Ka Rome 6

Mte ba'a nza teghweme mbe Yɛsə

1Wa ke gheɓəmə sha geze wa? Nza ɓəmə gheɓəmə mbe jaɗafa kezha mtsehe geva zlaɓa ta Shala kwele kwele na? 2Tsagha we. Ma kwa nza ŋkɛ kambeli nyi kempə mpə gheɓəmə laka jaɗafa ne, tsema nza gheɓəmə mbe jaɗafa zhɛkwa wa? 3Na, gheyɛ ɗepema nahe gheɓəmə nyi kekemave batɛme kezha nza jikə le Yɛsə Kriste kempə jikə le Yɛsə wəka? 4Laka batɛme ne, nahe gheɓəmə kelamte geva le Yɛsə nya kemtenyɛ, kezha mpə ɓəmə le, kezha nza gheɓəmə kambeli mɛnɛfɛ kala Kriste nya kesame kwa kwele laka berete ta Yita.

5Ma kwa nza gheɓəmə jikə le, va nya nza ŋkɛ nahe gheɓəmə kempə zlaɓe le mbe mte ta ŋkɛ, tsagha shɛ tenza gheɓəmə jikə le kwa same gheɓəmə kwa kwele zlaɓe le. 6Fa ɓəmə ghena shɛ ndeɗekə, nahe meha wəndə nya mbe gheɓəmə kemte le Yɛsə te sheghwə kezha zamte sebe te jaɗafa ta ɓəmə. Tsagha ne, mba gheɓəmə kaka mavashia jaɗafa zhɛkwa we. 7Kwa nza ŋkɛ nahe wəndə nya kemte kembelenyɛ va jaɗafa. 8Ma kenza nde nahe gheɓəmə kempə le Kriste ne, nahe gheɓəmə keɗepe teghweme tenza gheɓəmə le. 9Nahe gheɓəmə keɗepe Kriste nya kesamenyɛ kwa kwele hwa mbelia kwa hɛɗi, kamte ŋkɛ zhɛkwa we, mba mte kamenete meghe te zhɛkwa we. 10Kwa mtenyɛ ŋkɛ ne, kwetɛŋe zhigə mtenyɛ ŋkɛ laka jaɗafa. Teghweme ŋkɛ tsetsenya tse, kezha Shala nza ŋkɛ teghweme tsagha. 11Tsagha yɛ perə, ve mə ghəa ŋayɛ kaka mpə mpə laka jaɗafa, ama kambeli nyi teghweme kezha Shala laka Yɛsə Kriste.

12Ma kala nya ŋkɛ gɛ ne, zhɛnema yɛ kapele jaɗafa kanza kameghe mbe geva ta ŋayɛ nya ketemte kezha kese ŋayɛ kahawe va mawe ta geva ma. 13Zhɛnema yɛ kazhɛre kweci bela ta geva ta ŋayɛ kawəshi kemene jaɗafa kezha mene wəsə kwa ndiremi hɛ ma. Ama menete nda mə slene ke Shala le geva ta ŋayɛ pɛtɛ, kala mbeli nyi kesamenji kwa kwele nyi kenza le mpi. 14Ma tsagha ne, mba jaɗafa kasleke ŋayɛ, va nya ɗema wəsə mahalegəa Shala kasleke ŋayɛ we, ama zlaɓa ta Shala nde sleke ŋayɛ.

Mene nda slene ke nza tiɗiɗi

15Tsema ke gheɓəmə sha geze wa? Mene jaɗafa gheɓəmə va nya ɗema wəsə mahalegəa Shala kasleke ɓəmə, ama zlaɓa ta Shala na? Tsagha we. 16Keɗepe yɛ wəka? Ma kendeke nda ghəa ŋayɛ yɛ ke kwete wəndə kala mava ta ŋkɛ ne, wəsə nya ɗe ŋkɛ yamene yɛ, keɗema slene ta jaɗafa nyi kekele wəndə kalə sha mte, keɗema hawe va Shala nya keve wəndə tiɗiɗi. 17Hana ke gheɓəmə sha Shala. Kaka mavashia jaɗafa se yɛ vəashi, ama tsetsenya ne, nahe yɛ keyɛte fete le wənə kwetɛŋe yitea ghena nya tekete ka ghwene ta Yɛsə Kriste nya kelete yɛ. 18Ma kwa mbelemte geva yɛ va jaɗafa ne, nahe yɛ kezhɛre ŋayɛ kaka mavashia nza tiɗiɗi. 19Kala nya geze ghena wəndə ŋelɛ geze ŋayɛ 'ya, va nya nza ŋkɛ dewə berete ta ŋayɛ. Vəashi ne, nahe yɛ kezhɛrete yɛ geva ta ŋayɛ kaka mavashia wəsə nya wale wale ba'a wəsə kwa ndiremi, nyi keve nda fa nda ma ghena ke Shala ke mbeli. Tsagha shɛ gɛ, zhɛre mə yɛ geva ta ŋayɛ kaka mavashia wəsə nya tiɗiɗi kezha nza kambeli nyi keveyi geva tekeleke.

20Ma kwa se yɛ kaka mavashia jaɗafa ne, nahe yɛ kese kaka mamzashi laka nza tiɗiɗi. 21Wa zhɛme nya kemave yɛ te vecia shɛ wa? Kwa nza ŋkɛ kazhɛ ŋayɛ hawe tsetsenya ve. Kwa nza ŋkɛ mte ya kafəli nya mbe mene wəsə kwa ndiremi. 22Ama tsetsenya ne, nahe yɛ kembeɗekɛ geva va jaɗafa ba'a kezhɛre kaka mavashia Shala, meleɓe ya va gheyɛ le nza kambeli nyi keveyi geva tekeleke. Ma fəli nya mbe nyagha ne, mpi nya kaghala ghala. 23Kwa nza ŋkɛ mte ya kafəli nya mbe jaɗafa, ama wəsə nya ve nda Shala gəmə ke mbelia ŋkɛ ne, gheŋkɛ mpi nya kaghala ghala mbe nza jikə le Yɛsə Kriste Nde sleke ɓəmə.

Currently Selected:

Ka Rome 6: BEKDC12

Highlight

Copy