Tạitos 1
1
1Mị ạPol ọokpaany phọ Ẹnaan rꞌotelhedom mọ ạJizos Kraist kụ rạge ḍịnya phọ ạḍien. Ẹnaan kụ ịsaḅar ịmi ọghi ọlhoghonaan ạḍighaagh ọkparami ghan omeeraam ạbuphe ọdi mạsaḅar bọ oḍighi aweye phọ ọdi, ọbo bịdi olegheri igey ịtughemi ịpe ẹḅophan bọ ruukuan phọ rꞌịtughemi ạsiosi phọ ayira, 2ọḅile ọmoogh oḍuom ologhi ịlo aghuḍum kꞌagee-pọ phọ. Ẹnaan phọ ọkpe kẹ́gba ghan bọ iguanaan ni kꞌẹḅel egbiom mọ ọngo ayira ghuḍum mọ ạkuen, 3kụ emunughan bọ mem mọ, ọdi agananami ni sịphe adom mọ ọdi. Ẹnaan Ọpelia phọ ayira mẹḅogh dom mọ ạḍien ẹlogh ḍịghaagh ạmi kụ mị ạdaph ịtooghi phọ ọdi kụ ragbeelom ghan bọ.
4 #
2 Kọr 8.23; Gal 2.3; 2 Tim 4.10 Mị rạge ḍịnya phọ ạḍien karuomaan nyịna ạTaitos, ọkar ọony phọ ạmi esi omeeraam mọ yira ọḅophoghan bọ ọmoogh.
Ạḍiseph rꞌẹepho kꞌẸnaan Ọde phọ rꞌạJizos Kraist Ọpelia phọ ayira ẹrolonaan nyịna!
Oḍighi phọ ạTaitos ẹpe Krit
5Mị ụwile nyịna ẹpe Krit, ọbo nạ akori aselemi rạraar phọ ịpe ẹkpe bọ oselemi phọ, ạḅile ạmaaghi ikumoor awe ạsiosi aseere tọrobo ẹmha. Tụutughian ịpe mị ạḅeni bọ nyịna, 6#1 Tim 3.2-7mọ ẹkpe ni dị okumoor oye ạsiosi kaḍighi oye dị aseleman, ḅịle kẹn aphin nyoniin ạnir bịn. Kụ ạnmuny phọ ọdi omeeraam ni Ẹnaan, kụ́moogh rọozo dị kokol ghan bịdi mọ ạnmuny oḅom ẹmhu. 7Loor esi dị ọdi kụ rapogh bọ bụo iiḍighi phọ Ẹnaan, opoghom ạbuo ạsiosi phọ kụ́moogh ḍịpioman. Kúḍighi oye iituma rꞌekpom rꞌigbagbaar rꞌekpooko ikpoki, ḅịle rꞌọoko miim. 8Aḍighi ni oye dị aghuraam we, ạḅile ạphomoghian ịpe eru bọ igey! Aru ni oye dị arue ni raako loor, aaleeny ni esi oḍighi phọ ọdi! Aḍighi ni oye aruukuan, dị rạpamaghan ghan loor ọdi! 9Ọdi ạpham ni dom mọ urom bọ iyira ḍịphe ẹkpe bọ ni oḍuom ologhi phọ ạkparami, ọbo ọdi arue ạsighe igey ịtughemi phọ aromoghiom bụnon awe, ạḅile kẹn arue ạkpar apu bụphe rọogbaghanaan bọ ịpe ọdi ạtughemi bọ.
10Ịbadi ạbuo ịgbagharan odi ni, dị ọsighe eepua ọghaaph elegheri ịyaar rookeleghiom bụnon. Ịphen phọ ẹkar nụun edi ẹmhu ạbuphe mọwile bọ omeeraam ạbuo aJu phọ okiton oḍighi bụo ạsiosi. 11Ẹkpe ni omirighan lọ bịdi kosoph oḍigh ọghaaph phọ ạbidi okpere, ịdi eḍighi bọ tọrobo ọto kꞌawe dị ịtughemi ọkpe phọ eḍigh, redughe yogh ghan ni omeeraam oomo ạbulo odi sịphe otu phọ. Umugholoor odi ni dị bịdi ọtuan ikpoki kụ rọtughemi ghan ịphen phọ. 12Oniin ọnyo aKrit rꞌaloor ọdi, dị aḍighi ni oyil ịmiin, kụ ạḅem ni mọ, “Ạbuo aKrit rọgba ghan ọkpe oomo amem. Bịdi ilhom ịnam, rꞌawe ekpooko rꞌẹgbogholeer.” 13Ịpe ọdi ạḅem bọ agey ni. Loor esi ịduon phọ, ḅạam ni bụtughemia ọkpe phọ agey, ọbo bịdi ọmoogh omeeraam dị amoon, 14ọkporion rạghaagh sidum ạbuo aJu phọ rꞌịtooghi awe dị moghel igey phọ. 15Oomo ạraraar ẹserere ni ghisigh ạbuphe ọserere bọ. Ịyaar lọ rẹserere ghan esi ạbuphe mọopuan bọ rꞌạbuo emeeraam mọ ílho, ịdi eḍighi bọ iloghi phọ rꞌịitughian phọ ạbidi mẹepuan yogh. 16Bịdi rọḅem ghan mọ bụno olegheri ni Ẹnaan, kụ eḍighinom ịyaar phọ ạbidi íḍeenaan. Bịdi awe dị moghel, ọḅile ọḅaar ẹmhu, dị rꞌeniin egey ịyaar lọ kotue oḍighi ílho mun.
Currently Selected:
Tạitos 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
