Ka Rome 8

Nza waɗe laka Sefəa Shala

1Ama tsetsenya ne, kazhɛne fete kave nda geva ke mbeli nyi jikə le Yɛsə Kriste we. 2Kwa nza ŋkɛ wəsə mahalegəa Sefəa Shala nde ve nda mpi ke wəndə nya kejikəte geva le Yɛsə Kriste. Gheŋkɛ nde mbelete ɗa va wəsə mahalegəa jaɗafa ba'a mte. 3Nahe Shala kemenete wəsə nya peslema wəsə mahalegə kamene kwa fɛake wəsəa shɛ dewə ŋelia wəndə ŋelɛ, nahe ŋkɛ kendeke nda fete ke jaɗafa nya mbe wəndə kwa ghweneke Wəzege ta ŋkɛ ŋkɛ le geva kanza kala nza ta nde jaɗafa. 4Tsagha menete Shala yitea mene geva nza tiɗiɗia wəsə mahalegə laka gheɓəmə nyi kedzeghwa kala nya ɗe Sefəa Shala, kaɗema kala nya ɗe wəndə ŋelɛ. 5Ma mbeli nyi kenza kala ɗe ta wəndə ŋelɛ ne, wəsə nya ɗe wəndə ŋelɛ yamene hɛ. Ma nyi kenza laka Sefəa Shala ne, wəsə nya ɗe Sefəa Shala yamene hɛ. 6Ɗehwe ghena ta wəndə ŋelɛ nde kele wəndə kalə sha mte, ɗehwe ghena ta Sefəa Shala nde kele wəndə kalə sha mpi ba'a nza kwelɛŋe. 7Ma mbeli nyi kezəzə ɗe ta wəndə ŋelɛ ne, nahe hɛ kenza kaka jaga ta Shala, kazele wəsə mahalegəa Shala hɛ we, kapesle hɛ yite banda we. 8Ma mbeli nyi kemene kala nya ɗe wəndə ŋelɛ ne, zeɗehwe nda hɛ ke Shala we.

9Ama gheyɛ ne, kenza yɛ kala ɗe ta wəndə ŋelɛ we, ama kala nya ɗe Sefəa Shala, va nya nza ŋkɛ mbe wənəa ŋayɛ Sefəa Shala shɛ. Ma wəndə nya ɗema Sefəa Kriste mbe ne, ŋa Kriste ŋkɛ we. 10Ma kenza nde mbe gheyɛ Kriste ne, ya kwela nza geva ta ŋayɛ katemte va ghena ta jaɗafa, kampia ŋayɛ nza Sefəa Shala va nya zhɛrete ŋayɛ Shala kambeli nyi tiɗiɗi kwa kema ta ŋkɛ. 11Ma kenza nde mbe wənəa ŋayɛ Sefəa Shala nya kekelakame Yɛsə same kwa kwele le mpi ne, gheŋkɛ nde teve nda mpi ke geva ta ŋayɛ nyi kempə laka Sefəa ŋkɛ nya mbe gheyɛ.

12Vatse gɛ, ka kesaka meyɛ ɗa, nahe dewa kenza hwa gheɓəmə, ama kenza laka ɗe ta wəndə ŋelɛ nza dewa hwa gheɓəmə we. 13Ma kenza nde kala ɗe ta wəndə ŋelɛ nza yɛ ne, katempə yɛ. Ama kenza nde laka Sefəa Shala pesle ɗe ta wəndə ŋelɛ nya mbe wənəa ŋayɛ yɛ ne, teghweme tenza yɛ. 14Ma pɛtɛa mbeli nyi ncɛ nda hweŋkwa Sefəa Shala ne, ŋwalea Shala hɛ fate fate. 15Kwa nza ŋkɛ sefə nya kezhɛre ŋayɛ kaka mavashi ba'a nya kendeke ŋayɛ ghazlənə yakemave yɛ we, ama Sefəa Shala nya keveyi ŋayɛ kaŋwalea Shala nyi kelete ŋkɛ, laka gheŋkɛ heka Shala gheɓəmə kaAba, geze ta ŋkɛ, Yita. 16Sefəa Shala le ghəa ŋkɛ nde ncɛ ɓəmə kaŋwalea Shala gheɓəmə. 17Ma nda ŋwalea ŋkɛ gheɓəmə ne, ka zeme ghɛ gheɓəmə, katekemave wəshi nyi veyi nda ŋkɛ ke ŋwalea ŋkɛ gheɓəmə zlaɓe le Yɛsə, kwa nza ŋkɛ kasa yaka gheɓəmə le gheŋkɛ, mbe zləvəa ŋkɛ tenza gheɓəmə perə.

