Ạsuor 77
77
Ịidereghi mem ịiḅaghami
1Mị amoghi amitiom egbodo Ẹnaan;
mị amoghi amitiom, kụ ọdi ụnaghanan ịmi.
2Ịbadi amem ịiḅaghami mị ạaḅereghi aphoghomiom Ọmoogh-we phọ;
oomo aḍughul mị aphoophe rạghaagh ạmi ạghiom ạnyu esi ịiḅereghi,
kụ ọlo mị ụ́miin ịidereghi.
3Mem dị mị ạatughian Ẹnaan, mị ạḅiphaan;
mem dị mị azumeri ẹmhu esi ịiḅereghi, oḅio ịmi úlho mun.
4Ọdi aḍighi ịdi mị ạrol ẹ́naani oomo aḍughul phọ;
mịiḅaghami ịmi iboom dị mị útue ụ́ḅa.
5Mị ạatughian ịlo ariiḍio ageedi
ạḅile ạatughian sịa phọ ịpe meten bọ.
6Mị ạrol ḍughul phọ iboom ịitughian;
mị azumeri ẹmhu, kụ ịphen kụ ịdi mị apuruan loor ạmi:
7“Ọmoogh-we phọ kughel li iyira kꞌagee-pọ?
Ọdi kạ́ḅatan mun ekpeḍien úphogh iyira ḍụghum?
8Ọdi mạwile ọphomoghian ayira ḍụghum?
Oguanaan phọ ọdi ólho mun ḍụghum?
9Ẹnaan mewula ọnma ighirigiir phọ ḍụghum?
Ophin ologhi mạsighe esi ọnma ighirigiir phọ ọdi ḍụghum?”
10Kụ mị ạḅem, “Ịyaar dị ephin esi ạmi iboom ịduon —
mọ Ẹnaan ị́moogh mun ịikpo.”
11Mị kạatughian ni igbogh iiḍighi phọ ạna, Ọmoogh-we;
mị kạatughian ni ịiḍaany phọ nạ aḍighi bọ mem mọ meten bọ.
12Mị kạatughian ni ịlo oomo ịpe nạ maḍighi bọ;
mị kazumeri ẹmhu kụ ạatughian oomo igbogh iiḍighi phọ ạna.
13Tọrobo ịyaar lọ nạ aḍighi, Ẹnaan, ẹḅaram iigbia.
Ẹkaaneen ịyaar ílho dị eeleeny nyịna.
14Nạ kụ Ẹnaan phọ reḍighi yogh ghan bọ ịiḍaany;
nạ aḍeenaan igbogh phọ ạna igbo areelhe phọ.
15Ịikpo phọ ạna kụ ẹdi nạ ạphelom we phọ ạna,
nmụny ạnmuny ạJekob rꞌạJosef.
16Mem dị ạrumuum mọ ẹmiin nyịna, Ẹnaan,
aruugu asiph bịdi, kụ ẹeḅaghami sigher phọ.
17Kụ okuaḍio phọ aaku ọlophia,
ọomaany ạraph ẹpe okuaḍio phọ,
kụ aḍio phọ ẹmepheghian oomo arikpisi phọ.
18Ẹḍogh ọomaany phọ ạna emite,
kụ ọmepheghian phọ asoor aḅirini phọ ịdipho ọtozi;
ade phọ ekpereghaan kụ ephiigha.
19Nạ arelhe ạnyu ooloogh phọ;
nạ ạḅeeny ọphiiny phọ ạkel bọ,
kụ rạda aruwol ạna ụ́miin.
20Nạ aḍiemiom we ạna ịdipho okoriom iyool-ịga,
kụ aMozis rꞌEeron kụ ophogh ghan.
Currently Selected:
Ạsuor 77: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
