Kada to Keaka' 2
2
Gunana muampuam kakeakasam
2:1-22
1O änä'ku, ianaanna umpehingngiiko kadangku,
anna umpaillaam penaba pahentaku,
2anna umpatananni talinga kakeakasam,
anna umpellantunni kamanähängam;
3ianaanna ma'kadako umpelau pikkiham,
anna menggamaha umpelau kamanähängam;
4ianaanna umpeäi sihhapam umpeä peha',
anna undaka' sihhapam undaka' pangnganna nene palumpum tomatua,
5iya la muissammi too mengkahea' längäm DEBATA,
anna la ullambi'ko kapaissangam diona Puang Allataala.
6Aka anggam DEBATA mebeem kakeakasam,
anggam Ia naongei buttu kapaissangam anna kamanähängam.
7Ia umbeem pikki' pali' to malolo penaba,
Ia mendadi unta' matoto'na to malolo lingka salukatuboanna.
8Ia unjagai to umpalako undu' lollä,
anna ungkambi' lingkana ingganna to manontom lako kaleNa.
9Iya la muissangko diona kamaloloam sola undu' lollä,
tama'bija tama'sangngana', anna ingganna lalam kamapiaam.
10Aka kakeakasam la mentama pikkihammu,
anna kapaissangam la umpomasannam penabammu.
11Pikki' pali' la ungkambi'ko,
anna kapaissangam la unjagaiko,
12la nakambi'ko indana untuhu'ko lingkana to kadake gau',
lingkana to mebaba bulim tula'na,
13silele mangngopä' umpellei lalam malolo,
anna muolai lalam mapättä.
14Sangngim tiala inabanna umpogau' kakadakeam,
anna sikaahhe tilalla' aka si umpasilekosam kamapiaam anna kakadakeam,
15angga muola lalam sengko',
anna bulim pa'palakoanna.
16Iya la lappa'ko dio mai baine tameada',
dio mai baine sassa' lalam to mässi'-mässi' pa'tula';
17untibe muanena to nasialaam mengkalao di mangnguhanna
anna umpesi' basseam kada to nadandi dio oloNa Puang Allataala;
18dadi, menna-menna tama banuanna sihhapam tinanda lako kamateam,
menna-menna lako banambena sihhapam tinanda lako kaliane anitu.
19Menna-menna la ullese'i tadongkonganna tala malapi ia ma'pasule sule,
anna tä'um deem la tinanda lako lalam katuboam.
20Iam too anna la umpehapanningko to mapia gau',
anna manontongko muola lalanna to meada'.
21Aka to malolo penaba la untadongkonni botto litä' pa'dandianna Puang Allataala,
anna to tä' deem sassainna la ma'ohoam eta too.
22Sapo' to tameada' la dileoi illaam mai botto ia too,
anna to umpesi' tula'na la dipempa'deam illaam mai tadongkongam ia too.
Currently Selected:
Kada to Keaka' 2: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
