Tạitos 2
2
Igey ịtughemi
1Kụ ọlo nạ ạmoogh ọtughemi ịpe ẹḅophan bọ rꞌigey ịtughemi phọ. 2Ḅẹni ikumoor awe phọ mọ bịdi ọmoogh eeḅi ẹzo, ọmoogh olegheri ịyaar, ooko siloor ạbidi, ọmoogh ogey ọkuakua omeeraam rꞌẹphomoghian rꞌọkparam. 3Tụugh igina phọ ịphen phọ kẹn kụ ạḅeni ikumoor ạnmariir phọ mọ bịdi ọrol dọl phọ ạḍiphe ẹkpianaan bọ dị ạnmariir aruukuan kọrol. Bịdi kụ́pue ghan ḍien oye, ḅịle kẹn kúḍighi rẹbene amiim. Bịdi ọtughemi ghan ịpe ẹnighe bọ, 4ọbo arisina phọ ọtuughaany bịdi ọphomoghian burulhom mọ rꞌạnmuny phọ ạbidi, 5ooko ghan siloor ạbidi, ọmoogh ọser-sẹr ologhi, oḍighi bugey ạnmariir ilom, dị kosooromi ghan siloor esi aburulhom ạbidi, ọbo oye kạgba ghan bọ ịkaraph ạḅam ẹmhu ọghaaph phọ Ẹnaan!
6Tụugh igina phọ ịphen phọ kẹn kụ ạḅeni ạkpaariom ugheel ạnmuny phọ mọ bịdi ooko ghan loor ạbidi. 7Nạ rꞌaloor ạna, esi oomo areten ḍighi ni oye dị ạbunon awe kọtuughaany iiḅi iiḍighi phọ ạna. Kạ́amo ghan ọghaaph. Gbononomi ghan ạḅile ạmanami ịyaar esi ịtughemi phọ. 8Kạaph ghan igey ikpo ọnhu dị kọ́ḍagha, ọbo umugholoor asiph bụmulogh-ḍien phọ ạna, loor esi dị bịdi ụ́moogh ịkaraph ịlo ayira, dị kọkaaph.
9Ḅẹni rẹbene phọ mọ bịdi osooromi ghan siloor ọngo bụrude-otu phọ ạbidi, ọḅile oḍighi ghan ịlo kẹḅeeraan bịdi. Bịdi kụ́gbagharan ghan ịlo ọḅeni bịdi, 10ḅịle kẹn ịsum kụ́sum ghan. Oḍeenaan ghan ghụn mọ bụno abugey awe ni dị ọkpe ni oḍuom ologhi, ọbo oomo phọ ịpe bịdi koḍighi bọ ẹlogh ọman ịtughemi Ẹnaan Ọpelia phọ ayira.
11Ịyaar phọ eḍighi bọ, Ẹnaan megananami ooḅi ọghor phọ ọdi ọphelom oomo awe. 12Ọdi rụtughemi ghan iyira mọ ọwile dọl dị Ẹnaan úlegheri rꞌạruuphua aḅirini phọ, ọrol sịen aḅirini phọ dọl osereghian, ooko loor ayira. Oseleman, olegheri Ẹnaan, 13kụ okoriom ghan ḍio ọḅaal ologhi phọ ạḍiphe Egbogh Ẹnaan phọ rꞌạJizos Kraist Ọpelia phọ ayira kọpam bọ eegu phọ ạbidi omitiom oganana, ịdipho yira oḍuom bọ ologhi phọ. 14#Ạsuo 130.8; Ẹḍua 19.5; Dut 4.20; 7.6; 14.2; 1 Pit 2.9Ọdi ạsighe loor ọdi aḍighinom ịyaar aghuḍum ọtagharanam ayira esi oomo ịkaraph, rꞌowophom ayira ọḅaalami, mọ oḍighi bụo ọno bịn, ọmoogh oophugh oḍighinom ghan iiḅi iiḍighi.
15Tụghemi ghan rạraar phọ ịphen. Sịghe oomo ịikpo ịtooghi phọ ạna kụ ạkparamiom ghan iloghi awe phọ, ạḅile ạḅaaghiom ghan bụphe rọnaghan bọ ịpe nạ rạkaaph bọ. Rꞌoniin ọnyo ạbidi nyịna kúpogh usooromi.
Currently Selected:
Tạitos 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
