2 Ka Korɛnte 2

1Wa nya ghena nya tarete 'ya kamene nya: kazhɛkwa 'ya se sha gheyɛ, yagha 'ya kamtsehete ŋayɛ zhɛ ta wənəa ŋayɛ we. 2Ma kelə 'ya kabezemte ŋayɛ wənə ne, wa nde teve ɗa zlama keɗema mbeli nyi bezemte nda wənəa nci 'ya wa? 3Vatse rafave ŋayɛ 'ya, ma nda ləma 'ya sha gheyɛ, kezha ɗema 'ya kaheɗe kema va mbeli nyi neghe zlama 'ya va hɛ. Fate teɗepe 'ya: ma kekemave zlama 'ya ne, zlama ya va gheyɛ pɛtɛ perə. 4Ma palepa nya rafave ŋayɛ nya 'ya kaghate ne, le nehwene kwa ntsə ba'a le taze ta mehele 'ya vəa ŋkwa shɛ. Kezha ve ŋayɛ heɗe kema nda menete 'ya kala nya we, ama yitea ɗepe yɛ kala mze ɗe ŋayɛ 'ya.

Kele nde beze ghena seyi te wənə

5Ma kebezemte nda wənə kwete wəndə ke mbeli ne, ke 'ya bezemte ɗa ŋkɛ we, ama ke gheyɛ pɛtɛ bezemte nda ŋkɛ. Mba yɛ kembate mbe te. 6Kaŋa wəndəa shɛ ne, wərə fete nya ndeke nda tsene ta ŋayɛ. 7Vatse tsetsenya gɛ, kelemte nda mə ghena shɛ te wənəa ŋayɛ ɓetekə, gweɗakwete nda mə wənəa ŋkɛ, yagha ŋkɛ kaheɗe kema kwele ma ke berete ta ŋkɛ. 8Vatse səkwə ŋayɛ 'ya yitea ncɛ nda ɗe ta ŋayɛ yɛ ke wəndəa shɛ. 9Ma nda rafave ŋayɛ palepa 'ya ne, kezha newe berete ta ŋayɛ kenza nde kafa ghena nya gezete ŋayɛ 'ya yɛ. 10Ma kekelemte ghena nya bezemte ŋayɛ wəndə yɛ te wənə, nahe 'ya kekelemte perə. Ma kekelemte 'ya te wənəa ɗa perə, nahe 'ya kemenete kezha gheyɛ kwa kema ta Kriste. 11Ma tsagha ne, kateghwete ɓəmə Satan we, kwa nza ŋkɛ nahe gheɓəmə keɗepe yɛ zəzə ta ŋkɛ megela.

Yirə ta Pol mbe Trowas

12Hwa'a 'ya mbe Trowas yitea geze nda Ghena kwatenca nya ganyɛ ta Kriste ke mbeli. Nahe Nde sleke ŋkwa kepelave ɗa hweŋkwa waɗe yitea slene ta ŋkɛ. 13Ama keyirə yirə 'ya kwa begemema 'ya le wəza meyɛ ɓəmə Tite. Vatse slə ɗa 'ya kadzembe Masɛdowane kwa njiŋwakɛ ka Trowas 'ya.

Hərə ŋkwa laka Yɛsə

14Hana ke gheɓəmə sha Shala. Kehɛ kehɛ heka ɓəmə ŋkɛ kadzeghwa mbe hərə ŋkwa ta ŋkɛ, va nya nza gheɓəmə jikə le Kriste. Laka gheɓəmə ne, dzasle ŋkwa va ghena ta Yɛsə kala 'wərdə nya kezəŋwə megela. 15Kaganda ne, kala 'wərdə nya ve nda Kriste ke Shala gheɓəmə. Tsagha nza gheɓəmə sha mbeli nyi keteza ba'a nyi ketembele. 16Sha nyi kezanji ne, zəŋwəa mte ŋkɛ kezha mpə hɛ. Ma sha mbeli nyi kembele mbele ne, zəŋwəa mpi ŋkɛ kezha nza hɛ le mpi. Wa nde menete slene nya kala nya wa? 17Kenza gheɓəmə kala kweci mbeli nyi kemene fəli le ghena ta Shala we, kawəfərə ghena ganyɛ gheɓəmə we. Ghena nya kese va Shala yageze gheɓəmə. Kwa kema ta ŋkɛ geze kaganda gheɓəmə, kala mbeli nyi kemene nda slene ke Kriste.

Currently Selected:

2 Ka Korɛnte 2: BEKDC12

Highlight

Copy