Lalaḡova 25
25
Pol mwa Doron be vi Vev Lua non Binihiva lalai Tomuai Vevev ata Rom
1Gubwen̄ gaitolu ataguna be Vestas mwa lai tanon tomuai, kea mwa mwalue nin Sisaria vai Jerusalem, 2i aia ira muai tataroi mai ira tomuai non ira Jius ram bevegi Pol gin tenteneana. Ram hudali Vestas be 3vi buluira vi derai Pol rav laia vai Jerusalem, huri be ran tau avoana be rav wehia ḡoro hala. 4Take Vestas mwa bwaliura mwa bevea be, “Pol mwa dogo lol imwa vauvauhi la vanua Sisaria, i inau siboku nav tabagilu mulei vai aia darihou n̄ano. 5Giv mahin̄ai nomiu tomuai rav hae vai Sisaria bul maiau ba bev te avoana be ran habwea vai aluna, mandevai nu lol te ginau hantai vwate.”
6Vestas mwa dogo radu huri gubwen̄ gaivwelu mwa botu han̄vulu radu bul maira vuvuri mwa siv hae vai Sisaria. Haḡe mwa rani kea mwa domahuri lol tanon vevev i mwa hudaligi be rav lai haroroi Pol huri vevev. 7Haḡe mahavana be Pol mwa haroro, ira Jius gabe ram mai nin Jerusalem ram du dalisia ram dau bwatuna ram dau avoan wasi vai aluna, gabe nuhav vavtutu tehe be vi harana. 8Take Pol mwa avo huria sibona mwa bevea be: “Nam hav lol te bahal ginau vwate alun Silo non ira Jius, sage vai alun imwa Tataro sage vai alun Ratahigi ata Rom.”
9Take Vestas mwa doron be ira Jius ramen binihi tavuhainia, i kunia mwa hudali Pol mwa bevea be, “Matu gom samsamwara be goi vano vai Jerusalem huri be nai vevegi nom avoana aia alun ginau kera geki?”
10Pol mwa bevea be, “Noḡu avoana Ratahigi sibona vi vevegia. Nau hav lol te ginau vahala vwate lalai ira Jius, i giḡo gom ilo didininia sibomwa. 11Take be nam lol salil silo, i nam lol ginau hantai be nu dadariha be nai mate la nogonana, nam hav hudaligi tehe be nav rov maragai ninia. Take be mwasigi sigai huri vevegi be rav taua vai aluku, kunia atatu sigai be vi lin̄iau lalainira. Inau nav hudaligi mulei Ratahigi n̄an vi vevegi noḡu avoana.”
12Haḡe Vestas mwa avo vuvuri lalainira non gaitura, mwa bevea be, “Giḡo gom doron be goi van ba ḡita Sisa, i kea nu tavuha n̄ano.”
Pol mwa du Lolmatan Ratahigi Lavoa Akiriba i Benis
13Atagun gubwen̄i rituai be nu nogo huba, Ratahigi Lavoa mai Benis ramuru mai vai Sisaria be raru vi gita Vestas. 14Haḡe ram dogo aia huri gubwen̄i rituai, Vestas mwa bev halan rahun Pol lalai ratahigi lavoa mwa bevea be; “Atatu geki be Vilikis nu taua lol imwa vauvauhi; 15i mahavana be nam bano vai Jerusalem, ira muai tataroi non ira Jius mai ira bwat metua ram dul avoana vai aluna i ram hudaliau be nai vevegia. 16Take nam bev luae lalainira be, ‘Mwa hav vora te alen̄amai ata Rom be gav lin̄ atatu vi vano n̄an kunia la limara be ram dul avoana vai aluna. Muana mwa du be vi tu lolmatan non ivwalu, i vi lai mahavana lalainia be vi lai non avoana kun nora avoana. 17I mahavana be ram mai teti nam lol rovoga vilvilehi maragai, i mwa rani nam domahuri lol tanon ḡoḡoana i nam hudaligi be rav lai atatu gea vi haroro. 18Haḡe non ivwalu ram du amare, take ram hav tul te avoana vai aluna huri vahalan hantai vwate be inau nam binihia be si vora kunia.’ 19Take avoana ram avo aluna huria n̄an be Pol nu vigaigai maira huri nora binihimwasigi alun God, i huri atatu be Jisas, gabe nu mate, take Pol mwa bevea be kea nu rahu. 20Nam hav ilo te maragai halana n̄an haḡea huri ginau geki, i bwatuna gea nam hudali Pol be kea mwa samsamwara huria be vi vano vai Jerusalem huri be nan vevegi non avoana aia alun ginau kera geki. 21Take Pol mwa hudaligi mulei be ratahigi n̄an vi vevegi non avoana i kea vi togo aten gitaḡoro. Haḡe bwatuna gea nam dau avoana be vi gitan ḡoro vaivotu be nav horae huri Ratahigi Lavoa.”
22Haḡe Akiriba mwa bevea lalai Vestas be, “Nam doron be nav roron̄tai wani geki siboku.”
Haḡe Vestas mwa bwaliua be, “Gov roron̄tainia vaigogo.”
23Haḡe mwa rani, Ratahigi Lavoa Akiriba mai Benis ramuru mai vai lol ute be raru men roron̄tai avoana non atatu aia. Haḡe ira tomuai non ira atatun bwaloana, i ira atat lalavoa rituai aia ram lol samsamwarai Ratahigi lavoa hurin silon vanuara. Haḡe Vestas mwa bevea lalai non atatu be rav lai Pol vi haroro. 24Haḡe Vestas mwa bevea be. “Ratahigi Lavoa Akiriba maira duluai be ram dogo teti uhu gaha mai gida: Gin gita wani geki gabe ira Jius duluai gabe ram du teti mai Jerusalem ran tau avoana huria lalaiau. Kera duluai ram haharigi i ram bato amare ram bevea be, sihav mom dogo tehe take vi mate. 25Take nam hav habwe te ginau hantai vwate be nu lolia, huria be vi vevegi bamatea aluna. I mahavana be kea sibona mwa hudaligi mulei be Ratahigi Lavoa n̄an vi vevegia, i nam binihia be nav horae. 26Take nasav vev te dum avoana vwate be nu dadariha aluna sa non lalaḡova lalai Ratahigi Lavoa. Haḡe bwatuna gea nam laia vai teti abemiu i liu hage giḡo Ratahigi Lavoa Akiriba! huri be ataguna be gov tau vuvuri non avoana ta ginau abena be nav ravae. 27Huri be nam ḡitae be nu vahala lalaiau huri be namen hora atatu vwate vai lol imwa vauvauhi vuroi kunia be avoan melmelo vwate sigai huria be vi vevegia.”
Currently Selected:
Lalaḡova 25: HNB
Highlight
Share
Compare
Copy
Want to have your highlights saved across all your devices? Sign up or sign in
Bible Society of the South Pacific
