Ạsuor 78
78
Ẹnaan rꞌawe ọdi
1Ịnaghan, we ạmi, ịtughemi phọ ạmi,
ẹḅile eler rụru ịlo mị ạḅem.
2 #
Mat 13.35
Mị kạḅa ikpo ọnhu olegheri ịyaar
kụ ạkaaphom ịikia ạraraar ịlo aḍiodiidi,
3rạraar dị yira mọnaghan ọḅile olegheri,
rạraar dị ạburude ayira ụḅeni iyira.
4Yira kọ́booghinaan nmụny ayira;
yira kọḅeni oghiil phọ ọpo ratu bọ
ịlo ịikpo Ọmoogh-we phọ rꞌigbogh iiḍighi phọ ọdi,
rạraar ịiḍaany phọ ọdi maḍighi bọ.
5Ọdi ạlogh iilogh ạngo we phọ Ịzirel
kụ ạtooghi ạḅeni nmụny ạnmuny ạJekob.
Ọdi aromoghiom bụrude ạburude ayira
mọ ọtuugha iilogh phọ ọno ọḅeni nmụny ạbidi,
6ẹrol dị oghiil phọ ọpo ratu bọ ọtuugha
kụ ọḅile ọḅeni nmụny bụo ạbidi.
7Ịduon phọ kẹn kụ ẹdi bịdi kọkpasi emooph ạbidi esi Ẹnaan
bịn kóbula ịpe ọdi aḍighi bọ,
omuton ọnaghanan ghan ịto phọ ọdi oomo amem.
8Bịdi kọ́kigh bụrude ạburude ạbidi,
we ọḅaar ẹmhu rꞌẹ́naghanan,
we dị omeeraam mọ ạbidi esi Ẹnaan ụ́meera kikiki
kụ úmeeraam nyọdi bịninin.
9Awe eghun phọ Ifraim, ụphamagh sịkumugh rꞌịkpina,
kụ oghiil osumughu ḍio ẹgham mọ.
10Bịdi úuko ịyo phọ oghiran bọ rꞌẸnaan;
bịdi úmeera ọnaghanan iilogh phọ ọdi.
11Bịdi owula ịpe ọdi maḍighi bọ,
ịiḍaany phọ bịdi ọmiin bọ dị ọdi aḍighi.
12 #
Ẹḍua 7.8—12.32
Ạburude ạburude ạbidi ọrol ropogh ghan kụ Ẹnaan eḍighi ghan ịiḍaany
sịphe ẹyaghaghaany eelhe phọ aZoan ẹpe ade phọ Ijipt.
13 #
Ẹḍua 14.21, 22 Ọdi adi ọphiiny phọ kụ aḍighi ịdi ekeeny rꞌelhiom ẹmeera
mụdi iikpe tụtu bịdi ọḅeeny ophun.
14 #
Ẹḍua 13.21, 22 Mem ootaany ọdi ạrol ologhi ọotu kụ aḍiemiom,
kụ ḍughul ọdi ạrol loor anem ạnian.
15Ọdi apologh sighiigh sịphe ade ịisaar phọ
kụ ạngo bịdi mụum dị ạrol ologhi.
16 #
Ẹḍua 17.1-7; Igb 20.2-13 Ọdi aḍighi ịdi okol ạmuum amite sịphe asighiigh phọ
kụ ạmuum akilogh sịphe phọ dịadi ọphiiny.
17Bịdi ụḅile ni oḍighi ghan ịkaraph esi Ẹnaan,
kụ sịphe ade ịisaar phọ bịdi ụḅaar ri ẹmhu esi Ọkaraghi Ogbogh phọ.
18 #
Ẹḍua 16.2-15; Igb 11.4-23, 31-35 Bịdi olegheri kụ ọḅem ghan mọ Ẹnaan aḍeenaan oye dị ọdi aru
esi ịlom eḍien dị bịdi ọwa ole.
19Bịdi ọghaaph ghan ịkaraph ịlo Ẹnaan kụ ọḅem:
“Ẹnaan ketue ni emitiom eḍien sịen ade ịisaar phọ ḍụghum?
20Agey ni ọdi akar ri ḍighiigh
kụ ạmuum akilogh ịdipho okiilia,
kụ ọdi katue ni ụngo iyira ạbred olhe
ạḅile ạngo we ọdi iphulupul ịnam ạa ḍụghum?”
21Kụ iḍighi kụ ephin ologhi Ọmoogh-we phọ mem dị ọdi ạnaghan bọ;
ọdi azuom we phọ ọdi nịan,
ḅịle kẹn ophin ologhi phọ ọdi esi ạbidi ạbugh,
22loor esi dị bịdi ụ́moogh omeeraam esi ọdi
ḅịle úmeeraam mọ ọdi katue ni ạpel bụno.
23Kụ ọlo ọdi ạḅaanaan ni okuaḍio phọ
kụ ạto mọ arughuugh phọ eghunyonu.
