2 TIMOTEO 3
3
Tucurimui punllacunapi gentecuna imashna nalicuna canatami villajun
1Caicunatapash yachanami cangui: Tucurimui punllacunapica, jatun llaquicunami shamunga. 2Chai punllacunapica, paicunalla ali cangapaj munajcuna, charijyangapaj munajcuna, pitapash yalimi canchi nijcuna, jariyashpa jatun tucujcuna, Diostapash nali shimicunata rimajcunami tianga. Taitata, mamatapash na cazujcuna, na pashi nijcuna, Diostapash na manllajcunami tianga. 3Pitapash na juyajcuna, ninanda fiñarishcamanda ali tucungapaj na munajcuna, yangata juchachijcuna, ima munashcata rurajcuna, llaquitapash na llaquijcuna, ima alitapash na ricunayachijcunami tianga. 4Umachishpa japichijcuna, na shuyashpa imatapash ñapash rurangapaj munajcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga. 5Ñavi ricuipica, Diosta juyanshnallami ricuringa. Shina cashpapash, Diospaj ushaitaca na charingachu. Chashnacunamandaca anchuringui. 6Chashna puracunami, huasicunaman yaicushpa, juchatalla rurashpa llashachinshna causanajuj nali huarmicunata prezu japinshna charinajun. Chai huarmicunaca, nali munaicunatalla rurangapajmi yariashpa causanajun. 7Chai huarmicunaca, ninanda yachajunajushpapash, na llullashpa villajuj Shimitaca, napacha yachajui ushanllu. 8Imashnami Janes shuti, Jambres shuti runacunaca, Moisesta na cazurca. Shinallatami runacunaca huagli yuyaita charishpa, na llullashpa villajuj shimitaca, na cazunajun. Chashnacunaca, nalitalla yarij cashpami, critapash napacha ushanga. 9Ashtahuangarin paicunaca, na unaicaman pandachishpa causangachu. Paicuna juizu illajcuna cajtaca, tucuicunami yachanga. Shinallatami, Moisesta na cazujcunapash tucushca.
10Ashtahuangarin canga, ñuca yachachijujtami catishcangui. Aliguta causanata yarishpa, crishpa causanata, ali shungupacha canata, juyashpa, na fiñarishpa causanatami catijungui. 11Antioquía, Iconio, Listra shuti pueblocunapica, ñucata fiñashpa ninanda llaquichijpimi, llaquicunata apajurcani. Chai tucui llaquicunamandaca, Apunchi Jesusmi cacharichihuarca. Chashna llaquicunatallatami, cambash apajushcangui. 12Shinallatami Cristo Jesushuan shujlla tucushpa, paita yariashpa causangapaj munajcunaca, tucuicuna llaquita apanga. 13Ashtahuangarin nalitalla rurashpa, shujcunata pandachijcunaca ashtahuan ashtahuanmi naliman tigranga. Shujcunatapash pandachishpami, paicunallatapash pandarinajunga.
14Ashtahuangarin can crishpa yachajushcataca, aliguta catijunguilla. Canga maijan yachachishcatapash, ali yachashpami chashna catijungui. 15Dios escribichishca jucha illaj Shimicunataca, huahuamandapachami yachajushcangui. Chai shimicunami, Cristo Jesusta crishcamanda quishpichingapaj, canda alipacha yachajta rurangapaj ushaita charin. 16Dios escribichishca tucui Shimicunaca, paillata yarichishpa escribishcami. Chai Shimicunaca yachachingapaj, nalicuna ali purichun rimangapaj, shinallata imatapash cashcatapacha rurashpa causanatapash yachachingapajmi ali. 17Chaita yachajushpaca, Taita Diospajta ruraj runaca, ima pandatapash na rurashpa, tucui imata cashpapash aliguta rurangapajmi, aligutapacha alichirishcalla canga.
Currently Selected:
2 TIMOTEO 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.