Matiye 7

Mehama ghwə te kweci mbeli

(LWK 6.37-38, 41-42)

1Mehama ghwə yɛ te ke kweci mbeli yitea ɗema Shala kameha ghwə te gheyɛ ma. 2Kwa nza ŋkɛ kala nya meha ghwə yɛ te kweci mbeli ne, tsagha temeha ghwə Shala te gheyɛ. Wəsə nya se yɛ kamene nda ke kweci mbeli yatemene ŋayɛ mbeli deŋwa. 3Yitea wa newe kwa shekwəli nya mbe ntsə ta wəza meyɛ ŋa na, sərə təkwə nya mbe ntsə va gha wa? 4Tsema shɛ na geze sha wəza meyɛ ŋa: Kaba kakelemte ŋa shekwəli 'ya mbe ntsə ta ŋa, a pa, mba təkwə mbe ŋa ŋa wa? 5Nde mbəɗəkwə, kelemte təkwə nya mbe ntsə ta ŋa. Tagha gɛ, katenewe ŋkwa na ghwɛaɗɛaɗɛa kezha kele shekwəli nya mbe ntsə ta wəza meyɛ ŋa.

6Ve nda ma wəsə nya keveyi geva kaŋa Shala yɛ ke kelɛ keti, yagha hɛ kazhɛrete geva kaslekwe ŋayɛ ma. Neghama wəsə kepesa geva ta ŋayɛ yɛ te kema ta yɛ gərədə yagha hɛ teŋkeɗe ma.

'Yɛwe mə wəshi va Shala, kateve ŋayɛ ŋkɛ

(LWK 11.9-13)

7'Yɛwe mə, katekemave yɛ, zele mə, katesləyi yɛ, tsa mə mɛa cɛ, katepele ŋayɛ ŋkwa mbeli. 8Kwa nza ŋkɛ ma yayata wəndə nya ke'yɛwe wəsə ne, katekemave ŋkɛ, nya kezele ne, katesləyi ŋkɛ, katepele nda ŋkwa mbeli ke wəndə nya kemɛ kwa degha. 9Wəndə shɛ hwa gheyɛ nya kenza kandeke nda pelɛ ke wəzege ta ŋkɛ ke'yɛwe ɗafa ŋkɛ na? 10Na, ma ke'yɛwe kelepe ŋkɛ ne, pa ŋkɛ ndeke nda shishi na? 11Ma gheyɛ nyi keɗema kambeli ganji, wəshi ganji yave nda yɛ ke ŋwalea ŋayɛ ne, ashɛ za ma teve nda wəshi ganji Yiteyɛ ŋayɛ nya pelɛ ghweme ke mbeli nyi ke'yɛwe ve wəka?

12Mene nda mə wəshi ganji ke kweci mbeli kala nya ɗe yɛ kamene ŋayɛ hɛ, gheŋkɛ yateke nda wəsə mahalegə ba'a ka mɛ ŋkwa ke mbeli.

Mɛ degha nya mentɛawe

(LWK 13.24)

13Dzeki mə kwa mɛ degha nya mentɛawe. Kebeŋwenyɛ mɛa degha ba'a kebezlenyɛ hweŋkwa nyi kekele ŋkwa kadzete ŋkwa za. Kwele kwele mbeli nyi kedzeghwa kwa. 14Ama mentɛawe mɛ degha ba'a dzawe hweŋkwa kekele ŋkwa kadzete ŋkwa nya nza mpi. Ɓɛhwɛ mbeli nyi kedzeghwa kwa.

Yɛ wəfe le yɛ ya ta ŋkɛ

(LWK 6.43-44)

15Ntsehwele mə va ka tseŋwəa ka mɛ ŋkwa nyi kese, kala timɛti se hɛ sha gheyɛ, ama nda makwagwele nyi kempeɗe ŋkwa hɛ. 16Te slene ta nci teɗepe hɛ yɛ. Kandave yɛ rɛzɛŋe mbeli te tigə na? Na, kandave yɛ dasekwa mbeli te hwele na? 17Ganyɛke nza ya ta wəfe nya ganyɛ, ndiremike nza ya ta wəfe nya ndiremi. 18Kashɛ wəfe ganyɛ ya ya nyi ndiremi ndiremi we, kashɛ wəfe nya ndiremi ya ya nyi ganji ganji we. 19Yayata wəfe nya keɗema kaya ya nya ganyɛ ne, katsasle ŋkɛ mbeli kadzemɛa ghwə. 20Te slene ta nci nza yɛ kaɗepete ka mɛ ŋkwa tseŋwə.

Keɗepe ŋayɛ 'ya tɛape we

(LWK 13.25-27)

21Kenza geze ɗa: Nde sleke ŋkwa, Nde sleke ŋkwa, wərə kezha dzembe Meghe nya pelɛ ghweme we, ama nda wəndə kamene ɗe ta Yiteyɛ ɗa nya pelɛ ghweme. 22Ma vəa ŋkwa nya tese 'ya kameha ghwə te mbeli ne, ma ke mbeli kwele kwele sha tegeze ɗa: Nde sleke ŋkwa, Nde sleke ŋkwa, nahe n'yɛ kese kageze kelɛŋə te sləa ŋa, nahe n'yɛ keŋkamte yɛ 'yi'yɛghwə te sləa ŋa, nahe n'yɛ kemenete wəshi meŋele kwele kwele te sləa ŋa. 23Tagha gɛ, ma 'ya tezhɛne nda ke hɛ: Keɗepe ŋayɛ 'ya tɛape we. Slə ŋayɛ mə cakeɗake yitea 'ya, gheyɛ ka mene wəsə kwa ndiremi.

Yipə pa ta ghɛ bake

(LWK 6.47-49)

24Ma yayata wəndə nya kefate ghena ta ɗa ba'a nya kemenete slene le ne, yipə yipə tenza ŋkɛ le wəndə nya kentsehwele ntsehwele nya keŋate cɛ te keleɓa. 25Kipə kesawa va, mpəɗə kesawa hələ, pa sefə nya wəba vɛke geva kase sha cɛa shɛ, ama keŋzla ŋkɛ, va nya nza shihəa ŋkɛ te keleɓa we. 26Ama yayata wəndə nya kefate ghena ta ɗa, nda ɗema kese kamene slene le ne, yipə yipə ŋkɛ le gezhi nya keŋate cɛ te ndaleghe. 27Kipə kesawa va, mpəɗə kesawa hələ, pa kevɛke geva sefə nya wəba kase sha cɛa shɛ ne, ghwəpə cɛa shɛ ŋzlanyɛ, tɛhɛaŋe ŋkɛ.

Berete ta Yɛsə mbe wəshi nyi tekete ŋkɛ

28Ma kwa kiɗimte ghena shɛ Yɛsə, heheɓake mbeli kwele kwele va ntsehwelea ŋkɛ kateke nda wəshi ke mbeli. 29Kwa nza ŋkɛ kala wəndə nya nza berete ve teke nda wəshi ŋkɛ ke mbeli, kenza kala nya teke nda nde rafe wəsə mahalegəa Shala ke mbeli we.

Currently Selected:

Matiye 7: BEKDC12

Highlight

Copy