1 TIMOTEO 5
5
Crijpura aligutami causana
1Ruculla taitacunataca, ama yapata rimanguichu. Ashtahuangarin cambaj taitatashna, aliguta yarichishpa rimangui. Chairalla huambracunataca, cambaj huauquitashna, 2paya mamagucunatapash, cambaj mamatashna, chairalla cuitsacunatapash nalitaca ama yarishpa, cambaj panitashna aliguta yarichishpa rimangui.
3Sapalla mamagucunatapash, pailla causajujpica alicachipangui. 4Ashtahuangarin huaquin sapalla mamaguca, huahuacunata, nietocunata charinmi. Chai huahuacunara llaquishpa caranata, punda yachajuchun ninimi. Paicunapaj taita mamata, pashi nishpa chashna carachun. Shina caranaca alipachami. Shina carachunmi, Taita Diospash munan. 5Sapalla causajuj mamaguca, paigulla cashpami tutapash, punllapash Taita Diosta mañanataca na cungashpa, yariajlla causajun. 6Ashtahuangarin huaquin sapalla huarmicunaca, paicuna munashcata rurashpami, cushijushpa purin. Chaicunaca causashpapash, ña huañushcashnami. 7Paicuna ama juchachi tucushpa causachunga, cai shimicunata yachachishpa mandangui. 8Maijan cashpapash, pai purapillata imagutapash na carashpa, paipaj huasipipacha causajcunamambash na carashpaca, crij cashcata saquishcatami ricuchinajun. Chaicunaca, na crijcunatapash ashtahuan yali nalicunami. 9Sapalla huarmicunapaj shutitaca, sucta chunga yali huatata charijpajtallami churana cangui. Shujlla cusahuan causashca cajpimi, chashnaca churana cangui. 10Imata ruranapipash, aliguta rurashpa ricuchij cashca cachun. Huahuacunata aliguta viñachij, cushijushpa mingachij, Diospajlla causajcunapaj chaquitapash maillachij, llaquita apajcunata llaquishpa aliguta ruraj cashca cachun.
11Sapalla cajpipash chairalla huarmicunapaj shutitaca, na churanachu cangui. Chaicunaca, paicunapaj nali munai mishajpimi, Cristota fiñashpa na cazushpa, cazarangapaj munan. 12Shina rurashpaca, punda crishcata na pactachishpami, ninan llaquiman rinajun. 13Shinallata imata rurangapajpash na munashpami, huasin huasin purinatalla yachajunajun. Imata rurangapajpash na munajcunallapash, na canllu. Ashtahuangarin shujcuna imata parlashcatapash cutin shujcunaman parlajcuna, imapipash satirishpa purijcuna tucushpami, napash parlana shimicunata parlashpa purinajun. 14Shinamandami chairalla sapalla huarmicunataca, cazarachun munani. Huahuacunata aliguta viñachishpa, huasipipash aliguta mandashpa causachunmi munani. Shina causajpimi, na ricunayachij gentecunapash ninanda nalicachitaca, na ushanga. 15Huaquin sapalla huarmicunaca, Cristota catinata saquishpami, Satanastara catinajun.
16Crij huauqui cashpa, pani cashpapash, sapalla mamaguta charishpaca, ricushpa caranatami charin. Tandanajuj crijcunara ama carachunmi, caranata charin. Crijcunaca, imagupash illaj sapalla mamagucunamanmi ricushpa, imagutapash caranatapacha charin.
17Crijcunata mandaj rucucuna aligutapacha mandashpaca, ashtahuan alicachi tucunatami charin. Villashpa, yachachishpa trabajajcunacarin, ashtahuambachami alicachi tucunata charin. 18Dios escribichishca Shimipica, cashnami nijun: “Trillajuj huagrataca, ama shimita huatanguichu” nijunmi. Shinallata: “Imagutapash ruraj runaca, culquita japinataca charinllatami” nijunmi.
19Crijcunata mandaj rucuta, shujlla juchachij tiajpica, na crinachu cangui. Ishcai cashpa, quimsa cashpa ricushcata villaj tiajpillami, crina cangui. 20Maijambash cutin cutin juchata rurashpa purijujpica, caishujcunapash manllarichunmi, tucuicunapaj ñaupajpi nalitami rurajungui nishpa, jarcashpa shinllita rimana cangui. 21Taita Diospash, Apunchi Jesucristopash, pai agllashca angelcunapash ricunajujpimi, cashna nishpa canman mingani: Cai ñuca nijujtaca pactachingui. Ama shujtalla alicachishpa, tucuicunatami chashnallata ricushpa, imagutapash rurana cangui. 22Diospajta rurachun maijandapash agllashpaca, nara ali ricushpallataca, na ñapash paipaj uma jahuapi, maquita churanallachu cangui. Pactarallapash shujcuna juchacunata rurashcapi, cambash chapuringuiman. Canga, ima mapapash illaj causangui.
23Vijsata nanachishpa, cutin cutin huañujujpimi candaca, ama ashtahuan yacuta ufiashpa, asha vinota ufiangui nini.
24Huaquingunapaj juchacunaca, pipash nara imata nijpillata ricurinllami. Cutin shujcunapaj juchacunaca, jipamanmi ricurimun. 25Imata aliguta rurashcapash, shinallata ricurinllami. Imashnalla rurashca cashpapash, na pacalla tiajungallachu.
Currently Selected:
1 TIMOTEO 5: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.