Lịvitikos 10
10
Ịkaraph dị ạNadab rꞌAbihu oḍighi
1ẠNadab rꞌAbihu ạnmuny phọ Eeron ụsighe ni nịan ọkpooni ạnyu arekeeghi, uwo ịlo ọdi rꞌịlo ọdi, kụ ọlogh ịnsens ọḅaram, kụ oḍighinom eeruen ịyaar aghuḍum ạnian egbodo Ọmoogh-we phọ, dị Ọmoogh-we phọ kụ bịdi ụ́ḅeni. Kụ ẹkia phọ ílhe loor esi dị Ẹnaan kụ ítom bịdi. 2Egina amem bịn Ọmoogh-we phọ aseere nịan dị ele bịdi bịn omugh sịphe egbodo Ọmoogh-we phọ. 3Kụ aMozis agbi ọḅeni Eeron mọ, “Ịphen kụ ịdi Ọmoogh-we phọ ạghaaph bọ, mọ ọno kaḍeenaan ni bụphe otuman bọ nyịno iigbia phọ ọno, kụ oomo awe phọ ogbi ọlogh ạmi eegu.” Kụ Eeron ạrol li bịn aḅoorian.
4AMozis ạmagh Mịsael rꞌẸlzafan, ạnmuny phọ Ụziel umor ọde phọ Eeron, kụ ạḅeni bịdi mọ, “Itu ẹebeeph. Itool bumor phọ anyina ẹsighe sịen Ogbogo Iigbia phọ ẹḍuanam sịphe arugbogo phọ.” 5Kụ bịdi oḍuraan ọobeeph, kụ ọsighe rụsuoma phọ ạbidi ophurughiom bịdi, kụ orool bịdi ọḍuanam sịphe arugbogo phọ, ọdaph ịpe aMozis ạḅeni bọ bịdi.
6Kụ aMozis ạḅeni Eeron rꞌạnmuny phọ ọdi, Ẹliazar rꞌItamar mọ, “Kẹ́bile ạsilaal anyina eḍu-ẹfununu dị nyina ị́zaranaan, ḅịle kẹn kẹ́panyi rukpe anyina loor ọto, ọbo nyina kemugh ghan bọ, ọbo ạghelhe kasoorom ghan bọ oomo awe phọ; kụ ọlo omeera ni mọ aḍita ookpomoghan phọ Ịzirel, abumor phọ anyina okururu ni esi aḍuugh ạnian phọ ạḍien Ọmoogh-we phọ kụ arom bọ. 7Kẹ́ḍua sịphe ọnhu-aḍibuo Ogbogo phọ, ọbo nyina kemugh ghan bọ ịdi eḍighi bọ miḍighi inyina bụo iigbia loor ạmunum-ịko phọ odi bọ loor anyina.” Kụ bịdi ọdaph ịpe aMozis ạḅeni bọ bịdi kụ ọrol.
Iilogh dị ọloghoḍinaan riil ạrikia
8Kụ Ọmoogh-we phọ ạghaaph ạḅeni Eeron mọ, 9“Kạ́pughol ghan mụukpara amiim, nạ rꞌạnmuny phọ ạna, kụ agbi oḍigh Ogbogo Ạdol phọ ạmi, ọbo nạ kamugh ghan bọ. Ịphen phọ eḍighi iigbia esi anyina, oghiil atum oghiil phọ ạna. 10Lọgh ọku rạraar lọ eḍighi iigbia rꞌịlo iigbia íḍighi, ạlogh ọku rạraar lọ ẹḅaal rꞌịlo ị́ḅaal. 11Kụ ạtughemi we phọ Ịzirel oomo iilogh phọ ịpe Ọmoogh-we phọ adoghoḍi bọ ạḅeni Mozis.”
12 #
Lịv 6.14-18
Kụ aMozis ạḅeni Eeron rꞌẸliazar rꞌItamar, ạnmuny phọ ọdi bụphe osugha bọ, mọ, “Ịsighe ịpe esugha bọ sịphe ịyaar aghuḍum ịbiakpa phọ oḍighinom bọ nịan egbodo Ọmoogh-we phọ, eḍighi ạbred. Kẹ́logh ghan yist. Ịtol etuman sịphe enmeny phọ kụ ele, ịdi eḍighi bọ eḍigh ni ẹkia iboom iigbia. 13Ịtol esi iigbia kụ ele, ịdi eḍighi bọ mụen phọ abin ạna rꞌabin ạnmuny phọ ạna, esi ẹkia mọ oḍighinom bọ nịan. Ịduon kụ ịdi Ọmoogh-we phọ ụḅeni bọ ịmi. 14#Lịv 7.30-34Mạmaam mọ ọphighironaan bọ rꞌaḍiphe phọ oḍighinom bọ ẹkia ẹboroph phọ, ịsighe ẹghi esi iigbia kụ ele, nạ rꞌạnmuny phọ ạna rꞌạnmanyaan phọ ạna. Mụen phọ abin ẹkia ẹboroph phọ awe phọ Ịzirel ọpighiron bọ. 15Bịdi ọsighe ḍiphe phọ oḍighinom bọ ẹkia phọ, rꞌạmamaam mọ ọphighironaan bọ, ọḅaram rꞌẹnuum mọ oḍighinom bọ ẹkia ạnian phọ, ọsighe oru ọphighiron egbodo Ọmoogh-we phọ eḍighi ẹkia iiwopha. Ịphen phọ ịlo ạna rꞌạnmuny ạna. Ọphon phọ ologh dị kạtol kꞌagee-pọ, ịdipho Ọmoogh-we phọ ạto bọ.”
16Kụ aMozis amiigha loor kụ apuru ịlo ekpe phọ oḍighinom bọ ẹkia ịkaraph phọ kụ alegheri mọ moguom nịan, kụ ọdi ạghagham ologhi Ẹliazar rꞌItamar, ạnmuny phọ Eeron bụphe osugha bọ kụ ạḅem mọ, 17#Lịv 6.24-26“Uḍighi ika kụ nyina ị́tol bọ sịphe esi iigbia phọ kụ ele, eru bọ ni iboom iigbia? Kụ Ọmoogh-we phọ ịngo inyina mọ ọsighe owophom ịkaraph oomo awe phọ. 18Ịḅaal phọ ụ́sighe bọ ni útu ẹphen Ogbogo Iigbia phọ, nyina mịtol sịphe kụ ele, ịdipho ologh phọ mị ạlogh bọ ịḅeni inyina.”
19Eeron ạḅeni Mozis mọ, “Mụghumo mịna ule ni ẹkia ịkaraph phọ rodon, Ọmoogh-we phọ mụsighe ni ḍụghum? Pogh, arodon kụ ẹdi bịdi ọphighiron ẹkia ịkaraph phọ ạbidi rꞌẹkia oguom ạnian phọ egbodo Ọmoogh-we phọ, kụ ọdo ịphen phọ mimitenaan ni ịmi.” 20Mem dị aMozis ạnaghan bọ ḍipuru phọ ạḍien phọ bịn ịgbaanyan ni nyọdi.
Currently Selected:
Lịvitikos 10: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
