Tạitos 3
3
Ạroozo dị ẹkpianaan weye Ẹnaan
1Kịom ologhi we phọ ạna mọ bịdi osooromi ghan loor esi ạbudaam rꞌạbuo ịtooghi, ọnaghanan ghan bịdi, kụ ọḅile ookolobian ghan oḍighi igey tọrobo areten. 2Ḅẹni bịdi mọ kụ́kaaphaan ghan oye ịkaraph, ịtolom ghan ẹepho rꞌẹphomoghian, kụ ọḅile oḍeenaan ghan ọbolobolo ologhi esi oomo awe, 3ịdi eḍighi bọ mem dị eten yira rꞌaloor ayira ụrol ghan ni dọl elegheri ịyaar rꞌẹnaghanan rꞌẹkaraph eḍighinom ịyaar. Yira uḍighi ni rẹbene ọngo ịkaraph ạruuphua rꞌẹedugha kịrokiro. Yira uphiemi ni ghuḍum mọ ayira ọrol ghan dọl ịghughian rꞌiloghi ẹḍim. Bụnon awe ụlogh ni iyira ḍien kụ yira ụlogh aani ni bịdi. 4Kụ mem mọ Ẹnaan Ọpelia phọ ayira egananami bọ ọnma ighirigiir rꞌẹphomoghian phọ ọdi, ọdi ụphel li iyira. 5Ọ́tuan iiḅi iiḍighi dị yira rꞌaloor oḍighi yogh, ạtuan ghụn ọnma ighirigiir phọ ọdi kụ ụphel bọ iyira, loor esi ạmuum mọ uwur bọ iyira ootolom ịkaraph phọ, rꞌemoom ẹmaram rꞌakumoom aghuḍum mọ Uwaloor Iigbia phọ rụngo ghan bọ iyira. 6Ẹnaan ighol ẹmhu ạJizos Kraist Ọpelia phọ ayira, kụ imuzeḍinaan iyira ooḅi Uwaloor Iigbia phọ, 7ọbo ẹtuan ọnma ighirigiir phọ ọdi ẹsighe mọ yira awe aruukuan ni, mọ ophin aani bin aghuḍum kꞌagee-pọ phọ yira oḍuom bọ ologhi phọ. 8Ọphon phọ ogey ọghaaph ni.
Mị rạwa ni mọ kạaph ni rạraar phọ ịphen ạkpaariom, pịdi bụphe omeeraam bọ Ẹnaan ozuumaam iiḅi iiḍighi phọ oḍighi ghan. Ịphen phọ ẹnighe ni, ẹḅile kẹn ni ẹmoogh ịyaar oḍighinom esi awe. 9Kụ ọlo kạ́logh ḍịghaagh ạna esi ịnonuan elologhi, rꞌọodoony oḍigh ạburude ạburude, ịruonu, rꞌịigbaghanaan ịlo Ologh phọ aMozis. Ịphen phọ oopho ni bịn, sụo ị́moogh. 10Pụr ghan ni rụru amuneni ịyal amem we lọ rọkom ghan ịlo ọgbaragbarami awe phọ, kụ agbi omutonaan ạbidi. 11Nạ alegheri ni mọ ọdo phọ awe phọ ạbuen mọphuughi, kụ ịkaraph phọ ạbidi ẹgba ni emitiom mọ bịdi mọpioghom ni.
Oroma okureriom
12 #
Iiḍ 20.4; Ẹfe 6.21, 22; Kọl 4.7, 8; 2 Tim 4.12 Mem lọ mị arom Ạtemas mꞌạTikikos oru ọteeny ạna, ụ́bile ghan oru ạNikopolis ọteeny ạmi, ịdi eḍighi bọ mị maguan ọrol ẹpe rụnwanyu unu phọ. 13#Iiḍ 18.24; 1 Kọr 16.12Ụ́bile ghan ọloghonaan ạḍighaagh Zenas ọgbaam iilogh phọ, rꞌẠpolos, ịlo bịdi komiigh erelhe phọ ạbidi, ạḅile aḍighi ịdi ịyaar bịdi kékuom. 14Tụghemi we phọ ayira mọ ọmaar ọkuom mem mọ ạbidi oḍighi yogh ghan iiḅi iiḍighi, pịdi ọloghonaan ghan ḍịghaagh bụlo ẹkaraghi ekuom. Bịdi kụ́tol ḍighiil ạdol.
15Oomo phọ ạbuphe rꞌạmi odi bọ ẹphen mopuru nyịna. Upurunaan iyoor iiḅi asiya phọ ayira esi omeeraam mọ.
Ooḅi ọghor phọ kꞌẸnaan ịrolonaan inyina!
Currently Selected:
Tạitos 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
