Hạbakuk 1
1
1Ḍịen kụ adom dị Ọmoogh-we phọ agananami ạḅeni Hạbakuk oyil phọ.
ẠHabakuk ramoghi ni ịlo ịkaraph ịiruen
2Ọmoogh-we, mị kamoghi kꞌapuraḍio ọloghonaan ạḍighaagh kụ nạ ạnaghanan, kụ nạ ụphel iyoor ạsighe esi ọwa asighiton. 3Eeghe kụ nạ ameera bọ mọ mị ụmiin ịiḅaghami? Eeghe kụ ịdi nạ kạkparagham ọmiin ẹdo ẹkaraph eḍighinom mọ ẹphen? Oogulemi rꞌọwa asighiton kụ ikoom ịmi, kụ elephiri rꞌọruonu kụ odi tọrobo ekpisi. 4Ologh phọ adugh kụ ọ́moogh ịyaar oḍighinom, kụ iiḅi ịiruen ílho mun. Ịkaraph awe ọkpiloghom opiemi weye aruukuan, kụ ịduon phọ motukelemi ịiruen.
Ọphagharanaan Ọmoogh-we phọ
5 #
Iiḍ 13.41
Kụ Ọmoogh-we phọ ạḅeni weye phọ ọdi mọ, “Inaan kụ ephogh reelhe phọ ikoom bọ inyina, kụ keḍighi ni iikia ịdi nyina kẹmiin. Mị kạnuun ni aḍighi ịyaar dị nyina kémeeraam mem dị nyina ẹnaghan. 6#2 Ạbud 24.2Mị rạsighe ghan weye ạBabilon mọ oru ọda, weye igbagbaar phọ ạbuphe rópooghian ghan bọ. Bịdi morelhe romite rꞌịnyaam oleeny aḅirini phọ ọkpar opu ịnon arere. 7Bịdi oleenye ḍiigu rꞌoghiilaan. Iilogh phọ ạbidi, iilogh phọ bịdi rꞌaloor mọlhogh bọ.
8“Ịnam-ạsu phọ ạbidi ekiil epu riitiir, kụ ọmoogh eḍighinom dị eeph epu ịnam dị rẹsighe ghan ịga. Abukiilom ịnam-ạsu ạbidi ụḍua rikpisi dị ẹkel kụ oru; ạrusu phọ ạbidi eguph ude phọ. Bịdi eru kụ esoor ude phọ ịdipho aruga dị resoor ọsighe ẹnam ạa.
9“Awe ẹgham ạbidi rọki ghan bịn rꞌekpom ọkpar opu, kụ tọrobo oye rakiilaan ọmiin eru phọ ạbidi. Awe dị bịdi mosiphi oḍiza ịdipho ikpo ịisaar. 10Bịdi ropoghom ghan rạalha rꞌạrigilaam, kụ ọmilogh bugbogh awe iiḍighi. Esi okikimaam ílho dị kesoph bịdi — bịdi kokpol ọogha egu ọkpaariom kụ obe ọsighenom. 11Kụ bịdi ọḍua egina amem mụdi oghim bịn moten, awe phọ ạbuen ịikpo ạbidi kụ eḍighi bọ ẹnaan ạbidi.”
ẠHabakuk ạḅile kẹn amoghi apoghom Ọmoogh-we phọ
12Ọmoogh-we, kꞌẹkar emiighom mọ nạ kụ Ẹnaan. Nạ kụ Ẹnaan ạmi, Ẹnaan Aruukuan dị rémugh ghan. Ọmoogh-we, Ẹnaan ạmi rꞌọpelia ạmi, nạ ạsaḅar weye phọ ạBabilon ạngo bịdi ịnyaam ẹrol dị bịdi ụliom ghan iyoor. 13Kụ ika kụ ịdi nạ katue ạmerenyan weye dị eeph ịduon rꞌareekeleghian? Ariḍien ạna eḍighi ịlo aruukuan ẹpughan ọmiin ịkaraph kụ nạ kátue ạmerenyan we dị roḍighi ịkaraph. Kụ eeghe kụ nạ aḅoorian bọ kụ bịdi ropiemi weye dị odi dọl aruukuan opu bịdi?
14Uḍighi ika kụ nạ rạgilaam weye mụdi ina ḅịle mụdi aḍita ạraraar lọ rẹpeeph dị ị́moogh oye orelhiom ạbidi? 15Awe phọ ạBabilon ọsighe siḅaph kụ rọḍaam ghan weye, dị ẹrol mụdi awe phọ ina. Bịdi ọsighe ghan ịseki oḍurom bịdi ọḍuanam kụ ọloom rꞌọḅaal ologhi dị bịdi mọmoogh ịyaar ạa! 16Bịdi ọḅile ghan rooseeny ghan rạraar ạkoni ạbidi kụ oḍighi ghan rạraar aghuḍum rọngo, loor esi dị ạraraar ạkoni phọ ạbidi rẹngo ghan bịdi oomo ịma lọ bịdi ọwa.
17Bịdi kọtol ghan ọpham arolhool ẹgham ạbidi kꞌagee-pọ kụ ophiemiom ghan areelhe phọ dị ọnma ighirigiir úlho ḍụghum?
Currently Selected:
Hạbakuk 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