24 #
Jọn 6.31
Ọdi ạngo bịdi eḍien olhe,
mạna dị ạḍua kꞌạke kụ aru.
25Ịduon phọ bịdi ule eḍien ạruukpaany kꞌạke,
kụ Ẹnaan ẹngo bịdi oomo ịlo bịdi ọwa.
26Ọdi ạḅile aḍighi ịdi ookuugh emitenom erumuḍio phọ aghugh,
kụ esi ịikpo phọ ọdi, ọdi aphighemi ookuugh esoorom ạḍighaagh phọ.
27Ịnun dị eḍiza ịdipho ịisaar ọgbal ọphiiny,
ọdi ạngo kẹn ni we phọ ọdi.
28Ịgharaghu ogbo esi ạdol phọ ạbidi
ekoom rugbogo phọ.
29Kụ awe phọ olhe kụ ẹpherogh;
Ẹnaan ịngo bịdi ịpe bịdi ọwa bọ.
30Kụ ọlo ẹephua phọ ạbidi ị́gbaanyan
kụ olhe ghan bịn rọkiom,
31mem dị Ẹnaan ẹghagham bịdi ologhi
kụ ạze ikakara awe ạbidi,
bugey ugheel ạnmuny phọ Ịzirel.
32Ghạlamo esi oomo phọ ịphen phọ ni awe phọ ụḅile ni oḍighi ghan ịkaraph;
ghạlamo esi ịiḍaany phọ ọdi amiteghom bọ, bịdi nyọdi úmeeraam.
33Kụ ọdi akureri riiḍio ạbidi ịdipho aḍiphooghu
ḅịle kẹn asighuḍum ạbidi ekureriom ekperenom ịiḅaghami.
34Tọrobo amem lọ ọdi ạze buniin ạbidi,
bụeri phọ uru ghan ni esi ọdi,
bịdi okiton esi ịkaraph kụ ọoḅereghi ọkparami.
35Bịdi ụutughian mọ Ẹnaan kụ ọpelia ạbuno,
mọ Ọkaraghi Egbogh Ẹnaan phọ eḅegh bụno;
36kụ ọlo ikpo ọnhu ạbidi iḍighi ọkpe-ọkpe bịn;
ịyaar ị́tol dị bịdi ọghaaph dị eru igey.
37 #
Iiḍ 8.21
Bịdi úmeelom nyọdi;
bịdi ụ́pamanam ịyo phọ bịdi oghiran bọ rꞌọdi.
38Kụ ọlo Ẹnaan ịnma ni ighirigiir we phọ ọdi.
Ọdi ạsar ịkaraph ạbidi ạwilenaan
kụ óphiemi mun bịdi.
Ịbadi amem ọdi ạpham ghan ophin ologhi aḅoronom
kụ ọ́kparami ghan ghẹlhe phọ ọdi.
39Ọdi ạatughian ghan mọ bịdi oopho iphulupul,
ịdipho ookuugh dị raten ghan bịn kụ ráḅula ghan.
40Ịbadi amem bịdi ụḅaar ri ẹmhu esi ọdi sịphe ade ịisaar phọ;
ịbadi amem bịdi uḍighi ni nyọdi ịlo ophin ologhi.
41Amem etum mem bịdi ụwa ghan ọmiin oye dị Ẹnaan aru,
kụ oruomaan ḍiphin Oye Aghuḍuul phọ Ịzirel.
42Bịdi uwula iboom ịikpo phọ ọdi
rꞌaḍio phọ ọdi ạphel bọ bịdi ạsighe esi ạbumulogh-ḍien phọ ạbidi,
43ạḅile aḍighi igbogh iiḍighi rꞌịiḍaany phọ ọdi
sịphe ẹyaghaghaany eelhe phọ aZoan ẹpe Ijipt.
44 #
Ẹḍua 7.17-21
Ọdi akiton mụum ạriphiiny phọ atene ịḅaal
kụ awe Ijipt ụ́moogh mun mụum ọphughol.
45 #
Ẹḍua 8.20-24;
Ẹḍua 8.1-6
Ọdi ạlogh ịphi sịphe ogbo ạbidi dị ẹmiine bịdi,
rꞌịḅal dị ẹphue de phọ ạbidi.
46 #
Ẹḍua 10.12-15
Ọdi arom igurubia eleeghi ibugha ạbidi,
ẹḅile ephiemi iizo ạbidi.
47 #
Ẹḍua 9.22-25
Ọdi aphiemiom ireeny amiim mọ ạbidi iiḅoghoḍi ibikpo,
ọdi aḍighi ịdi ẹephoom ẹphueghi ireeny ạfig ạbidi.
48Ọdi ạziom sịnam ạbidi iiḅoghoḍi ibikpo,
kụ ḍita ịga phọ ạziom ọomaany.
49Ọdi aseenaan bịdi iboom ịiḅaghami,
agananami oboom ophin ologhi phọ ọdi
dị aru ịdipho ọokpaany aḍuugh.
