Nẹhum 2
2
Emeel aNineve
1Ẹmha phọ aNineve, ạmulogh-ḍien ratu ozuom ạna!
Ịikpo phọ kẹewalami bọ nyịna meru!
Pạm riisi okikima phọ ạkparami!
Pogh eten phọ akananaam!
Nyạ ịlo ẹgham!
2(Ọmoogh-we phọ rạwa oḅulemi eghuan phọ Ịzirel, ịdipho ẹrol bọ kụ ạmulogh-ḍien phọ aphiemi bọ.)
3Awe ẹgham ạmulogh-ḍien phọ ọpam ịsuaram dị ẹtogh
kụ ọkpologhian ịtogh-tọgh iinmenian.
Bịdi rookolobian ozuom elephiri!
Arughuugh ade ẹgham mọ ạbidi reemor ịdipho ạnian!
Ạrusu ạbidi repeleghu!
4Arughuugh phọ retoraan ịlo ẹḅeeraan sịphe areten phọ
ẹghi risigh ẹki ọman sịphe arurugh ephegh phọ.
Bịdi ẹmhu ịdipho ịtozi
kụ rẹmepheghian mụdi aḍio dị kẹloph.
5Ạbuo iiḍighi mọmagh esi;
bịdi okpetaan mem dị bịdi rọki ghisigh.
Bụphe rozuom ghan bọ oogborion osi sịphe iikpe phọ
kụ ọmaar oseere ọsuaram mọ ogonom sighiigh lọ awe ẹmha phọ kotoḅologhi.
6Ạrunhu-aḍibuo ịigaany ọphiiny phọ eghughuronu rꞌịnyaam;
Aḍiigu kụ imuza sịphe ogiga ọdaam mọ.
7Mosiph ạnir ọdaam mọ ọḍuanam;
abutelhedom ọdi oyeela ịdipho arukurughozo
rookurughan loor ọto.
8Ịdipho ạmuum dị rakil kạḍua esi iikpe dị okikimaam kụ memeel,
awe ọḍua Nineve kụ rokiil.
“Isophe! Isophe!” emoghi ẹki ạnyu —
kụ rꞌoye ọman óphogh.
9Ibum ẹsighiogh silva phọ!
Ibum gol phọ ẹsighe!
Ẹmha phọ ẹelha kụ imuza!
10Mophiemi Nineve! Mọḍuaghu, oye ólho mun!
Iloghi mekururu esi oghiilaan;
aruukum epiigha, ịnyaam ílho mun;
asighisigh ekelele.
11Ẹmha phọ edi nyịidipho ẹghen,
ẹpe ẹrol ghan bọ mụdi ạdol ạnam-dịka,
esi phọ ọde rꞌonhiin ọghi ghan bọ
ọngo eḍien ịbam ạnam-dịka phọ,
kụ nmụny ạbidi ịyaar ị́ḅogh?
12Ạnam-dịka phọ eghiigh ịyaar ạa
kụ erunyi etene ịpherepe eseenaan nyọori phọ rꞌạnmuny ọdi;
ọdi amuzeḍiom esi ạdol ọdi iphulupul ịnam.
13“Mị ạmulogh-ḍien anyina!” Ọmoogh-we Oomo Ịikpo phọ ạḅem. “Mị kạsuughi rughuugh anyina. Weye anyina kọze erugh ẹgham, kụ mị kạsighiogh tọrobo ịyaar lọ nyina ẹsighe rạghaagh ạbunon awe. Sịen aḅirini phọ kọ́naghan mun ịlo ịikpo phọ anyina.”
Currently Selected:
Nẹhum 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
