2 Ka Korɛnte 1

Pol kanjiŋwe ŋkwa

1Se va Pol nya kande ghwene ta Yɛsə Kriste laka ɗe ta Shala ba'a se va Timotɛ, wəza meyɛ ɓəmə, ke Jikə ta ka Kriste nya kaŋa Shala mbe Korɛnte ba'a ke pɛtɛa mbelia Shala nyi te hɛɗia Akay pɛtɛ. 2Pa Shala Yiteyɛ ɓəmə ba'a Nde sleke ŋkwa Yɛsə Kriste ndeke ŋayɛ kwelɛŋe ba'a zlaɓa.

Pol katsa nda ŋ'wese ke Shala

3Tsahe ɓəmə Shala, Yitenyɛa Nde sleke ɓəmə Yɛsə Kriste, Yita nde zhɛ heli yitea mbeli, Shala nya kegweɗakwe nda wənə ke mbeli keveci keveci. 4Gheŋkɛ nde kemane ɓəmə mbe pɛtɛa yaka nyi sa gheɓəmə, kezha kemane kweci mbeli nyi kesa yaka shɛ le ghena nya kegweɗakwe ŋkwa nya kemave mə va Shala. 5Kala nya nza yaka ta Kriste kwele kwele kezha gheɓə, tsagha nza gweɗakwe ta wənəa ŋkɛ kwele kwele kezha gheɓəmə. 6Ma kenza n'yɛ kasa yaka ne, nahe ŋkɛ kenza kezha kemave gweɗakwe yɛ ba'a kezha mbele yɛ. Ma kekemave gweɗakwe n'yɛ ne, nahe ŋkɛ kenza kezha gweɗakwe ŋayɛ yitea səwə yaka nyi səwə ghen'yɛ yɛ. 7Kaganda ne, nahe n'yɛ kenza le gezleŋema ghə laka gheyɛ. Ma kwa nza ŋkɛ nahe yɛ kenza mbe yaka ta n'yɛ ne, nahe yɛ kenza mbe gweɗakwe ta wənəa n'yɛ perə.

8Ka kesaka ma, kaɗe n'yɛ kancɛ ŋayɛ ghena nya dzawe nya kemenete n'yɛ geva mbe Azi. Ɗaŋe ɗaŋe dzawea shɛ kənəa ghen'yɛ za ma ke berete ta n'yɛ, bətə tenza mpia n'yɛ, ke ghen'yɛ te vecia shɛ. 9Kala mbeli nyi telə mbeli kampə newe ghəa n'yɛ ghen'yɛ te vecia shɛ. Ma nda menete n'yɛ geva ŋkɛ tsagha ne, kezha ɗema n'yɛ kaɓela ŋa n'yɛ berete, yitea ŋa Shala nya kekele mbeli same kwa kwele le mpi. 10Gheŋkɛ nde mbelete n'yɛ va mtea shɛ vəa ŋkwa shɛ, kaganda, gheŋkɛ nde tembele n'yɛ zhɛkwa ve, mbe veyi zəzə ta n'yɛ n'yɛ katembele n'yɛ ŋkɛ ve zhɛkwa. 11Tsagha tekemane n'yɛ yɛ le səkwə ghə ta ŋayɛ. Ma tsagha ne, katefa səkwə ghə ta mbeli kwele kwele Shala kezha ghen'yɛ, katezhɛre geva səkwə ghəa shɛ kahana nya tsa nda mbeli ke Shala te mbele ta n'yɛ.

Pol kabelewə dzeghwa ta ŋkɛ

12Wa nya wəsə nya fege ghen'yɛ te nya: mehele ta n'yɛ nde ncɛ n'yɛ megela nza ta n'yɛ hwa mbeli te yayata ŋkwa, halama hwa gheyɛ le gwedə ba'a kaganda nya kese va Shala, laka ntsehwelea wəndə ŋelɛ menete ghen'yɛ we, ama laka zlaɓa ta Shala. 13Kwete ghena shɛ mbe palepa ta n'yɛ we, deke ghena nya jaŋga yɛ ba'a nya fate yɛ. Ma zəzə 'ya ne, pɛtɛ tefa ghena nya yɛ, 14kwa nza ŋkɛ nahe yɛ kefave bela ta ghena ta n'yɛ: wərə yɛ kafege le ghen'yɛ tsetsenya kala nya tefege n'yɛ te gheyɛ veci nya tese Yɛsə Kriste.

15Te wəsə nya kala nya nda ɗema 'ya kaghazlənə va lə sha gheyɛ, kezha kemave zlaɓa ta Shala yɛ kakwa bake zhigə, 16nahe 'ya kezəzəte lə sha gheyɛ nda dzeme Masɛdowane 'ya, kwa sebe ta ŋkɛ, katezhɛne geva 'ya kase sha gheyɛ. Ma tsagha ne, katekemane ɗa yɛ kadzembe Zhəwdɛ. 17Ma kemenete 'ya kala nya ne, kala wəndə nya ɗema ghə ve menete 'ya na? Na, kala nya mene mbeli nyi te hɛɗi zəzəte 'ya na? Ma tsagha ne, bake tenza ghena va 'ya, E'e ba'a Ewə. 18Shala nde negha fete yitea 'ya. Kenza ghena nya gezete ŋayɛ 'ya kaE'e ba'a kaEwə we. 19Ma Yɛsə Kriste, Wəzege ta Shala nya ncɛte ŋayɛ ghen'yɛ le Silas ba'a Timotɛ ne, ghena kezhɛne E'e ba'a Ewə ŋkɛ we, ama E'e ŋkɛ nahe. 20Gheŋkɛ ya kaE'e nya keve ɓəmə ghena nya meɗeyi nda Shala ke mbeli vəashi. Laka gheŋkɛ geze nda Amɛn gheɓəmə ke Shala kezha zləvəa ŋkɛ. 21Shala le ghəa ŋkɛ nde ve n'yɛ berete le gheyɛ laka Kriste. Gheŋkɛ nde veyi n'yɛ tekeleke. 22Gheŋkɛ nde rafeyi sləa ŋkɛ te ghen'yɛ ba'a nde viɗikɛ wənəa n'yɛ le Sefəa ŋkɛ kawəsə ganyɛ nya wəmbə n'yɛ ŋkɛ.

23Shala nde negha fete yitea 'ya. Gheŋkɛ nde meha ghwə te 'ya keslate tseŋwə 'ya. Va nya zhɛ ɗa heli yitea gheyɛ nda ɗema 'ya dzembe Korɛnte zhɛkwa. 24Kaɗe n'yɛ kageze ŋayɛ ghena nya teyɛ yɛ le berete we, va nya nza ŋkɛ bake bake dzeve keseve yɛ ta ŋayɛ yɛ, ama kaɗe ghen'yɛ kakemane ŋayɛ nda nza yɛ megela.

Currently Selected:

2 Ka Korɛnte 1: BEKDC12

Highlight

Copy