Kada to Keaka' 26
26
1Umba susi salju wattu malussu kaliane, anna uham wattu pepaheam,
susim too duka' taia okkosanna la umpa'kasallei to maho.
2Umba susi dena' katia'-tia' anna kalumpini' kaleba-leba,
susim too duka' pantädo tadeem lalanna tä' mentama.
3Pesämbä' lako palona daham, ngangnga' illaam sädäna keledai,
anna pesämbä' ube yabo boko'na to maho.
4Daa untimba'i kamahoanna to maho,
indana pada mahokoa'.
5Timba'i to maho anna mala tandaam kamahoanna,
indana ussangai kalena keaka'.
6Menna-menna umpasam to maho,
sihhapam umpoloi bitti'na anna mualaam saha-saha kalena.
7To maho tadiala umpokada kada to keaka',
sihhapam to malu'bä' bitti'na la umpopellao bitti' malu'bä'na.
8Umba susi batu sambam dipasipohi sambam,#26:8 sambam: Sambanna to Israel, uli' si napopelliko, sapo' deem ongeam batunna dipapia illaam tängäna.
susim too duka' umpa'kasallei to maho tä' deem gunana.
9To maho tadiala umpokada kada to keaka',
sihhapam duhi untossä' limanna to mäbo', bassim labu'.
10Menna-menna uhhi'ba'i to maho battu haka to liu lalam napopengkähä,
sihhapam to ma'bälä'du' ullompo'-lompo' tau buda.
11Umba susi asu ullepa'i luana,
susim too duka' to maho umpa'sule-sulei kamahoanna.
12Deemmaka iko muita to ussanga kalena keaka'?
Dihannuam leko' ia to maho anna la tau ia too.
13To busungam angga mempi'dim dio banua, aka naua: <<Deem singa lako lalam!
Deem singa lako kaliane!>>
14Umba susi tutu' ba'ba tiputa' lelem dio andihi ba'ba,
susim too duka' to busungam angga kagihi'-gihi' dio petindoanna.
15To busungam la mehhaku' mandam dokko pihim,
sapo' moi messimpo nakapahhisam toi.
16To busungam ussanga kalena keaka' puha ia
anna la pitu to mentimba' keaka'.
17Umba susi to uhhaka'i talinga asu mellao,
susim too duka' to ungkatama-tamaanni sahana to sipengka.
18Umba susi to tatta' umpopaningoam batu balä'du' sitonda api,
battu diua balä'du' mepakattu sungnga',
19susim too duka' to maningo maho lako solana
mane nauai: <<Kuägä'i hi too kao.>>
20Ianaanna puhai kaju, ma'pi'deam api tau pole';
ianaanna tä'i deem to ma'kada bu'busam, monda kasipengkaam.
21Umba susi hobaja ditolloam osim tama anna api disäläi kaju mabangi,
susim too duka' to napohäe ma'kalla-kalla ussäläi to sipengka.
22Tula'na to ma'kada bu'busam mammi' tadiande,
kannam sule lako lamba' beluä'.
23Umba susi kuhim litä' disapu' peha',
susim too duka' to mapia dio pudu'na sapo' kadake illaam penabanna.
24To mangkabassi mapia pessubungam pudu'na,
sapo' maneko illaam penabanna.
25Moinna anna malutte' tula'na, daa umpehingngii,
aka tadipuha kakadakeam illaam tambu'na.
26Moinna anna pangkabassinna napasamboi kamanekoam,
la tandaam siam gau' kadakena naita tau buda.
27Menna-menna untolombu tau senga', la ia metalumbum dokko,
anna menna-menna la umpalentenni batu solana, la ia nalentenni.
28Lila manähä ungkabassi to napi'di',
pudu' pandem umpasule katilakaam.
Currently Selected:
Kada to Keaka' 26: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
