Lalaḡova 24
24
Ata Israel ram Bevegi Pol
1Haḡe atagun gubwen̄ gailima Muai Tataroi Ananias mwa bano vai Sisaria mai ira bwatmetua rituai mai Ratahigin silo ihana Tetalas. Kera geki ram dau nora avoana vai alun Pol. 2Haḡe mwa uloi Pol vai hae, i Tetalas mwa dau non avoana vai aluna, kun geki be: “Ratahigi giḡo lavoa mwasigi. Bwatuna be alen̄amwa be gom domuai kamai nu tavuha maragai, vanua vanuamai mwa dogo tamwata tuai huba. I gom bavtutui alen̄a ivusi huba lol vanua geki, huri be men lol alen̄amai gim davuha maragai. 3I gam ron̄ mwandavuha vataha mahavana huri ginau gea, i gam bev nomai avoan avkari gaivua maragai lalainigo huria. 4Inau nam hav doron tehe be nav lol ḡoro maragainigo, take nam hudalinigo be gov hagav kamai, i gov tabe nomai avoana tiri gea. 5Kamai gan habwea huba be wani geki atat hantai vwate, i kea haḡea bwatun vahalana ivusi. I mwa la mwa lol vigaigaiana lol vanua ivusi Israel. I kea tomuai huri vatugigi taltale vwate alolomai be ram huri ata Nasaret gea. 6Kea nu lol ron̄oe be men lol bibili imwan God, i gam haḡo batugehia. 7-8Be gov hudali wani geki, i giḡo sibomwa gov siv iloe ninia sibona huri havanau be gam bevegia huria.” 9Haḡe ira Jius ram bultai leora alun avoana geki be mwasigi.
Pol mwa Bwaliu Avoana geki Lolmatan Vilikis
10Haḡe tomuai vevev mwa dai ware Pol be vi avo, i Pol mwa bevea be, “Inau nam iloe siboku be giḡo gom bevegi lol ute geki huri taul ivusi maragai, i nam samsamwara be nav lai noḡu avoana lalainigo. 11Gubwen̄i mwa siv vora han̄vulu domwan gairua kadogaha ataguna be nan hae vai Jerusalem huri tataroi. 12Ira Jius ran hav habweau tehe be rai vigaigai mai atatu vwate, sage ran hav habweau tehe be nav lol loḡeloḡe sinombu lol imwa tataro sage lol ute vwate lol bwatutun vanua. 13Rau hav lai te mwasigi vwate lalainigo huri vahalana be nan lolia. 14Nam bev mwasigi geki lalainigo: Inau nam ḡogonai God non ira sibida la Hala gea be ram bevea be nu vahala. Take inau nam binihimwasigi ginau duluai be nu ravae lol Silo non Moses i lol buka non ira atatun vev sera. 15Nam dau noḡu doronhohov alun God be nav gita ginau n̄an haḡe gea be kera ram binihia. Geki ginau haḡea be God vi lolia be vi lol atatu duluai rav rahu ira hantai mai ira tavuha. 16Nam lol ron̄oe vataha mahavana be noḡu binihiva vi vavtutu mai God i atatu.”
17“Ataguna be nam dogo dagai nin Jerusalem huri taulu rituai, nam bano mulei aia be namen lai homu rituai lalai noḡu sinombu i be namen tataroi. 18Kera ram habweau lol imwa tataro lol mahavana haḡea geki be nam lol hara harai tataro huri lol melmeloi. I vatugin sinombu sigai bul maiau aia i silo daha mulei sigai. 19Take ira Jius rituai be rau mwalue nin vanua Esia rau togo aia; kera haḡe gea be mwa du be rav mai sibora abemwa be mandevai ginau te abena be rai vevea huriau. 20Sage atatu be ram du teti kadogaha rai vev te dum havanau be nan vahala aluna mahavana be nau tu lolmatan Kansel. 21Liu haḡe huri ginau gaituvwa be nan av lua mahavana be nau tu lol matara: garigi giḡo gom lol ron̄oau bwatuna be nam binihimwasigi be atatu vi mate ta vi rahu mulei.”
22Vilikis geki atatu be mwa ilo tavuhai Halan ginau duluai alun halan Ratahigi, i mwa ḡoro gatavan imwan harahara alun avoana gea mahavana ḡoḡoana sigai radu. Haḡe mwa bevea lalainira be, “Mahavana be Lisias tomuai vevev vi visirai, inau siboku nai vev havanau alun ginau geki.” 23Kea mwa bevea lalai ira tomuai be ram ḡitaḡoro Pol be rav gita goro tavuhainia, i rav lai dum mahin̄ana lalainia be kera gabe non buluana rav lai te dum havanau lalainia be mwa doroni.
Pol mwa Du lol Matan Vilikis mai Drusila
24Gubwen̄ rituai ataguna Vilikis mwa mai mai tasalana Drusila kea vavine ata Jiu. Kea mwa hora huri Pol i mwa roron̄tainia be mwa bev non binihimwasigi garagusi alun Kraes Jisas. 25Take mahavana be Pol mwa bev rahurahuinia, mwa avo alun haltavuha, i halan tomuai, i gubwen̄in maiana huri vevegi, kunia Vilikis mwa matagu mwa bevea be, “Nu tavuha be gov mwalue haḡea kadogaha. I nav siv uloi te muleinigo be vi dumwi.” 26Haḡe lol mahavana gea kea mwa binihi ron̄oe be Pol vi lai te homu lalainia; i bwatuna gea mwa hudali Pol vataha mahavana be vi mai abena ba avo maia.
27Haḡe taulu gairua mwa nogo mahavana be Vilikis mwa nogoi doren non taulu lol tanon Tomuai vevev, kea mwa dau Pol mwa do lol imwa vauvauhi. Bwatuna be mwa doron be men lol ira Jius be ramen ron̄ mwa davuha ginia. I kadogaha Posias mai Vestas ramuru lai tanona.
Currently Selected:
Lalaḡova 24: HNB
Highlight
Share
Compare
Copy
Want to have your highlights saved across all your devices? Sign up or sign in
Bible Society of the South Pacific
