GÁLATAS 5
5
Dios cacharichishca cajpimi, shinlli shayarina canguichi
1Ñucanchitaca, gañanshna causajujmandaca Cristomi cachcarichirca. Shina cacharichishca cashpami, shinllipacha shayarina canguichi. Cutinga na yugurinshna, gañan tucushpa causanachu canguichi.
2Uyahuaichi, Pablomi cangunataca cashna nini: Circuncisión nishcata canguna rurashpaca, Cristomandaca imagutapash na japinachu canguichi. 3Cutinmi villangapaj munani: Pipash circuncisionda rurashpaca, mandashca shimicunapi imata nijujtapash, tucuita pactachinapachami. 4Mandashca shimicunata pactachijpimi, Diosca imatapash cashcatapacha rurashcatashna chasquinga ninajushpaca, Cristomandami shicanyashcanguichi. Diospaj ninan juyaimandapashmi urmarcanguichi. 5Ñucanchica, Diospaj Espíritu ushaita carashcamanda, crishcamandami, imatapash cashcatapacha rurashcatashna chasquinataca cushijushpa shuyanajunchi. 6Cristo Jesushuan shujlla tucujpica, circuncisionda rurashcapash, chaita na rurashcapash, imapash na canllu. Ashtahuangarin crij cashpa, juyarishpa causanami ashtahuan ali.
7Cangunaca, calpanshnami ali rurashpa causarcanguichi. Na llullashpa villajuj Shimita ama cazuchunga, ¿cangunataca pita jarcarcayari? 8Na cazunata yarichunga, cangunata agllaj Diosca na carashcachu. 9Ashalla levadurami, tucuilla masanataca punguichin. 10Ñucaca, Apunchi Jesusta yariashpa causashpami, canguna shujtara na yarinataca ali yachani. Ashtahuangarin cangunata pandachishpa purij runaca, maijan cashpapash, ninandapachami llaquichi tucunga.
11Huauquicuna, ñucaca cashnami nini: Circuncisionda ruranami nishpa, cunangaman villajushpaca, na catiriashpa llaquichi tucujuimanllu. Cristota cruzpi chacatashpa huañuchishcata villajushcapash, pitapash na nitijachinshna fiñachinmanllu. 12Circuncisionda ruranami canguichi nishpa, cangunata pandachijcunaca, ¡paicunapajtara fitishpachari ali canman!
13Huauquicuna, panicuna, ama gañanshna causachunmi, cangunataca Diosca agllarca. Ñami cacharichishca canchi nishpalla, pactarallapash cangunapaj munaitalla ruranguichiman. Ashtahuangarin caishujhuan chaishujhuanmi, juyaimanda ayudarishpa causana canguichi. 14“Canllata imashnami juyaringui, shinallatami shujcunatapash juyana cangui” nijunmi. Cashnata pactachijushpaca, mandashca shimipi nijujtami, tucuita pactachijun. 15Ashtahuangarin chaishujhuan canirishpa micurishpara, pactarallapash cangunapura tucuringuichiman.
Nalita ruranata saquishpa, Diospaj Espiritupaj munaitami catina
16Cangunataca caitami nini: Diospaj Espirituhuanmi causana canguichi. Ashtahuangarin na quiquin munaicunatalla ruranachu canguichi. 17Quiquin munaicunatalla rurashpa causajcunaca, Diospaj Espíritu munajujtaca fiñanmi. Shinallata Diospaj Espíritu munajujpash, quiquin munaicunata fiñanmi. Canguna munashcatalla ama rurachunmi, nali munaicunahuan Diospaj Espirituhuan fiñanajun. 18Ashtahuangarin Diospaj Espíritu pushajpi causajujpica, mandashca shimicunaca na ashtahuan mandajunllu.
19Quiquin munaitalla rurashpa causajcunaca, shutillami: Chaicunaca, cazarashca jahuami, shujhuan causanajun. Huainayanajunmi, mapayanajunmi, ima munashcatami ruranajun. 20Yanga dioscunatami mañanajun, brujurishpami causanajun, fiñanajushpallami causanajun, fiñanajushpa rimarishpallami causanajun. Imatapash paipajlla cachunmi munanajun, imamandapash ninanda rimarishpami causanajun, caishuj chaishuj rimarishpami causanajun, chaupirichunmi fiñanajuchinajun, shicanyarishpami pandata yachachinajun. 21Shujcuna imata charijtapash, ñucapaj cashcanman yanajunmi. Huañuchinajunmi, machanajunmi, sajsaitapash na sajsashpami purinajun. Chashna nalitaca, imatapash ashtahuanmi ruranajun. Cangunaman ña villashca cashpapash, cutinmi shinllita tacurishpa yarichini: Chashna nalitalla rurashpa causajcunaca, Taita Dios mandajuj llactagupica, imagutapash na japingachu.
22Ashtahuangarin Diospaj Espirituca, cashna causanatami granota fucuchinshna ricuchijun: Juyarishpa causanata, cushijushpa causanata, casilla aliguta causanata, na ñapash fiñarishpa causanata, llaquishpa causanata, imagutapash carashpa causanata, aliguta crishpa causanatami ricuchijun. 23Na jariyashpa causanata, nali munaicunatapash mishashpa causanatami ricuchijun. Cashna causajcunataca, mandashca shimicunaca imatapash na rurai ushangachu. 24Ashtahuangarin Cristopajlla tucushcacunaca, quiquin munaicuna nalitalla yarichishcata ruranataca chacatashcashnami tucuchinajurca. 25Diospaj Espirituhuan causajushpaca, Diospaj Espirituhuanllata purishunchi. 26Na yanga jariyashpa rimanachu canchi. Caishujmanda, chaishujmanda na fiñanajunachu canchi. Imaguta charishcatapash, na caishujmanda chaishujmanda ñucapaj cashcanman yanachu canchi.
Currently Selected:
GÁLATAS 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.