Matiye 6

Ghena te ghəa ɗa wəshi ke ka titikwəa kɛfi

1Ntsehwele mə yitea tserame wəshi nyi 'yɛwe Shala va gheyɛ kwa kema ta mbeli kezha tsagha ŋayɛ mbeli pɛtɛ. Ma kenza nde tsetse mene yɛ ne, katekemave zhɛme yɛ va Yiteyɛ ŋayɛ nya pelɛ ghweme we.

2Ma keɗe na kaɗe nda wəsə ke ka titikwəa kɛfi, menema na kwa kema ta mbeli kezha tsahe ŋa hɛ kala nya mene ka mbəɗəkwə mbe yɛ cɛ kesəkwə ghə ba'a dzeyi kwa yɛ hweŋkwa. Kaganda ne, ma 'ya sha gheyɛ: nahe hɛ kekemave zhɛme ta nci tsetsenya. 3Ma kenza na kakemane ka titikwəa kɛfi ne, ncɛ nda ma na ya ke mcɛ ŋa kwa sla pela ŋkɛ ma. 4Tsagha ne, tewəfərə wəsə nya ndeke nda na. Nahe Shala, Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

Ghena te ghəa səkwə ghə

(LWK 11.2-4)

5Ma kenza yɛ kasəkwə Shala, mba yɛ kemene kala ka mbəɗəkwə, meslete ɗe hɛ kasəkwə ghə mbe cɛ kesəkwə ghə keɗema dzeyi kwa yɛ baŋwa ta hweŋkwa yitea newe hɛ mbeli. Kaganda ne, ma 'ya sha gheyɛ: nahe hɛ kekemave zhɛme ta nci teke te hɛɗi. 6Ma keɗe na kasəkwə Shala ne, dzembe cɛa ŋa, ŋzlete ŋkwa, səkwə Shala Yiteyɛ ŋa nya mbe cɛa shɛ. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

7Ma kenza yɛ kasəkwə Shala ne, mba yɛ kezhɛne ghena nya kwetɛŋe kala nya mene kweci hwelefefi. Ma zəzə hɛ ne, te ghena nyi zhezhɛne hɛ nza Shala fate səkwə ghə ta nci. 8Tekema hɛ yɛ ma, kwa nza nde nahe Shala Yiteyɛ ŋayɛ keɗepe ghena nya ɗe yɛ tewə yɛ kenaka ka'yɛwe ve. 9Wa nya tsetse səkwə ghə yɛ:

Yiteyɛa n'yɛ nya pelɛ ghweme,

hawe mbeli va ganyɛa sləa ŋa,

10Sawa Meghea ŋa,

mene wəshi nyi ɗe na mbeli nyi te hɛɗi

kala nya mene mbeli nyi pelɛ ghweme.

11Ɗave n'yɛ wəsə kezeme behe n'yɛ ve ɓeshi.

12Kelemte ghena bezemte ŋa n'yɛ te wənə,

kala nya kelemte nda n'yɛ ke mbeli nyi kebezemte n'yɛ ghena.

13Kelema n'yɛ na kadzete ŋkwa kedzeghe ŋkwa ma,

ama yakɛ n'yɛ va Nde ghwete ŋkwa,

kwa nza ŋkɛ, ŋa ŋa meghe, berete,

ba'a zləvə, kaghala ghala. Amɛn.

14Kwa nza ŋkɛ ma kekelemte ghena nyi bezemte ŋayɛ kweci mbeli yɛ te wənə ne, katekelemte ŋa ŋayɛ Yiteyɛ ŋayɛ nya pelɛ ghweme te wənə perə. 15Ma keɗema yɛ kekelemte ghena nyi bezemte ŋayɛ kweci mbeli te wənə ne, katekelemte ŋayɛ Yiteyɛ ŋayɛ nya pelɛ ghweme te wənə perə we.