Zləvə nya ketese

18Ma zəzə 'ya ne, kateyipə geva zləvə nya tencɛ ɓəmə Shala le yaka nyi sa gheɓəmə te hɛɗi nya tsetsenya we. 19Kwa nza ŋkɛ pɛtɛ wəshi nyi pate Shala kaneghe və nya tencɛ ŋwalea ŋkɛ Shala te. 20Pɛtɛa wəshi nyi pate Shala ne, kawəshi gəmə nza hɛ. Kenza va nya ɗehwe hɛ le ghəa nci we, ama Shala nde ɗete tsagha. Ya tsagha ŋkɛ ne, ve ghə ya shɛ. 21Pələsə tenza hɛ va nza kaka mavashia beze, kezha kemave nza kaka mamzashi ba'a zləvəa ŋwalea Shala. 22Nahe gheɓəmə keɗepe deŋwa, mba wəshi nyi pate Shala pɛtɛ kaŋələvə kala male nya keheha va ya. 23Kenza deke wəshi nyi te hɛɗi we, ma gheɓəmə nyi nza tsəmə wəshi nyi ve nda Sefəa Shala ke wəndə va gheɓəmə ne, kaŋələvə gheɓəmə mbe wənəa ɓəmə, va nya neghe zhɛre ta ɓəmə kaŋwalea Shala nyi kelete ŋkɛ gheɓəmə, mbele ta geva ta ɓəmə fate fate yaneghe gheɓəmə. 24Kwa nza ŋkɛ nahe Shala kembelete ɓəmə, ama kwa keɗaŋe ta ve ghə ta ɓəmə yaneghe gheɓəmə. Ma kenakɛ wəsə nya ve ghə wəndə te wəndə ne, kazhɛne mbeli kaheka kave ghə we. Ma wəsə nya newe wəndə na ne, kazhɛne wəndə kave ghə te na? 25Ama kenza gheɓəmə kave ghə te wəsə nya ɗema gheɓəmə kenakɛ ne, kaneghe wəsəa shɛ gheɓəmə le zereghe ghena.

26Tsagha kemane ɓəmə Sefəa Shala mbe dewə ŋelia ɓəmə. Kaɗepe səkwə ghə gheɓəmə kala nya kehi we, kasəkwə ghə Sefəa Shala kezha gheɓəmə laka mpi dzeve nyi ɗema mɛ kagezete. 27Shala nde ɗepe wəshi nyi mbe wənəa wəndə, tsagha ɗepe wəshi nyi ɗe Sefəa ŋkɛ ŋkɛ. Sefəa ŋkɛ səkwə ghə kezha mbelia Shala, kala nya ɗe ŋkɛ.

28Nahe gheɓəmə keɗepe tsema tsema mene geva pɛtɛa wəshi kezha ganyɛa mbeli nyi keɗe Shala, mbeli nyi hekakɛ ŋkɛ kala nya zəzəte ŋkɛ. 29Ma mbeli nyi tsehave ŋkɛ mpelɛa, nahe ŋkɛ ketarete mpelɛa kezha zhɛre hɛ yipə yipə le Wəzege ta ŋkɛ, yitea nza Wəzege ta ŋkɛa shɛ katezhɛa ka kesaka ma kwele kwele. 30Ma mbeli nyi tsehave Shala mpelɛa ne, nahe ŋkɛ kehekakɛ hɛ perə. Ma nyi hekakɛ ŋkɛ ne, nahe ŋkɛ kezhɛrete hɛ kambeli nyi tiɗiɗi perə. Ma mbeli nyi zhɛrete ŋkɛ tiɗiɗi ne, nahe ŋkɛ kendeke nda zləvəa ŋkɛ ke hɛ perə.

Nza ta kwelea ɗe ta Shala

31Wa ke gheɓəmə sha geze wa? Ma kenza nde le gheɓəmə Shala ne, wa nde teɗema kanza le gheɓəmə wa? 32Kefɛake Wəzege ta ŋkɛ ŋkɛ kesa yaka we, ama nahe ŋkɛ kepelakɛ ŋkɛ kamte te ŋkwa ɓəmə, tsema ɗema ŋkɛ ve ɓəmə pɛtɛa wəshi laka Wəzege ta ŋkɛ wa? 33Wa nde teve nda fete ke mbeli nyi tsehave Shala wa? Wəndə shɛ we, kwa nza nde Shala nde veyi hɛ tiɗiɗi. 34Wa nde teve nda fete ke hɛ wa? Wəndə shɛ we. Kwa nza ŋkɛ nahe Yɛsə Kriste kemte ba'a kesame kwa kwele le mpi. Zhɛne ne, mentishɛ ŋkɛ te kwa zeme ta Shala, ghə yasəkwə ghə ŋkɛ kezha gheɓəmə. 35Wa nde nza kanehemte ɓəmə le ɗe ta Kriste wa? Ndiremi na, taze ta mehele na, mɛ nya ghweze mbeli hwa gheɓəmə na, ma na, titikwə lekwesa na, za na, kafayɛ na? 36Ma ke Ghena ta Shala gezete: «Tewəmbəreke gha ne, veci veci mbeli kampə n'yɛ, kazhɛre n'yɛ mbeli kala timɛti nyi lə mbeli kahene hɛ.»

37Ama ya kwela nza ŋkɛ tsagha ne, nahe gheɓəmə kenza kaka katsala kɛfi ma laka Nde ɗehwe ɓəmə. 38Kaganda ne, nahe 'ya keɗepe, wəsə shɛ kanehemte ɓəmə le ɗe ta ŋkɛ we: ya mte, ya nza teghweme, ya ka ghwene ta Shala, ya berete nyi pelɛ ghweme, ya nza nya tsetsenya, ya nza nya te kwete veci, 39ya berete nyi pelɛghə, ya nyi kwake, ya pɛtɛa wəshi nyi kepate geva. Wəsə shɛ kaneheve ɓəmə le ɗe nya ncɛte ɓəmə Shala laka Yɛsə Kriste Nde sleke ɓəmə.

Currently Selected:

Ka Rome 8: BEKDC12

Highlight

Copy