1 PEDRO 1
1
Alillachu capanguichi nishcami
1Jesucristo villachun cachashca Pedromi cani. Llactamanda llujchishpa cachai tucushpa, caita chaita rishpa Ponto, Galacia, Capadocia, Asia, Bitinia shuti llactacunapi causanajuj crijcunamanmi, caitaca escribini. 2Cangunaca, Taita Dios munashcashna, pundamandapacha agllai tucushcacunami canguichi. Diosta cazushpa, Jesucristopaj yahuarhuan maillashca cachunmi, paipaj Espirituhuan jucha illaj causanata carashpa agllashca. Diospaj ninan juyaitapash, casilla ali causaigutapash, cangunapi ashtahuan mirachijuchunmi munani.
Causaita causagrinata shuyanatami yachachijun
3Ñucanchi Apunchi Jesucristopaj Taita Diosca, aligumari cangui ni tucushca cachun. Paica, huañushcacunapaj chaupimanda Jesucristota causachishpami, ñucanchitaca pai ninanda llaquijunshnallata, causaita causagrinata shuyachun, mushujta huacharishpa causanajuchun rurarca. 4Cangunaman carangapaj jahua pachapi alichishca tiajujta japigrichunmi, chashna rurarca. Chai caranaca, na ismunalla na mapayanalla na tucurinallachu. 5Taita Diosca, paita crishcamandami, paipaj ushaihuan cangunataca alichishpa charijun. Pai quishpichishcata alichishpa charijushcataca, tucurimui punllapi ricuchishpa carajpimi, japinguichi.
6Chaita yarishpami, cunambi ashacamanlla ima llaquicunata apanapacha cajpipash, shuj shuj llaquicunata apashpa, ninanda cushijunajunguichi. 7Canguna crishcapash ashtahuan ali orotapash yali juyaillagu cajpimi, chashna cushijunguichi. Chai orotaca, tucurinalla cajpipash ninapi rupachishpami, ali oro cajta ricun. Jesucristo shamushpami, chashna crishpa causanajujta japij shamushpami, alicachishpa, cushijushpa, ninanda alicachinga.
8Jesucristotaca, na ricushca cashpapash, ninandami juyanguichi. Cunambi na ricushpapash, paita crishpa juyailla na villai ushanalla, jatun cushijuita charishpami cushijushpa causanajunguichi. 9Jesusta crishcamanda, cangunapaj alma quishpirinata charishpami cushijunajunguichi.
10Dios ima nishcata villajcunaca, imashna Dios cangunata ninanda juyashpa quishpichinata yachangapajmi, aliguta tapunajushca. Shina yachashpami, cai quishpirinamandaca paicunallata villanajushca. 11Paicunapaj shungupi causajuj Cristopaj Espíritu chashna yarichijujtaca, maijan runapi, ima punllacunapi chashna tucunata aligutapacha ricushpa yachashpami villanajushca. Chai Espiritumi, Cristo ninan llaquicunata apanata, chai jipa ninanda alicachi tucunataca, chai punllacuna nara pactajpillata villanajushca. 12Diosca, chai villajcunamanmi paicuna villanajushca shimicunaca, na paicunapaj cashpa, ashtahuangarin ñucanchiman aliguta alichijushcata ricuchishca. Chaitaca, jahua pachamanda cachamushca Diospaj jucha illaj Espíritu yarichijpimi, quishpirinamanda villajcunaca cunan punllacunapi cangunaman villanajun. Chaitaca, angelcunapash ninandami ricungapaj munan.
Jucha illaj causachunmi, Taita Diosca cayajun
13Shina cajpimi cinturasta chumbilirinshna, ali yuyaihuambacha causana canguichi. Imata rurashpapash, aligutapacha rurashpa causaichi. Jesucristo tigramujpi cangunata ninanda juyashpa caranataca, tucui shunguhuan yariashpa shuyaichi. 14Ali cazuj huahuacuna cashcamandami, Diosta nara rijsimanda, imatapash nalita munashpa punda rurashcashnaca, na ashtahuan rurana canguichi. 15Ashtahuangarin cangunata agllaj Diosca, jucha illajmi. Shina cajpimi, cangunapash tucui causaipi jucha illaj causana canguichi. 16Escribishcapica cashnami nijun: “Ñucaca, jucha illajmi cani. Shinamandami cangunapash, jucha illaj causana canguichi” nijunmi.
17Diostaca: “Taitami cangui” nishpa mañajushpapash, cai pachapi llactan llactan purishpa causanajushpaca, ima horapash paitallami manllana canguichi. Paica, na shujtalla agllashpaca, imatapash rurashcata ricujunllu. Ashtahuangarin tucuicunatami, imata rurashpa causashcatapash ricujun. 18Yanga, nali causaimanda quishpichi tucushcataca yachanguichimi. Chai causaitaca, cangunapaj taitacunamandami chasquircanguichi. Tucurinalla orohuan, culquihuanga na quishpichi tucushcachu canguichi. 19Ashtahuangarin Cristopaj juyailla yahuarguhuanmi, cangunataca quishpichirca. Paica na mapayashca, imapash na tucushca llamagushnami carca. 20Paitaca, Diosca cai pachata nara rurashpallatami, huañuchun churashca carca. Shina cajpipash cunan cai tucurimui huatacunapimi, cangunata juyaimanda Cristoca shamurca. 21Paimandami, Taita Diostaca cringuichi. Canguna Taita Diosta crishpa paita yariashpa, cushijuihuan shuyashpa causachunmi Cristotaca, huañushcacunapaj chaupimanda causachirca. Shina causachishpami, punchapambagu causanata paiman curca.
22Diospaj Espíritu yarichijujpimi, na llullashpa villajuj Shimita cazushpa, cangunapaj almatapash ña mapa illajta rurashcanguichi. Chashna rurashpami, na nij tucushpalla, crij purapash huauqui purashna juyarishpa causanajunguichi. Shinamandami cunanga, ima nalitapash na yarishpa, tucui shunguhuambacha caishuj chaishuj juyarishpa causanajunguichi. 23Cangunaca, huañunalla taitamandaca na cutin huacharishcachu canguichi. Ashtahuangarin causaita causaicaman na tucurishpa, causajujlla Taita Diospaj Shimimandami cutin huacharishcanguichi. 24Chai Shimipica, cashnami nijun:
“Tucui gentecunami jihuashna.
Paicuna juyaillagu cashcapash, jihua sisashnallami.
Jihua chaquijpica, sisapash urmanllami.
25Ashtahuangarin Jatun Diospaj Shimica,
causaita causaicaman tiajunllami” nijunmi.
Cai shimicunatami, ali villaita cangunaman villanajushpaca villashca.
Currently Selected:
1 PEDRO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.