Kada to Keaka' 17
17
1Aham tia saleppo andoha' kaju bake' diande sapo' masannam penaba,
anna la muande bale sapo' sipengka-pengka tau illaam dapo'.
2Sabua' keaka' umpahe' leko' änä' puä to mepakasihi',
anna la dimana' duka' susi solasubunna indo änä' puä to mepakasihi'.
3Pamuttu dipammahehei peha' anna api dipallälläi bulabam,
sapo' DEBATA ia umpangngitai penaba.
4To kadake gau' angga tula' kadake napehingngii,
to ma'tula' tatappa' angga tula' la metullungam napatananni talinga.
5Menna-menna untabu-tabuam tula' to mase-mase umpetuna To metampana;
menna-menna umpetaba-tabai to masussa tä' la lappa' dio mai pa'tahungkungam.
6Änä' ampo sihhapam danga-danga tubo yabo ulunna mentu'na tomatua,
tomatua napobunga-bunga mentu'na änä'.
7Tau hembu' tä' sipäto' ma'tula' tongam,
senga'pa ia sendana taditepä' tä' sipäto' la umpokada tula' tatappa'.
8Doi' passahoma'dinni naangga' pekelo to umpebeenni,
ia natingngajoi, ia naongei pakanna.
9Menna-menna nabela muamma' kasalaanna solana, umpeä passiolaam,
sapo' menna-menna ungkahoi pa'tappiam bosi, undake-dake ia kasilombungam mapia.
10Mangngande puha ia pissam untappakadai to kepikkiham,
anna la umpuppu'iam pesämbä' to maho.
11To kadake gau' angga ia pabali-bali,
sapo' la dipasuleam duka' to makahha' kadake.
12Aham asu keänä'#17:12 asu keänä': Illaam basa Ibrani naua ke basa Bambanni: <<Beruang bihä umpeä änä'na aka pa'de/bulim>>. disitammuam,
anna la to maho sipangngula' kamahoanna.
13Menna-menna dileba' kumba' meleba' di batu,
la nakessehäi ia kakadakeam dapo'na.
14Umpakende' kasipengkaam sihhapam umboka'i panambuam;
dadi, podo'i tula'mu sumala tä'pi kende' kasipengkaam.
15Ummaloloam to tameada' anna umpasala to meada',
bassim nakabassi DEBATA.
16Aka gunana doi' la napake to maho la naalliam kakeakasam,
aka tä' siam deem pikkiham mapianna?
17Sangkalamma' ia tä' deem malele pa'kamasena,
anna siundu' ia mampamoloi liu illaam kamasussaam.
18To takepikkiham ma'dandi la ia melluä sambu' umbajasam indanna solana,
anna umpangngindosam solana.
19Menna-menna umpohäe kasipengkaam, napohäe duka' mantekka kalo' mallambam mata uwai;
menna-menna umpa'pakatäjä'-täjäsam kadeenganna umpa'gahoängam kalena.
20Menna-menna sengko' penaba tä' deem la silambi' kasannangam,
menna-menna umbungkeko' lilana la ullambi' katilakaam.
21Menna-menna siampuam änä' to maho la ussi'dim pi'di' penaba;
menna-menna umpoänä' tau hembu' tä' deem la meala inaba.
22Penaba tilalla' sihhapam pakuli masahhu',
sapo' ianaanna masussai penaba umpalussem buku.
23To tameada' untahima buni doi' passahoma'dinni,
lambi' ma'bisaha hempe'.
24To kepikkiham angga kakeakasam napasatutui pikkihanna,
sapo' to maho ia angga pelamboho pikkihanna ussamba lino.
25Änä' to maho umpi'di' penaba ambena,
anna umpomasussa penaba indona.
26Tä' sihatam la umpassala to meada',
tä' toi sipäto' la untappai lima to ma'penaba bulabam.
27To deem kapaissanganna ungkambi' pudu'na,
to manähä matänä' penaba.
28Mesa to maho kalebu la disaba' disanga to keaka' ke mengkamma'i,
anna la disaba' disanga to kepikkiham ke muammu'i pudu'na.
Currently Selected:
Kada to Keaka' 17: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
