SANTIAGO 5
5
Charij runacuna ninanda llaquichishpa charishcatami villajun
1¡Ninan charijcuna, cunanga uyahuaichiyari! Jatun llaquicuna cangunata japij shamunamandaca, caparishpa huacaichiyari. 2Canguna ninanda charishcacunapash, ñamari ismushca. Cangunapaj churajunatapash, polilla jurucuna micushcamari. 3Canguna orota, culquita charishcapash, ñamari jirrumbrashca. Chai jirrumbrashcami, canguna nali cajtaca ricuchimunga. Chaillatami, cangunapaj cuerpotapash, ninashna rupachishpa tucuchinga. Cai tucurimui punllacunapi ninanda charingapajmi, imapash ninan valishcacunata tandachishcanguichi. 4Uyahuaichi, cangunapaj chagracunata tandachijcunaca, canguna umashpa, na culquita cushcamandami caparinajun. Shinamandami, cangunapaj granota tandachijcuna caparinajujca, tucuita mandaj Jatun Diospaj rinriman uyarishca. 5Cai pachapica, imamandapash na jarcarishpa, nalita ruranapi cushijushpami causanajunguichi. Huañuchina punllapishnami, cangunapaj shungupi racuyashcanguichi. 6Imatapash cashcatapacha rurajtami, huañuchi tucunapachami ninajunguichi. Paitaca, huañunapachami cangui nijpipash na mitsarijpimi, cangunaca huañuchircanguichi.
Na ñapash fiñarijcuna, Diosta mañajcuna caichi
7Chashnamandami huauquicuna, panicuna, Apunchi Jesús shamungacaman, na ñapash fiñarishpa shuyana canguichi. Tarpuj runata ricushpa yaringuichi: Paica, juyailla granoguta japingapaca, punda tamia, jipa tamia shamushpa fucuchingacamanmi, na ñapash fiñarishpa shuyajunlla. 8Shinallatami cangunapash na ñapash fiñarishpa, cangunapaj shungutapash shinllichishpa causana canguichi. Apunchi Jesús tigramuna punllapash, ñami chayamujun. 9Huauquicuna, panicuna, cangunata Dios ama llaquichijuchunmi, shujmanda shujmanda na fiñanajushpa, imatapash na nirinajuna canguichi. Uyaichi, juezca pungu ñaupajpimi shayajun. 10Ñuca juyashca huauquicuna, panicuna, Jatun Diospaj shutipi, pai ima nishcata villajcunaca llaquichi tucushpapash, na ñapash fiñarishpami causanajushca. Paicunashnallatami, cangunapash causana canguichi. 11Ricuichi, llaquita apajcunaca, ninanda cushijushcatami yachanchi. Job shuti runaguca, na ñapash fiñarishpa causashcataca uyashcanguichimi. Chai jipaca, paiman Jatun Dios carashcatapashmi yachanguichi. Jatun Diosca ninanda llaquishpa, juyaj cajtami ricuchijun.
12Ñuca juyashca huauquicuna, panicuna, tucuimanda yalica imamandapash na: “Jahua pacha, cai pacha” nishpa juramentunachu canguichi. Ashtahuangarin cangunata Dios ama ninanda llaquichijuchunmi, imatapash: “Ari” nina cajpica, “Ari” nina canguichi. Shinallata: “Na” nina cajpica: “Na” ninami canguichi.
13¿Maijambash canguna purapi llaquilla causajuj tianllu? Diosta mañaichi. Maijambash cushijuihuan causajushpaca, cushijushpa candachun. 14Canguna purapi maijambash huañujuj tiajpica, tandanajuj crijcunata mandaj rucucunata cayachun. Paicunami, chai huañujujmandaca, Apunchi Jesuspaj shutipi aceiteta talishpa, Diosta mañanga. 15Alipacha crishpa mañajpimi Apunchi Jesusca, chai huañujujta alichishpa jatarichinga. Ima juchata rurashcatapash, Diosca anchuchingami. 16Dios alichijuchunmi, imatapash pandata nishpa llaquichishcatapash, shujmanda shujmanda villarina canguichi. Shinallata caishujmanda chaishujmandami, Diosta mañana canguichi. Imatapash cashcatapacha ruraj runa mañajpica, pactachingapachami. 17Eliaspash, munaicunata charij ñucanchishnallata runami cashca. Shina cashpapash ama tamiachun, Diosta ninandapacha mañajpica, quimsa huata chaupicamanmi cai pachamanga na tamiamushca. 18Tamiachimupai nishpa mañajpica, Diosca cutinmi tamiachishca. Shina tamiajpimi, alpapica cutin imagupash fucushca.
19Huauquicuna, panicuna, na llullashpa villajuj Shimita cungashpa, maijambash canguna purapi pandashpa causaj tiajpica, Diospajman tigrarichun aliguta villanguichi. 20Shina villajpimi, pandashpa causaj juchata rurajpaj almagutaca, huañugrinamanda quishpichinguichi. Shinallata chai tucui juchacunatapashmi anchuchinga. Chaitaca yachanguichimi.
Currently Selected:
SANTIAGO 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.