1 PEDRO 3
3
Cusandi huarmindi aligutami causana
1Shinallata huarmicunapash, cangunapaj cusataca cazunami canguichi. Shina cazujujta ricushpami, Diospaj Shimita na crij cusapash, canguna na villajpillata crij tucunga. 2Canguna aliguta causashpa cazujujta ricushpami, cusapash cringa. 3Canguna alicachirishpapash, ama jahualla aligu ricuringapajlla, umatapash yapata alichirishpa, orota rurashca imacunahuambash alichirina juyailla punchapamba churajunata churajushpa purinachu canguichi. 4Ashtahuangarin cangunapaj shungu ucupimi, na huaglita yarinata, cushijushpa juyailla causanata alichirina canguichi. Shina causanatami Taita Diosca, ninanda alicachin. 5Shinallatami Diospajlla causanajuj huarmicunapash, ñaupa punllacunaca alichirishpa causashca. Paicunaca, Taita Diosta yariashpa causashpami, cusacunatapash cazunajushca. 6Sara shuti huarmica, paipaj cusa Abrahamda aliguta cazuj cashpami: “Ñucata mandajmari cangui” nijushca. Cangunata llaquichishami nijujpipash, na manllashpa aliguta rurashpa causashpaca, Sara shuti huarmishnami canguichi.
7Shinallata cusacunapash, aliguta yarishpami cangunapaj huarmicunahuanga causana canguichi. Canguna Diosta mañanapi ama nali yuyaicuna jarcachunga, huarmicunataca faquirinalla vasogutashnami alicachina canguichi. Dios ninanda juyashpa, causaita causagrinata caramujujtaca, paicunapash japigrinata yachashpami, chashna alicachina canguichi.
Ali yuyaitami charina canguichi
8Ashtahuangarin tucuicunallata shujllashnalla yarishpa causaichi. Caishujhuan chaishujhuan llaquirishpa, huauqui purashna juyarishpa, pihuambash cushilla parlashpa causaichi. 9Nalita rurajpipash, na chashnallata tigrachinachu canguichi. Ima llaquipash japishpaca alimi canman nijpipash, na chashnallata tigrachinachu canguichi. Ashtahuangarin cangunaca, bendiciai tucungapaj cayai tucushcata yachashcamandaca, paicunatapash bendiciaichi. 10Escribishcapica cashnami nijun:
“Maijambash paipaj causaita juyashpa,
ali punllacunatapash ricungapaj munashpaca,
paipaj jallu nalita parlanataca jarcachun,
shimipash llullanataca saquichun.
11Nalita ruranamanda anchurishpa, alitalla ruraichi.
Casilla ali causaiguta mascashpa, chaitalla catishpa causaichi.
12Jatun Diosca, imatapash cashcatapacha rurajcunatami ricuriajun.
Paicuna mañanajujtapash, aligutapachami uyariajun.
Ashtahuangarin nalita rurashpa causajcunataca,
Taita Diosca ninandami fiñashpa ricujun” nijunmi.
13Canguna aliguta rurashpa causajpica, ¿pita cangunataca llaquichi ushangayari? 14Ashtahuangarin imatapash cashcatapacha rurashpa causanajushcamanda llaquichi tucushpaca, ninandami cushijunguichi. Shina cashcamanda, na paicunata manllaimandalla chujchunachu canguichi, llaquillapash na purijunachu canguichi. 15Ashtahuangarin cangunapaj shungupica, Mandaj Taita Diostaca jucha illajmi cangui ninami canguichi. Cangunaca, juyaillaguta japigrinata yachashpami, cushijushpa shuyanajunguichi. Chaita pipash tapuchijpi, ama jariyashpa ali shunguhuan tigrachingapaca, ña ali yachajushcallami purina canguichi. 16Ali yuyaihuanmi causana canguichi. Cristota catishpa alita rurashpa causanajujpipash, huañuchij runatashna cangunata yangata juchachishpa, nalicachishpa parlajcuna pingai tucuchunmi, chashna causana canguichi. 17Nalita rurashpa llaquita apangapaj randica, Taita Dios munajpica aliguta rurashcamanda, llaquita apanami ashtahuan ali.
18Cristoca, ñucanchipaj juchacunamandami shuj viajella huañurca. Ñucanchi imatapash cashcatapacha na ruraj cajpipash, paica imatapash cashcatapacha ruraj cashpami, ñucanchita Taita Diospajman pushangapaj huañurca. Paica, aichapi huañushcapacha cashpapash, Diospaj Espiritupica causachi tucurcami. 19Cristoca chai Espirituhuanmi, vichai tucushca tianajuj almacunamambash villagrirca. 20Chai almacunaca, Noé villajui punllacunapi Diosta na cazujcunami cashca. Huambuna huasita Noé rurashpa tucuchingacamanmi Taita Diosca, paicunata llaquishpa shuyajushca. Chai huambuj huasita yacu huambuchijpimi, pusaj puracunalla chaipica quishpirishca. 21Chai yacuca cunambi bautizarinchi, chaitami ricuchijun. Chaimandami cunanga, Jesucristo causarishcamandaca quishpirinchi. (Bautizarijpica, cuerpomanda mapataca na anchuchinllu. Ashtahuangarin ñucanchi yuyai alitalla yarichun alichihuai nishpa, Taita Diosta mañashcashnami). 22Cristoca, jahua pachaman rishpami, Taita Diospaj ali ladoman tiajun. Chaipimi angelcunapash, mandajcunapash, ushaita charijcunapash paita cazunajun.
Currently Selected:
1 PEDRO 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.