Ghena te ghəa səwəmayɛ

16Ma kenza yɛ kamene səwəmayɛ, nzama yɛ le kema teheɗe kala mbeli nyi shewə ma, tsagha mene ka mbəɗəkwə, pa hɛ zhɛrete kema tɛarawe rawe kezha ɗepe pɛtɛa mbeli səwəmayɛ yamene hɛ. Kaganda ne, ma 'ya sha gheyɛ: nahe hɛ kekemave zhɛme ta nci tsetsenya. 17Ama gha, kenza na kamene səwəmayɛ ne, pɛkɛ kema ta ŋa, slaɗete ghəa ŋa, 18yitea ɗepema mbeli səwəmayɛ yamene na. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

Ghena te ghəa mcɛlə nya pelɛ ghweme

(LWK 12.33-34)

19Tsenema mcɛlə yɛ kwake te hɛɗi, te ŋkwa nya beze hɛ yɛ lema ba'a dene, ŋkwa nya belaŋe gelembe ka ghərəa kɛfi kezha fə hɛ ma. 20Tsene mə mcɛləa ŋayɛ pelɛ ghweme, te ŋkwa nya ɗema yɛ lema ba'a dene kezha beze hɛ, ya ka ghərəa kɛfi kezha belaŋe gelembe ba'a kezha fə hɛ. 21Kwa nza ŋkɛ ne, te ŋkwa nya nza yɛ mcɛləa ŋa tenza mehele ta ŋa shanda.

Paterela ta geva

(LWK 11.34-36)

22Ntsə ya kapaterela ta geva, ma kenza nde lɛŋe lɛŋe ntsə ta ŋa ne, waŋe ŋkwa nya mbe pɛtɛa geva ta ŋa. 23Ma kenza nde nahe ntsə ta ŋa kebeze ne, te ŋkwesle pɛtɛa geva ta ŋa. Ma kenza nde nahe waŋe nya mbe geva ta ŋa kenza kaŋkwesle ne, katenza ŋkweslea shɛ zhikwətəkwə.

Shala keɗema cɛdɛ

(LWK 16.13)

24Wəndə shɛ kamenete nda slene ke ka sleke ŋkwa bake we, kateɗema ghena ta kwete ŋkɛ, kateɗe ŋa kwete ŋkɛ. Katenza ŋkɛ dɛŋe dɛŋe te kwete, kateɓelama ghena ta kwete ŋkɛ. Kapesle yɛ yitea mene nda slene ke Shala ba'a ke cɛdɛ kanya kwetɛŋe we.

Ve nda ghə ke Shala

(LWK 12.22-31)

25Vatse gɛ, ma 'ya sha gheyɛ: mba yɛ keheha yitea wəshi kezeme ta ŋayɛ ba'a wəshi nyi tesa yɛ, lekwesa nyi teseɗe yɛ. Za ma mpi ke wəsə kezeme, za ma geva ke lekwesa wəka? 26Newe mə 'yɛ nyi kezlə yitea ghweme, katsawe wəshi kezeme hɛ we, kamene wəshi hɛ te wəve we, katsene hɛ kadzawa tame we, ama Yiteyɛ ŋayɛ nya pelɛ ghweme nde zeme nda wəshi kezeme ke hɛ. Ŋkwini zhigə nza zləvəa ŋayɛ za ma ke 'yɛ wa? 27Wa wəndə nya kenza kambakete hɛa ŋkɛ hwa gheyɛ laka heha ta ŋkɛ wa?

28Yitea wa heha yɛ kwele kwele yitea lekwesa wa? Newe ma mə nza ta ghwə ta wəfe kwamte, kamene slene hɛ we, katsa lekwesa hɛ we. 29Ma 'ya sha gheyɛ: ya Salomon mbe zləvəa ŋkɛ ne, kegha ŋkɛ kaseɗete lekwesa nyi ganji ganji ma ke ghwə ta wəfea shɛhɛ we. 30Mbe seɗe nda lekwesa Shala ke gwəzə nya kenza megela ɓeshi ne, hendɛ mbe ghwə ŋkɛ, ashɛ ŋkɛ kateseɗe ŋayɛ lekwesa za ma ke hɛ wəka? Dewə ndeke nda ghə yɛ ke Shala deŋwa. 31Hehama yɛ laka geze: Wa yatezeme gheɓəmə wa? Wa yatesa gheɓəmə wa? Wa yateseɗe mə wa, pe yɛ ma. 32Kweci hwelefefi kazele wəshi nyi kala nyi keveci keveci. Nahe Yiteyɛ ŋayɛ nya pelɛ ghweme keɗepe nahe wəshia shɛhɛ ketsakɛ ŋayɛ. 33Zelete mə Meghea Shala ba'a nza tiɗiɗi kaba. Kateve ŋayɛ pɛtɛa wəshi nyi ketene Shala kadzeghə. 34Mba yɛ kedambeghə ŋayɛ kaheha yitea hendɛ, hendɛ nde ɗepe ghəa ŋkɛ. Wərə heha nya ɓeshi kaŋa veci nya ɓeshi.

Currently Selected:

Matiye 6: BEKDC12

Highlight

Copy