2 TIMOTEO 1
1
Alillachu capangui nishcami
1Taita Dios munajpi, Jesucristo villachun cachashca Pablomi cani. Cristo Jesusmanda Diosca, causaita carashapacha nishcata villajmi cani. 2Timoteo canga, ñuca juyashca churishnami cangui. Taita Diospash, ñucanchi Apunchi Jesucristopash ninan juyaita, llaquishpa causanata, casilla ali causaiguta canman carachunmi munani.
Cristomandaca villajunguilla nishcami
3Taita Diostami pashi nijuni. Paitaca, ñaupa ñuca taitacunashnallatami, ali yuyaihuan servijuni. Tutapash, punllapash Diosta mañajushpaca, na cungashpami canmandaca mañajunilla. 4Can huacajushcata yarishpami candaca, ñavi ñavi ricushpa, ninanda cushijungapaj munani. 5Canga, na nij tucushpalla aliguta crishpa catijushcatami yarijuni. Loida shuti cambaj abuelarami punda aliguta catijurca. Eunice shuti cambaj mamapashmi, alipacha crij carca. Shinallata cambash, alipacha crij cajtami yachani.
6Chaimandami, Taita Dios carashca nina rupajunshna cambi tiajujtaca, causachinshna charina cangui. Chaitaca, ñuca maquita cambaj jahuapi churajpimi chasquircangui. 7Taita Diosca paipaj Espiritutaca, manllashpa causachunga na carashcachu. Ashtahuangarin ushaita charishpa, juyaita charishpa, nali munaicunatapash mishashpa causachunmi cararca. 8Shinamandami, ñucanchi Apunchi Jesusmandaca, na pinganayachishpa villana cangui. Shinallata paimanda ñuca villajushpa prezu tiajujpipash, na pingai tucunachu cangui. Ashtahuangarin ali villaita villajushcamandaca, Taita Dios ushaita carashcashna llaquicunataca apajuilla. 9Paimi, ñucanchitaca paipajlla causachun agllashpa quishpichirca. Ñucanchi imatapash aliguta rurashcamandaca, na quishpichircachu. Ashtahuangarin Diosca, pai munashcashna cashcamandaca quishpichirca. Shinallata cai pachatapash nara rurashpallata, Cristo Jesusmanda ñucanchita pundallata ña juyajushpami quishpichirca. 10Shina cashpami juyajushcataca cunambica, ñucanchita Quishpichij Jesucristo shamujpi ricuchimurca. Paimi, ali villaita villajushcamandaca, huañuita tucuchirca. Shinallata tucuritapash, na tucurina causaigutapashmi, michaman llujchimurca.
11Chaimandami, na israelcunaman Jesusmanda villajpash, paillata villachun cachashcapash, yachachijpash cangapaj churai tucushca cani. 12Chaimandami, chashnallata cai llaquitaca apajuni. Shina cashpapash, Jesusta ñuca crishcata yachashpami, na pinganayachini. Pai ñucaman mingashcataca, tigramuna punllacaman paipaj ushaihuan alichishpa charijujtaca yachanipachami.
13Canman ñuca yachachishca ali shimicunataca, ama cungashpa catijunguilla. Cristo Jesushuan shujlla tucushcamanda, paitaca crishpa, juyaita charishpa causangui. 14Dios alita mingashcataca, ñucanchi shungupi causajuj Diospaj jucha illaj Espiritupaj ushaihuan aliguta pactachingui.
15Asia llactamanda shamushca, Figelo shuti, Hermógenes shuti runacuna ñucatalla saquishpa, tucuilla rishcataca canllata yachanguimi. 16Onesíforo shuti huauquitaca, paipaj huasipi causajcunandi, Apunchi Jesús llaquishpa charipachunmi munani. Paillami, ñucata ricungapaj shamuriashpa cushichihuarca. Cadenahuan huatai tucushca ñuca tiajujpipash, na pinganayachircachu. 17Ashtahuangarin Roma puebloman shamushpaca, taringacamanmi mascahuarca. 18Efeso pueblopi cajpi, ñucanchita pai ninanda ayudajushcataca, canga alipachami yachangui. Shina cajpimi, Apunchi Jesús shamui punllapica, Jatun Dios paitaca llaquishpa charipachun munani.
Currently Selected:
2 TIMOTEO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.