1 PEDRO 2
2
1Shinamandami tucui nalita ruranatapash, pitapash umachinatapash, mishqui shimi jayaj shungu canatapash, shujcuna charishcata ñucapaj cashcanman yashpa munanatapash, pitapash nalicachishpa parlanatapash, tucuita saquina canguichi. 2Chairalla huacharishca huahuacuna lechetalla munanshna causaichiyari. Diospajtalla yachajunataca, na chapushca lechetalla munanshna caichiyari. Shina causashpami, quishpirinata japingapaj viñanajunguichi. 3Apunchi Jesús juyajujta chasquishca cashpaca, chashnami causanguichi.
Cristoca, causaita caraj rumigushnami
4Causaita caraj rumishna cajpimi, Jesustaca catina canguichi. Runacuna napacha ricunayachishpa shitashca cajpipash, Taita Diospaca agllashca, juyailla rumigushnami. 5Cangunapash causaj rumicunashna cashcamandaca, cangunapaj shungupash Diospaj Espíritu causajuj huasishna cashpa, Diospajlla curacuna caichi. Cangunapaj causaitaca, animalta Diosman cushpa huañuchinshna cashpami, chashna cana canguichi. Shina cajpimi Taita Diosca, Jesucristomanda cangunataca chasquinga. 6Chaimandami, Dios escribichishca Shimipipash cashna nijun:
“Ricuichi, agllashca juyailla rumitami,
Sion shuti pueblopi huasichi callaringapaj pirca tigranapi churani.
Pipash paita crishpaca, na pingaichi tucungachu” nijunmi.
7Cristota crishpa causajcunapaca, paica juyaillagumari. Ashtahuangarin paita na crijcunapaca, Dios escribichishca Shimipi nishcashnami pactajun:
“Huasichijcuna na munashpa shitashca rumillatami, pirca
tigranapi churana ashtahuan jatun rumi tucushca” nijunmi.
8Shinallata:
“Chai rumillatami, nitijachij rumipash,
urmachij jatun rumipash tucushca” nijunmi.
Na cazujcuna cashpami, Diospaj Shimihuanllata nitijanshna pandanajun. Paicunataca, Diosllatami chashna tucuchun saquishca.
Taita Dios agllashca huahuacunami canguichi
9Ashtahuangarin cangunaca, Dios agllashca miraicuna, jatun Mandajpaj curacuna, jucha illaj llacta cachun, Taita Dios randishcacunami canguichi. Taita Dios juyailla rurashcacunata villachun alicachishpa agllashcacunami canguichi. Paillatami cangunataca, yanapi causanajushcamanda paipaj juyailla michaman llujshichun cayarca. 10Cangunaca pundaca, na Diospaj huahuacunachu carcanguichi. Ashtahuangarin cunanga, Taita Diospaj huahuacunamari canguichi. Pundaca, Diospash na llaquijpimi causarcanguichi. Ashtahuangarin cunanga, Dios ninanda llaquijpimi causanguichi.
Taita Diosta servishpa causanguichi
11Juyashca crijcuna, cangunataca shuj llactamanda shamushpa causajcunatashna, na rijsishca llactapi purijcunatashnami, cashna mañapani: Cangunapaj almahuan, nali munaicunahuan macanajunajujmandaca, chai munaicunamanda anchurichunmi mañapani. 12Na israelcunapaj chaupipipash, aliguta causapanguichi. Huañuchij runatashna nalicachishpa rimanajujcunapash, Taita Dios shamui punllapica, canguna rurashcacunaca ali cashcata yachashpa, Diostaca punchapambagumi cangui ninajuchunmi, chashna causana canguichi.
13Apunchi Jesusta cazujcuna cashpami, cai pachapi churashca mandajcunataca, jatun mandajta cashpa, alicachi tucushcacunata cashpapash, tucuicunata cazuna canguichi. 14Llactata mandajta cashpapash, paicuna cachamushca runacunata cashpapash cazunguichilla. Paicunatami, nalita rurajcunataca llaquinajuchun, ashtahuangarin alita rurajcunataca alicachinajuchun cachamun. 15Taita Diosca, cashna rurachunmi munan: Na entendij, juizu illaj runacunataca, canguna imatapash aliguta rurashcahuan upallayachijuchunmi munan.
16Cangunaca, huatashcashna causanajujmandami cacharichi tucushcanguichi. Ña cacharishcami cani nishpalla, cutin imatapash nalita rurajcunashnaca, na canachu canguichi. Ashtahuangarin Taita Diosta servijcunami cana canguichi. 17Tucuicunatami alicachina canguichi. Crij purapash, juyarinami canguichi. Taita Diosta manllanami canguichi, jatun mandajtapash alicachinami canguichi.
18Servijcunaca, amo imata mandajpipash, alicachishpa cazunguichi. Na aliguta entendij amo cajpilla cazunachu canguichi. Ashtahuangarin millai cajpipash, amotaca cazunguichi. 19Taita Diospaj ñaupajpi ali yuyaihuan causajujpipash, yangamanda ninanda llaquichi tucushpa, chai llaquicunata apashpa causajllami, Dios alicachishpa chasquijpi causajun. 20Juchata rurashcamanda huactai tucushpa, llaquita apashpaca, ¿ima alicachi tucuita canga? Ashtahuangarin aliguta rurashcamanda ninanda llaquichi tucushpa, chai llaquita apashpa causashpallami, Taita Dios alicachishpa chasquijpi causan. 21Cangunaca, chaipajllatami cayai tucurcanguichi. Cristopash chashnallatami, ñucanchimanda llaquita apashpa huañurca. Ñucanchipash paishnalla llaquita apashpa paita catichunmi, chashna huañurca. 22Cristoca, ima juchatapash na rurarcachu. Paipaj shimihuanga, umachinatapash na yacharcachu. 23Ima llaquipash japishpaca alimi canman nijpipash, paica chashnallataca na tigrachircachu. Llaquichi tucujushpapash, paica ñucapash llaquichishami nishpaca na tigrachircachu. Ashtahuangarin imatapash cashcatapacha ruraj Diosmanmi, tucuita mingarca. 24Cristomi, ñucanchipaj juchacunataca paipaj cuerpopi apashpa, caspipi chacatai tucurca. Ñucanchi ima juchata rurangapajpash ña huañushcashna cashpa, imatapash cashcatapacha rurashpa causachunmi, chashna huañurca. Paita chugrichishcamandami, alichi tucurcanguichi. 25Cangunaca, chingashca llamacunashnami carcanguichi. Ashtahuangarin cunanga cangunata Michij, cangunapaj almatapash alichishpa Charijujpajmanmi tigrashcanguichi.
Currently Selected:
1 PEDRO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.