Kada to Keaka' 1
1
Kagunaanna Kada to Keaka'
1:1-7
1Indem ia kada to keaka' buttu di Salomo änä'na Daud, tomahaja Israel. Gunana:
2Mepaissanni kakeakasam anna pepanännä',
mepaissanni umpekalembasam kada mala umpatibukka pikkiham,
3mebeem pepanännä' la diaka susi ma'palako keaka',
ma'palako malolo, umpake undu' lollä, tama'bija tama'sangngana',
4umpatibukka akkalanna to saidi' kapaissanganna,
umbeem kapaissangam sola pikki' pali' lako to mangnguha.
5La napehingngii hi too to keaka' anna mala tuttuam kehängäm kamanähänganna,
anna to kepikkiham la ullambi' pepatette;
6anna mala diissam umpekalembasam kada to keaka' anna tula' pehapangam,
tula'na anna sangkahumena to keaka'.
7Mengkahea' längäm DEBATA ia too pa'pahandusanna kapaissangam,
sapo' to maho kalebu umpa'bahinni'i kakeakasam anna pepanännä'.
Pepanännä' anna pepatuduam
1:8-19
8O änä'ku, tobei manda' antii matoto' pepanännä'na ambemu,
oli'i mamma' salungkui metindo pepatuduanna indomu,
9aka pepatuduam ia too sihhapam songko' bulu babam#1:9 songko' bulu babam: Kalembasanna bulu kaloe' dibelo-beloiam/dibunga-bungaiam songko', lambi' tiala inaba muitai. yabo ulummu,
anna anggasanna mani' maleke illaam bahokomu.
10O änä'ku, maka' la napamammisangko tula' to madosa,
daa untuhu'i tula'na.
11Hapanna la nauaangko: <<Maiko tuhu'kam, anta laoa' pangngabum umpatei to liu lalam,
talaoa' pa'pemäjä' anta pa'sangkaheha' umpatei to tä' deem kasalaanna.
12Taande mataia', sihhapangkia' pambo'bä' to mate,
taamma' kalebuia', sihhapangkia' pamombä to mate;
13anta alaa' ebangam keangga' ma'mata-mata,
anta pangngissia' banuanta baham-baham pamuhuam;
14palumai penabammu umpembakkoikam,
anta taba pätä'ia' pallolonganta!>>
15O änä'ku, daa ussola pa'palakoam to madosa,
daa muolai lalanna tau ia too,
16aka ma'didi'um tinanda lako kakadakeam
anna ma'sahha'um lao papateam.
17Tä' ia deem gunana la umpatti poja bendo' samelum buaja
ke naitai dassi la dipemäläi,
18sapo' to madosa ia umpaalai ulä kalena
anna umpa'gahoängam kalena.
19Susim too kakendesanna lako to umpadondoi kulle pangngala kahha',
kulle ia too la naposisulle sungnga'na.
Pepanännä'na kakeakasam
1:20-33
20Metamba kakeakasam dio lalam kasalle,
umpa'pahingngiiam gamahanna dio pa'hanteam kalua',
21katamba-tamba dio ongeam mahoa',
ma'kada kasalle dio olona ba'ba suluhanna kota naua:
22<<O inggannako to saidi' kapaissangammu,
la padapi umba masäena umpohäeko kamahoammu,
o to mantelle, la padapi umba masäena ungkasajanniko pantelle,
o to maho, la padapi umba masäena untumpu pala'ko kapaissangam?
23Pengkatoba'ko ke kutappakadaiko!
Aka setonganna, la kubukkaiangko issi penabangku
anna kupassubungangko batu ateku.
24Aka umpa'talingalenda'iä' wattunna kupa'kadaiko,
anna tä' deem tau umposameleä' wattunna kuka'bi' kutambai.
25Umpa'bahinni'iko petundam pepakilalaangku,
untumpupala'ko pantappaikadangku,
26lambi' la kupelale'iko ke nahuako kasägängam.
La kupa'pissi'ko ke nalambi'ko kamaheasam,
27ke sulei kamaheasam untappiko susi hibu' tatta',
anna sussa tanggana-gana uhhuako anggasanna talimpuhu',
anna kamapi'disam sola kasägängam untappaiko.
28Wattu eta too la sikatamba mengkaala lako kaleku, sapo' tä' deem la kuposamele,
la lu sau' lu dekke napeää'
sapo' tä' deem nalambi'ä'.
29Aka silele ungkabassi kapaissangam,
anna tä' napaalai penabanna mengkahea' dio oloNa DEBATA.
30Tä' naaku untahima petundam pepakilalaangku,
anna untumpu pala' pantappaikadangku.
31Nasuhum la nalambi' pa'dallena,
anna nakaponnoanni pattuju kadakena.
32Aka to saidi' kapaissanganna la mate natumä pa'äena,
anna to maho la nalosu' pa'sele-selena.
33Sapo' menna-menna umpehingngiiä' la ussi'dim kamalinoam sola kamasannangam,
tala malallam tala tigiam dio mai tondom kakadakeam.>>
Currently Selected:
Kada to Keaka' 1: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
