1 TIMOTEO 6
6
1Huatashcashna causaj tucui gañangunaca, paicunapaj amocunata tucuipi imapipash alicachishpa cazuchun ninimi. Shina cazujta ricushpami, Taita Diostapash, ñucanchi imata yachachijtapash, nalicachishpa rimaitaca, pipash na ushanga. 2Crij amocunata charij gañangunaca, ama huauquillami nishpa, na cazunayanllu nichun ninimi. Ashtahuangarin amo crij cajpica, gañangunaca ashtahuan aliguta servichun ninimi. Paicuna aliguta servishcatapash chasquij, juyashca crijcuna cajpimi, shina rurachun nini. Cai ñuca imata nishcataca yachachishpa, aliguta yarichishpa rimangui ninimi.
Imaguta charishpapash, Diosta crij cashpami cushijuna
3Ñucanchi Apunchi Jesucristo juyailla shimicunata yachachishcatapash, Diosta aliguta yarichun yachachishcatapash, crishpami catinajunchi. Chaita na catishpa, pandachishpa yachachishpaca, 4jariyashpami, imatapash na yachashpa, imatapash caita chaita nirinajushpa, fiñanajunata yariashpalla causanajun. Chashna cashpami, shujcunashna tucungapaj munan. Shinallata fiñanajushpa, nali shimicunata rimashpami, shujcunatapash nalicachinajun. 5Chashnacunaca, na llullashpa villajuj shimitapash saquishpami, runacuna imatapash huaglita villashcatalla yarinajun. Chashna cashpami, fiñanajushpa rimanatalla yariashpa causanajun. Chashnacunaca, charijyangapaj munashpallami, Diosta catinchimi nij tucunajun. Chaicunahuanga, ama tandanajunguichu ninimi. 6Ashtahuangarin imaguta charishpapash, Diosta yariashpa causashpaca, ninanda charijyashcashnami causanchi. 7Cai pachapica, imagutapash na charishpami huacharinchi. Shinallata cai pachamandaca, imatapash na apai ushashunllu. 8Shina cashcamandaca micunaguta, churajunaguta charishpallata, cushijushpa causashunchi. 9Ashtahuangarin charijyangapaj munajcunaca, imatapash nalita yarichijuj nali munaicuna urmachingapaj shamujpimi, lazupishna urmashpa imatapash nalitara ruranajun. Shinamandami shinlli shungu tucushpa, ninandapacha culquita munai huaglichishpa, gentecunataca ninanda llaquichishpa, chingaita chinganaman apajun. 10Culquita juyashpa causanami, imatapash nalitalla ruranataca sapishna callarichin. Huaquingunaca, ninanda culquita munashpami, crishpa catijushcatapash saquin. Shinamandami, ninan llaquicunata apanajun.
Macanajushpa mishanshna can crishcataca, aliguta catingui nishcami
11Ashtahuangarin Taita Diospajta ruraj runa, canga shina nalicunata ruranamandaca anchuringui. Imatapash cashcatapacha rurashpa, Diosta aliguta yarishpa, crishpa catingui. Juyaihuan, na ñapash fiñarishpa, na jariyashpa causanata catingui. 12Causaita causagrinata japigrichunmi, Diosca candaca agllarca. Chaitaca yariashpami, macanajushpa mishanshna can crishcataca, aliguta catina cangui. Ñami ashtacacunapaj ñaupajpica, tucui shunguhuan crinipachami nircangui. 13Tucuicunaman causaita caraj Taita Diospaj, Jesucristopaj ñaupajpimi, cai shimicunata aliguta pactachinajuchun mandani. Jesucristoca, Poncio Pilatopaj ñaupajpica, aliguta villashpami alipi ricurirca. 14Cai ñuca mandashcataca, ñucanchi Apunchi Jesucristo tigramungacaman, imatapash nalitaca na rurashpa, na juchachi tucushpa aliguta pactachingui ninimi. 15Paica ninan cushijuihuanmi, pailla tucuita Mandaj cajta, jatun mandajcunatapash Jatun Mandaj cajta, amocunapajpash jatun Amo cajta ricuchina punllapillata ricuchimunga. 16Pailla huañuitapash na huañushpa causajujta, pipash na chayai ushanalla michapi tiajujtami ricuchimunga. Paitaca, pipash gentecunaca na ricushcachu, na ricui ushanllu. Paillami, ninanda alicachi tucushpa, causaita causaicaman tucuita mandangapaj ushaita charin. Shina cachun.
17Cai pachapi ninanda charijyashpa causajcunata, imata churashpapash ama chaillahuan jariyashpa causanajuchun yachachingui. Paicuna imata charishcacunatallapash, ama yariashpa causanajuchun yachachingui. Chaicunaca tucurinallami. Ashtahuangarin ñucanchi cushijushpa causachun, imagutapash ninanda caramujuj, causajujlla Taita Diosta yariashpa causachun yachachingui. 18Imatapash aliguta rurashpa, chai rurashcacunahuan ninanda charijyashcashna cachun yachachingui. Shujcunamambash imaguta carashpa ayudaj cachun yachachingui. 19Shina aliguta causashpaca, jipa punllacunapi charij cangapajmi alichinajun. Shina aliguta huasichingapaj callarinshna rurashpaca, causaita causanatami japinga.
Escribita tucuchijushpaca Pabloca, Timoteomanmi mingashca
20Juyashca Timoteo, canman ñuca mingashcataca aliguta pactachingui. Diosta yangapi churashpa, yanga parlocunata aligutapacha yachajunami nishpa, llullashpa yachachijcunataca, na uyanachu cangui. 21Huaquingunaca chashna yachachishpami, crishcatapash saquishpa, pandashpa causanajun. Diospaj ninan juyaica, canhuan cachunmi munani. Shina cachun.
Currently Selected:
1 TIMOTEO 6: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.