigringa. 9Imata cashpapash aliguta ruranataca, na shaijunachu canchi. Na cungashpa aligutalla rurashpaca, japina punllacuna chayamujpimi, granota tandachinshna japinajushun. 10Shina cajpica, ima aliguta maijanman rurai ushashpapash, tucuicunaman rurashunchi. Chaitaca, crij puracunami ashtahuambachaca pactachina canchi.
Pabloca, Cristo cruzpi chacatai tucushcamandami cushijushca
11Ricupaichi, imashnami cangunaman ñuca maquihuambacha, jatun letracunahuan escribimuni. 12Paicuna alipi ricuringapaj munashpami, circuncisión nishcata ruranami canguichi nishpa, tucuicuna cangunataca mandanajun. Chaicunaca, Cristota cruzpi chacatai tucushpa huañushcata villashcamanda ama llaquichi tucungapajllami, na villanajun. 13Circuncisionda rurashcacuna cashpapash, mandashca shimicunataca, paicunallata na pactachinajunllu. Ashtahuangarin cangunapaj ñaupajpilla ali ricuringapaj munashpami, circuncisionda ruranami canguichi nishpa purinajun. 14Ashtahuangarin napacha ñucapaj munailla jariyashpami, ñucanchi Apunchi Jesucristota cruzpi chacatashcamandalla jariyajuni. Pai chacatai tucushcamandami, cai pachaca ñucapaca ña illashcashna tiajun. Ñucapash, cai pachapaca illanshnami cani. 15Cristo Jesushuan shujlla tucushcamandaca, circuncisionda rurashca cashpapash, circuncisionda na rurashca cashpapash, na imapash canllu. Ashtahuangarin pai mushujyachijpi, mushujta causanami ashtahuan ali. 16Caipi nijunshna tucui causajcunaman, casilla ali causaiguta carachunmi munani. Shinallata Taita Dios agllashca israelcunamambash, chashnallata carachunmi munani.
17Cunanmandaca, ama pipash ñucataca ashtahuan llaquichihuachun ninimi. Ñuca cuerpopi chugricuna ali tucushcapash, Apunchi Jesusmandami ricuchijun.
Dios bendiciapachun nishpami tucuchishca
18Huauquicuna, panicuna, ñucanchi Apunchi Jesucristopaj ninan juyaica, cangunapaj espirituhuan cachunmi munani. Shina cachun.
Currently Selected:
GÁLATAS 6: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.