Kada to Keaka' 29
29
1Menna-menna tontä liu toho tambu' moi anna pembudam ditappakadai,
la nalambi' säkä-säkä katilakaam tä'um deem paulena.
2Ianaanna tuttuam kehängänni to meada' la kassi tilalla' tau buda,
sapo' ianaanna to tameada'i palumbängam, la sikaloa' tau buda.
3Menna-menna umpohäe kakeakasam, umpasundede buana ambena,
sapo' menna-menna sikamahoi baine passunda' untallangam ia kullena.
4Undu' lollä napake tomahaja umpakatoto' botto litä'na,
sapo' tomahaja muala passahoma'dinni untallangam ia bottona.
5Menna-menna umpopeala-ala bakunna lako padanna hupatau,
umpaalai ulä' kalena.
6To kadake gau' ia napungo pa'gau' kadakena,
sapo' to meada' ia ponno kakassiam anna sikaahhe tilalla'.
7To meada' ia naissam umpelalangam tabana to mase-mase,
sapo' to tameada' ia tanalambam ulu salunna tanatekka ba'ba minanganna.
8To ma'petuna umpakende' kahukkaam illaam kota,
sapo' to keaka' ia muoppo' aha'.
9Maka' sikaha-kaha to keaka' anna to maho kalebu,
iya la ma'mämmä keaha' indo to maho kalebu anna metaba mangngele-ele, lambi' tä' tibulolo pahhottosam.
10To maelo' la umpatitollo haha ungkabassi to tä' deem sassainna,
sapo' to malolo penaba ia la melappasam.
11To maho ia umpasoa lao aha'na,
sapo' to keaka' ia muoppo' aha'na.
12Ianaanna umpehingngii kada tatappa' to palumbängam,
ingganna to mengkähäna ma'gau' kadake.
13Deem susinna to mase-mase anna to mepi'di' mepakamase-mase,
bassim DEBATA umbeenni mata napopennenne'.
14Ianaanna umpakei undu' lollä tomahaja uhhotto' to mase-mase,
talatilenggu' talatibosso' okkosam kahajaanna sule lako salako-lakona.
15Pesämbä' anna pantappakadai mepakeaka',
sapo' änä' to dipalonda umpakasihi' indona.
16Ianaanna tuttuam budai to tameada', tuttuam membea' duka' kakadakeam,
sapo' talanapekaade' tanapekapaha' to meada' kapehonnosanna.
17Patudu manappai änä'mu, anna mala napomasannangko,
anna napatiala inabammu naposundede buamu.
18Ianaanna tä'i deem pa'palosai buttu di DEBATA, lao sasa bäbä hupatau.
Sapo' maupa' anna katambasam to muanti manda' untobe matoto' pahenta DEBATA.
19Mesa sabua' tä'pi ganna' ke anggai tula' dipatuduam,#29:19 ...tula' dipatuduam: Mala duka' kalembasanna: pahallu disämbä'i susi änä'-änä' anna mala umpalako pengkähänganna.
aka moinna anna naissammi, sapo' tä' siam la napalako.
20Deemmaka iko muita to si ma'tula' sihha'?
Dihannuam leko' ia to maho anna la ia.
21Sabua' to dipalonda mengkalao bahinni'na,
katampasanna kahha' ulu.#29:21 kahha' ulu: Deem piha muuai, katampasanna naala asam kullemu.
22To pa'keaha' umpakende' kasipengkaam,
anna to buhassuam umpakende' buda gau' kadake.
23To malangka' penaba untämmä'i kalena,
sapo' to mahempo penaba ia la dipa'kasallei.
24Menna-menna pada boko pa'boko, ussägäi kalena;
puham ma'dandi, sapo' tä' di ma'tula' setappa'.
25Ungkahea' hupatau umpaalai ulä kale,
sapo' menna-menna uhhannuam DEBATA, la tikambi' ia tipaliaha.
26Buda tau umpopeala-ala bakunna lako to palumbängam,
sapo' anggam DEBATA umpake undu' lollä.
27To tä' malolo penaba nakabassi to meada',
to malolo lingkana nakabassi to tameada'.
Currently Selected:
Kada to Keaka' 29: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
