Lịvitikos 9
9
Eeron ạpinyon rịkia
1Kụ rẹman ọphaanya aḍughul-otu ịko phọ, kụ aMozis ạmagh Eeron rꞌạnmuny phọ ọdi rꞌikumoor awe phọ Ịzirel mọ itu. 2Kụ ọdi ạḅeni Eeron mọ, “Kịa ạsighe mọony olephiri ạnam dị kọpighironom ẹkia ịkaraph, rꞌodughuna dị kọpighironom ẹkia oguom ạnian, lọ kọ̋opuan loor, aru aseere egbodo Ọmoogh-we phọ. 3Kụ ạḅeni we phọ Ịzirel mọ ọghi ọsighe ekpe ẹlo ẹkia ịkaraph; rꞌọony ạnam rꞌọony oyool-ọga, ịyal phọ ạbidi eḍighi ịlo mẹman ḍiniin ạlha, lọ kẹ̋epuan loor, ẹlo ịyaar aghuḍum oguom ạnian. 4Ọḅile ọsighe ḍilephiri ạnam rꞌodughuna dị kọpighironom ẹkia ẹboroph. Ẹkia nyẹen kọḅaram ẹlo ịbiakpa dị okirionom mụnum kụ ọpighironaan egbodo Ọmoogh-we phọ ịdi eḍighi bọ Ọmoogh-we phọ kamite aganana aḍeenaan bịdi loor ọdi rodon.”
5Kụ bịdi ọsighe ịinua phọ ịpe aMozis ạgo bọ ạḅeni bịdi, ọpham orumom sịphe ọnhu-aḍibuo Ogbogo phọ, kụ oomo phọ ạbidi oḍuraan ọobeeph ọmeregha egbodo Ọmoogh-we phọ. 6Kụ aMozis ạḅeni bịdi mọ, “Ẹphen phọ kụ ịyaar phọ Ọmoogh-we phọ ạto bọ ịḅeni inyina mọ iḍighi, kụ eegu Ọmoogh-we phọ kemite eganana esi anyina.” 7#Hib 7.27Kụ ọdi ạḅeni Eeron mọ, “Kịa ẹpe enmeny phọ ạphighiron ẹkia oguom ạnian oselemian aloor phọ ạna rꞌawe phọ ạna, awopha loor ạna, awoph we phọ ạna; ạphighiron ẹkia oselemian aloor phọ, ịdipho Ọmoogh-we phọ ạto bọ.”
8Kụ Eeron aḍuraan ạabeeph atuman enmeny phọ kụ aghiigh nạm mọ ạḍiphe ọdi raseleminaan bọ loor phọ ọdi. 9Kụ ạnmuny phọ Eeron ọsighe ịḅaal phọ oruom nyọdi; kụ ọdi ạsighe ghụnugh ọdi atiom ghan ịḅaal phọ adoghoḍi ruukuna enmeny phọ, kụ ạsighe ịpe esugha bọ aaku eeḍian enmeny phọ. 10Kụ ọdi ạsighe ẹnuum mọ, ịkpinyoom mọ rꞌamuupuph phọ azuom bọ nị phọ, aguom nịan sịphe ạnyu enmeny phọ, ạdaph ịpe Ọmoogh-we phọ ạto bọ ạḅeni Mozis. 11Iphulupul phọ rꞌozu phọ, ọdi ạsighe ạḍuanam sịphe arugbogo phọ, kụ aguom nịan.
12Kụ Eeron aghiigh odughuna ẹkia oguom ạnian phọ, kụ ạnmuny phọ ọdi ọsighe ịḅaal phọ ọghiom nyọdi kụ ọdi ạsaraghi akitonom oomo ịigaany enmeny phọ. 13Kụ bịdi ọsighe ẹmhu phọ rꞌitigh iphulupul phọ ọḅogh ọngo nyọdi, kụ ọdi aguom nịan sịphe enmeny phọ. 14Kụ ọdi ạsighe mụum aatolom ịpe ọkuruḅaka phọ rꞌaruwol phọ, kụ aguom nịan sịphe ạnyu ịpheri phọ.
15Ịphen phọ reten kụ Eeron ạsighe ịinua ịlo ịkaraph ịpe awe phọ amitiom. Ọdi ạsighe ekpe phọ kọpighiron bọ ẹkia ịkaraph phọ awe phọ oḍighi bọ, kụ aghiigh, kụ ạsighe ạphighiron ẹkia ẹlo ịkaraph phọ ạbidi, ịdipho ọdi aselemian bọ loor phọ ọdi. 16Kụ ọdi ạsighe ẹnam ẹlo ẹkia oguom ạnian phọ, ạtuugh ịdipho rọpighiron ghan bọ ạphighiron. 17Kụ ọdi ạphighiron ẹkia ịbiakpa phọ, kụ akpoph ẹezua ạḍighaagh ịgbieneen ịbiakpa phọ aguom nịan sịphe ạnyu enmeny phọ, ạḅaram ẹkia oguom ạnian phọ nyẹpe ạḍiroor phọ. 18#Lịv 3.1-11Kụ ọdi aghiigh ḍilephiri ạnam mọ rꞌodughuna phọ, ịpe kọpighironom bọ ẹkia ẹboroph phọ ẹlo awe phọ Ịzirel, kụ ạnmuny phọ ọdi ọsighe ịḅaal phọ ọghiom nyọdi, kụ ọdi ạsaraghi oomo ịsiphe enmeny phọ akitonom. 19Kụ Eeron ạsighe ẹnuum ạnam mọ rꞌodughuna phọ rꞌẹekpolodum mọ rꞌoomo ịpe ọkuruḅaka rꞌịkpinyoom mọ rꞌamuupuph phọ azuom bọ nị phọ ạbidi, 20ạsighe ạḅam ạnyu ạramamaam mọ, aguom nịan sịphe ạnyu enmeny phọ. 21Kụ ọdi ạsighe rạmamaam mọ ạgbanyan bịdi ạphighiron ẹkia phọ ẹphen egbodo Ọmoogh-we phọ. Ạramaam mọ rꞌarugbo phọ ịlo Eeron rꞌạnmuny phọ ọdi, ọdaph ịpe aMozis ạto bọ ạḅeni bịdi.
22 #
Igb 6.22-26
Mem dị Eeron mạmadan bọ oomo ạrikia phọ, ọdi aphoophe rạghaagh ọdi asomoriom we phọ kụ ạngo bịdi ọghor, kụ ạḍua sịphe ọdi ạrol bọ kụ ạphinyon bọ rịkia ịkaraph oguom ạnian rꞌẹboroph phọ asoor ude. 23AMozis rꞌEeron ụghi ni oḍigh sịphe Ogbogo Ạdol Ọmoogh-we phọ, kụ omite ọngo ḍịseph we phọ; kụ eegu Ọmoogh-we phọ emite eganana esi oomo awe phọ. 24Egina amem bịn Ọmoogh-we phọ arom nịan dị esoor elhe ẹkia oguom ạnian phọ, rꞌẹnuum mọ ẹrol bọ sịphe ạnyu enmeny phọ; kụ oomo phọ aweye phọ ụmiin ni kụ ọlooghi kụ omeleghu ezuemi.
Currently Selected:
Lịvitikos 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