50Ọdi ọ́phamaghan ophin ologhi phọ ọdi
ḅịle mꞌọ́moogh igbiririph
kụ ạziom bịdi rꞌẹkaraph ẹzegh.
51 #
Ẹḍua 12.29
Ọdi ạze ịkpana ạnmuny oomo arughunotu Ijipt.
52 #
Ẹḍua 13.17-22
Kụ ọdi aḍiemiom we phọ ọdi ạḍuanam ịdipho opoghom iyool-ịga,
kụ ạaḅaki bịdi ạḅeenyom ẹdala phọ.
53 #
Ẹḍua 14.26-28
Ọdi arelhiom ni bịdi dị ịyaar ị́ḅogh kụ bịdi ụ́moogh oghiilaan;
kụ ọphiiny phọ aru ni aakpereghiom bụmulogh-ḍien phọ ạbidi.
54 #
Ẹḍua 15.17; Jos 3.14-17 Ọdi arorori bịdi asiemi de iigbia phọ,
ẹpe ạraaḅaraph phọ ọdi rꞌaloor kụ aphorogh bọ we phọ.
55 #
Jos 11.16-23
Ọdi aphorogh bụphe orugh bọ esi phọ mem dị awe phọ ọdi rotu;
ọdi adiemi de phọ rughunughun phọ Ịzirel
kụ ạngo simarugh phọ ạbidi we phọ ọdi.
56 #
Ịir 2.11-15
Kụ ọlo bịdi ụḅaar ri ẹmhu esi Ọkaraghi Egbogh Ẹnaan phọ
kụ ọwa ghan ọmiin oye dị Ẹnaan aru.
Bịdi ụ́naghanan iilogh phọ ọdi,
57kụ ụḅaar ghan ẹmhu ọḅile ọrol ẹnaghanan ịdipho ạburude phọ ạbidi,
úḍuom ologhi mụdi ẹkpina dị eḍogha.
58Bịdi uḍighi ghan nyọdi ịlo ophin ologhi rꞌariisi ịiḅereghi ịkaaneen ạraraar ạbidi;
ạnmuny asighuḍuul phọ ạbidi kụ ịkar kẹn ephin ologhi ọdi iboom.
59Ẹnaan ẹghagham we phọ ọdi ologhi mem dị ọdi ạmiin bọ ịphen phọ,
kụ ọdi aghel bịdi ạkpaariom.
60 #
Jos 18.1; Jer 7.12-14; 26.6 Ọdi ạḅitonaan ogbogo phọ ọdi ẹpe Sailo,
ẹmha phọ ọdi ạrol ghan bọ sịphe ogbo phọ ayira.
61 #
1 Sạm 4.4-22
Ọdi ạngo ọgel bụmulogh-ḍien ayira mọ owum Igbe Ịyo phọ ọsighe,
nyẹpe phọ eḍeenaan bọ ịikpo rꞌeegu phọ ọdi.
62Ọdi ạghagham we phọ ọdi ologhi
kụ ạngo ọgel dị ạbumulogh-ḍien ạbidi ọze bịdi.
63Ugheel ạnmuny ụze risigh ẹgham,
kụ arisina ạnmanyaan ụ́moogh we ạalagh.
64Ạbupinyon rịkia umugh ḍuugh ekperenom,
kụ úmeera mọ arukpukele ạnmariir phọ ạbidi okururu.
65Ekureriom mọ, Ọmoogh-we phọ ạsuma mụdi ạrol rạlha;
ọdi ạghigh ọgbagara oye dị amiim rakiigh.
66Ọdi aphorogh bụmulogh-ḍien phọ ọdi
aseere bịdi dọl umugholoor kꞌagee-pọ.
67Kụ ọlo ọdi aghel li nmụny ạnmuny ạJosef,
ọdi ọ́loghoma mun eghun Ifraim.
68Ọdi ạḅile ghụn ạsaḅar eghun aJuda rꞌEegum ạZayon,
ẹpe ọdi ạphomoghian bọ iboom.
69Ịsiphe kụ ẹdi ọdi ạlogh Otu Ịiḅereghi
ịdipho ạdol phọ ọdi kꞌạke;
ọdi ạmaar ạkparami mụdi ade rꞌaloor,
ẹmaar ẹrol kꞌagee-pọ.
70 #
1 Sạm 16.11, 12; 2 Sạm 7.8; 1 Krọ 17.7 Ọdi ạsaḅar otelhedom ọdi Devid;
ọdi ạsighe nyọdi sịphe ạroogho eḍum mọ,
71esi phọ ọdi aphogh ghan bọ ḍita iyool-ịga phọ
kụ aḍighi nyọdi ọdaam Ịzirel,
okoriom awe phọ Ẹnaan.
72ADevid ạmaar ạpham bịdi dị ụ́ḅaram ọkaraph ologhi,
kụ aḍiemiom ghan bịdi rꞌẹmaar.
Currently Selected:
Ạsuor 78: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
