2 TIMOTEO 2
2
Jesucristopaj ali soldadoshna causangui nishcami
1Canga, ñuca huahuashnami cangui. Cristo Jesusmanda caramushca juyaihuan shinlli tucungui. 2Ñuca yachachijujtaca, ashtacacunapaj ñaupajpimi uyarcangui. Chaitaca, ali pactachijcunaman, shujcunamambash yachachi ushana crijcunaman yachachishpa mingapangui ninimi.
3Canga, Jesucristopaj alipacha soldadoshna llaquicunata apajuilla. 4Pipash soldado tucushpaca, na cai causaipajlla imatapash ruranacunahuan huatarinshna pandarinllu. Soldado cachun paita agllajta cushichingapajmi, na chashna causan. 5Shinallata calpangapaj munajpash, calpachun mandashcashna na aligutapacha calpashpaca, na coronata japi ushanllu. 6Shinallata tarpuj runapash, granota japingapaca, alpatarami punda alichinata charin. 7Ñuca nishcataca aliguta yaringui. Apunchi Jesús candaca, tucuita entendichijuchun.
8Jesucristotaca yariangui. Paica, ñaupa taita Davidpaj mirai purami. Ali villaita villajuj shimipi ñuca nijushcashnallatami paica, huañushcacunapaj chaupimanda causarirca. 9Cai ali villaita villajuimandami, huañuchij nali runashna llaquicunata apashpa prezu tiajuni. Shina cajpipash Diospaj Shimica, na prezu tiajunllu. 10Chaimandami Dios agllashca gentecunamandaca, llaquita apajuni. Paicunapash quishpirishpa juyailla causaita causagrinata charichunmi, shina llaquicunata apajuni.
11Napacha llulla shimicunaca, caicunami:
Paihuan huañushcashna cashpaca, paihuanllatami causagrishun.
12Llaquicunata apanajushpaca, paihuanmi mandagrishun.
Paitaca na rijsinichu nijpica,
paipash ñucanchitaca na rijsinichu ningami.
13Pai mandashcata ñucanchi na pactachij cajpipash,
paica imatapash aliguta pactachijunllami.
Paica, na paimandallata na ñucachu cani nishpa llullaritaca na ushanllu.
Diospajta aliguta rurashpaca, alicachi tucunguimi nishcami
14Cashna nishcataca yarichingui. Fiñanajushpa rimarijcunataca, Apunchi Jesuspaj ñaupajpi aliguta yarichishpa rimangui. Chai rimarinacunaca, imapajpash nalichu. Ashtahuangarin uyajcunataca, chingana llaquipimi churan. 15Na llullashpa villajuj shimitaca, aliguta yachachishpa pactachishpami, imata cashpapash ucha rurana cangui. Shina causashpa na pingai tucujpimi, Taita Diosca candaca alicachinga. 16Ashtahuangarin Diosta yangapi churaj, yanga parlocunataca ama uyanguichu. Chai nali parlocunaca, ashtahuan ashtahuanmi naliman pushanga. 17Chai nali parlocunaca, ismuchij ung:uishnami mirashpa catinga. Himeneo shuti, Fileto shuti runacunapashmi chashna tucushca. 18Paicunaca, na llullashpa villajuj Shimita catinata saquishpami: “Ñami cutin causarircanchi” nishpa, tauca crijcunata pandachishpa purinajun. 19Ashtahuangarin huasichi callaringapaj Taita Dios churashca mulun rumica, shinllipachami tiajun. Chaica, cashna nishpa sellashcami tiajun: “Apunchi Jesucristoca, paipaj tucushcacunataca rijsinmi” nijunmi. Shinallata: “Cristopaj shutipi mañajcunaca, nalita ruranamanda tucuicuna anchurichi” nijunmi.
20Shuj jatun huasipica orotalla, culquitalla rurashcacunaca na tianllu. Ashtahuangarin alpata, caspita rurashcacunapashmi tian. Chai rurashcacunamanda huaquinga, alicachingapajllami tian. Cutin shuj huaquingunaca, nalipajllami tian. 21Shina cajpimi, tucui cai nalicunata saquijcunaca alicachi tucungapaj, Diospajlla causanajun. Shinallata Apunchi Jesús mingashcata rurangapaj, imata cashpapash alitaca ucha ruranallacunami causanajun.
22Chairalla viñaicuna nalita ruranajujmandaca, anchurinami cangui. Ashtahuangarin shungupi ima nalitapash na yarishpa, Apunchi Jesusta mañajcunahuan tandanajushpami, imatapash cashcatapacha ruranata, alipacha crinata, juyaita charinata, casilla ali causanata catina cangui. 23Shinlli shungu cashpa, muspayachij parlocunataca, na uyanachu cangui. Chai nali parlocuna fiñanajuchijtaca yachanguimi. 24Apunchi Jesusta servishpa causajca, pihuambash na fiñanajushpami, aliguta causana. Ashtahuangarin tucuicunahuan ali cachun, yachachina munaitapash charij cachun, llaquitapash apajlla cachun ninimi. 25Villajujpi na cazujcunatapash, ali shunguhuambacha yachachij cachun. Shina yachachijpica, Taita Dios yarichijpi llaquirishpa, na llullashpa villajuj Shimita crishpa, paicunapash aliguta yachajunmambashchari. 26Shina yachajushpaca, diablo munashcata rurachun charijuj tugllamandaca llujshinmambashchari.
Currently Selected:
2 TIMOTEO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.