Nẹhum 3
3
1Mephe! Ẹmha ọkpe phọ,
ẹmha phọ rọze ghan bọ we phọ, mephe!
Kụ aruphua emuza ịlo owum ọsighiogh ọḍuanam!
2Ịnaghan ḍịgur ịguroghom,
ḍịkarakara ạḍiaḅa ariigida,
opeleghu ạrusu,
otirighaan arughuugh ẹgham!
3Ạbuo oghiilom ạsu ozuom ẹgham,
arolhool ẹgham rẹmepheghian, ịsoph enmeeghu!
Egu awe dị momuughu kꞌẹpe ạnyu,
ịlo ogbi ílho —
awe rookpeteghaan ghan bịdi.
4Rọliom Nineve, ạnir erelhe ipesi phọ,
ạnir phọ ọpo ẹnighe phọ ọdi ẹmagh bọ reelhe phọ,
ịkaraph ạrugba phọ ọdi ẹsighe bọ bịdi etene rẹbene.
5Ọmoogh-we Oomo Ịikpo phọ ạḅem mọ,
“Mị kạliom nyịna, Nineve.
Mị kạrolomi nyịna ẹdaḅa
kụ areelhe ọmiin nyịna,
ọmiin nyịna rꞌoomo aroofola phọ ạna.
6Mị kạḅitonaan nyịna
kụ aakpereghiom nyịna atopha.
Awe kosinini rꞌọto kụ ophogh nyịna.
7Oomo ạbulo ọmiin nyịna kọnyaghaan kụ oḅula ọman.
Bịdi kọḅem mọ, ‘Nineve mephe!
Ạnhian kụ kạnma nyọdi ighirigiir?
Ạnhian kụ kạadereghi nyọdi?’”
8Nineve, nạ ạnighe ni apu Tebes ẹkpana ẹmha phọ Ijipt ḍụghum? ATebes kẹn bịn ạmoogh ni ọphiiny osophoghom ọdi mụdi iikpe — Ọphiiny aNail phọ kụ ọoḅakiom dị odianaan nyọdi. 9Ọdi kụ ạda Ẹtiopia rꞌIjipt, ekureriom ílho ịikpo ọdi; ạLibia rꞌọdi kụ ụrol ḍiniin ạḍighaagh. 10Ghạlamo ịduon phọ bịn ụsighe ni weye aTebes ọḍuanam ọrol dọl ạrebene. Tọrobo ẹkul eten ukuphogh ni nmụny ạbidi ọze. Ụkpooghi ni izime ikumoor awe phọ ạbidi kụ odiemi bụphe osiphi bọ bịdi.
11Nineve, nạ kẹn kanaghagha mụdi oye dị amiim maghiigh! Nạ kẹn kạwa ni okpetenaan esi ạmulogh-ḍien ạna. 12Oomo ariisi ogonaam aloor phọ ạna kẹkigh ireeny ạfig dị iimuma ẹḅaal — oye aphighemi iizin phọ, pọ iimuma phọ kẹkar ri eḍigh ọnhu ọdi! 13Awe ẹgham ạna ọkigh nmạriir, kụ eelhe phọ ạna kétue ẹmerenyan ghisigh ạmulogh-ḍien phọ ạna. Ạnian kụ kele ịḅagham ạrunhu-aḍibuo ạna. 14Ḍuughi mụum aakolobian ịlo okikimaam, kụ ạkparami riisi ogonaam mọ anyina! Zẹr ạḅay oḍighinom sibiriki, kụ ạsighe rọḅolom mọ ạabemi. 15Ịlo nạ aḍighi aḍighi, kọsu ni nyịna nịan okiigh, ḅịle mꞌoghiigh ạna ẹgham. Koḅoor oomo anyina opiemi ịdipho ịizupha dị igurubia kụ ẹraal.
16Nyina ịbugh ḍita ịdipho igurubia. Nyina ịmoogh bumuul aḍighi dị oḍiza opu rạanaan okuaḍio phọ! Kụ nyịidipho bịdi úlho mun mụdi igurubia dị ẹrere raphaaph ạbidi bịn ẹphepheghu ẹḍua. 17Nyina awe iiḍighi phọ ẹkigh ḍita igurubia dị ẹlelogh loor iikpe ḍio ẹephoom. Kụ mem dị ogogo amite, bịdi ẹpepheghu ẹḍua!
18Ogbogh ọdaam Asiria, awe phọ ạna ọdaaghi bọ momuughu, kụ igbogh awe ạna momeel rạlha bịn kọ́suma! Awe phọ ạna ọwalala ạnyu ạraaḅaraph, kụ oye ólho ọpham ạbidi orighelom. 19Ọogho oḍighi ariisi phọ ạna ólho, kụ ariisi phọ kékeel. Oomo ạbudi ọnaghan iphirigba emeel phọ ạna rokpoola ghan rạghaagh ịlo ọḅaal ologhi. Rꞌoye akpetenaan ni ẹkaraph ẹrolom mọ ạna eekuna ị́tol bọ ḍụghum?
Currently Selected:
Nẹhum 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
