Kada to Keaka' 4
4
Muanti manda' untobe matoto' kakeakasam
4:1-27
1O inggammua' änä', pehingngii pepanännä'na ambemu,
paillaam penabai anna malako ullolongam pikkiham mapia.
2Aka kubeemmakoa' pepatuduam mapia;
daa umpa'kalembei paondongku.
3Wattunna anna änä'-änä'pä' nakuhäpä' ambeku,
änä' mesanna indoku to napakamaja,
4napatuduä' ambeku naua: <<Patitananni illaam penabammu pepatuduangku;
antii manda' tobei matoto' paondongku, anna malako masakke mahendem.
5Pameäi kakeakasam! Pameäi pikkiham!
Daa umpa'kalembei, anna daa untekka to'doam pudu'ku.>>
6Daa untampeam kakeakasam, anna mala nakambi'ko;
kaha'i anna malako najagai.
7Handam too'na kakeakasam. Dadi pameäi kakeakasam.
Handam pahallu pikkiham. Dadi pameäi pikkiham.
8Pa'kasallei kakeakasam, anna mala napomatandeko;
la napadadiko to diangga' ke muoli'i mamma' ussalungku metindo.
9La napasongko'iko songko' bulu babam,#4:9 songko' bulu babam: Kalembasanna bulu kaloe' dibelo-beloiam/dibunga-bungaiam songko', lambi' tiala inaba muitai.
la napadokkoangko lisu pala'mu songko' tomahaja sumpu malekena.
10O änä'ku, patanannii talinga anna umpaillaam penabai inde kadangku,
anna malako ma'tammu ubam ma'lullum buha-buha.
11Kupatuduko lalanna kakeakasam,
anna kupatetteko lako lalam malolo.
12Maka' mellaoko tä'ko deem la laba-labaam,
maka' ma'sahha'ko tä'ko deem la titedo.
13Antii manda' tobei matoto' pepanännä', daa ullappa'i,
kambi'i umpaliaha, aka ia umbeengko katuboam.
14Daa muola lalanna to tameada',
anna daa untuhu'i lalanna to kadake gau'.
15Pasikambelai kalemu lalam ia too, daa muola eta,
äläiko kalemu dio mai, lalam senga' ola.
16Aka silele tä' mala mamma' matanna,
ke tä'pi puha umpogau' kakadakeam;
miko-miko liu matanna,
ke tä'pi puha umpakapi'di' tau senga'.
17Muande bo'bo' kakadakeam,
untahuttu' uwai kamakahhasam.
18Sapo' lalanna to meada' sihhapam bihha'na allo,
tuttuam masäe tuttuam masiä' sampe malepom kalibajo.
19Lalanna to tameada' sihhapam bengi mapättä;
tanaissam tanapeamo' aka nasuhum titedo.
20O änä'ku, paalai manappai penaba kadangku,
patanannii talinga pessubungam pudu'ku!
21Daa ungkalembei ingganna ia too,
patitananni illaam penabammu.
22Aka iam too lalanna katuboanna to ullambisanni,
anna napobono' bätä puntinna.
23Jagai manappai penabammu la'bi puha ia anna la ingganna aka-aka senga',
aka eta naongei buttu katuboam.
24Pasitäntänganni kalemu pudu' pandem lila manähä,
pasikambelai kalemu tula' kapendo-pendo.
25Pasatutui matammu lako ulalam malolo,
pomanontonni pennenne'mu muundu' kamaloloam.
26Pikki' manappai yolo indo to la ullingkai,
anna pomanontom liui pentekkamu.
27Tala lempä kanangko tala lempä kaihi,
pasikambelai lingkamu kakadakeam.
Currently Selected:
Kada to Keaka' 4: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
