Joel 2
2
Igurubia kụ ạmagh dị Ọmoogh-we phọ aḍeenaan ḍio phọ ọdi
1Ipula eeḍue ẹpe Zạyon;
ekar ogele ẹeḅaraph iigbia Ẹnaan phọ.
Weye aJuda, ikpereghaany!
Aḍio Ọmoogh-we phọ retu. Mesi ẹda ạḍighaagh.
2Aḍio phọ keḍighi ufiri kụ ebeeph,
kebil kụ ẹmoogh ọotu.
Aḍigbogh aḍita igurubia phọ retu
mụdi ufiri kụ eleeny rạaḅaraph phọ.
Ọdo ịyaar lọ ẹrol ịduon kẹ̋rol ghan
kụ kẹ́tol mun bịninin.
3Ịdipho ạnian kụ ẹdi bịdi rẹtaal ịizupha phọ.
Ghisigh ạbidi, ade phọ ẹtol mụdi Oghoony Iden,
kụ ọman ạbidi eḍighi ẹdala dị rꞌịyaar ílho.
Ịyaar bịdi rékpetenaan ghan.
4 #
Ogon 9.7-9
Bịdi ẹkighogh igbogh ạrusu;
bịdi rekiil mụdi igbogh ạrusu ẹgham.
5Mem dị bịdi repeleghu ạnyu ạraaḅaraph phọ,
ạḍiaḅa ạbidi ẹkigh rughuugh ẹgham;
Bịdi rẹkpataghaan ịdipho ạtugharaghar ạroogho dị ọlogh ologhi ạnian.
Bịdi rẹkoolan ghan mụdi aḍigbogh aḍita ạbuo ẹgham dị mọnya ẹgham.
6Okpekian phọ ạbidi, tọrobo oye ạmoogh oghiilaan;
tọrobo aghisigh akiton akpaghagha.
7Bịdi ozuom ịdipho arephelegbe;
bịdi okpogha iikpe mụdi awe ẹgham.
Oomo ạbidi onyeene orelhe ọghi
kụ rꞌowol óphogh ẹnon ạga
8ḅịle úukulughan.
Bịdi ọpeeph ọḅeeny rạraar lọ ogborori yogh
kụ rꞌịyaar bịdi kékikima.
9Bịdi ọkimom rꞌịnyaam ẹpe ẹmha phọ;
bịdi ọḅeenyogh iikpe,
bịdi ọsinyighu ruutu
kụ ọḍua rughuugh ookuugh kụ oḍiku ịdipho ạruḅa.
10 #
Ogon 8.12
Ade phọ epiigha mem dị bịdi rotu;
okuaḍio phọ akpekper.
Erumuḍio phọ rꞌụnwanyu phọ ekitonu ebil,
kụ ạraanaan phọ ị́muanan mun.
11 #
Ogon 6.17
Ọmoogh-we phọ amooghaam ịto ạḅeni we ẹgham ọdi.
Aḍita dị ọnaghanan nyọdi ọbugh kụ ọmoogh ịikpo.
Aḍio Ọmoogh-we phọ keḍighi ika aḍiigu!
Ạnhian kụ kakpetenaan?
Ạḍimagh okiton esi ịkaraph
12Ọmoogh-we phọ ạḅem mọ, “Nyịidipho,
ikiton rꞌoomo ologhi eḅula esi ạmi
ẹḅaram ọkaagh ẹḍogh rꞌemoghi, rꞌọto.
13Iḍighi ịdi ologhi phọ anyina maḅonyonu bọ kaḍeenaan dọl ọto anyina;
ọphanyi iinmenan anyina bịn ị́kasian.”
Iḅula esi Ọmoogh-we Ẹnaan phọ anyina.
Ọdi ạmoogh igbiririph kụ ạḅaram ọnma ighirigiir;
Ọdi rạkparam ghan kụ kaḍighi ịlo aguanaan;
Ọdi odi ghan ọsar ọwilenaan bịn ọ́lhiom.
14Iini Ọmoogh-we Ẹnaan phọ anyina kanme ni ologhi ọdi
kụ ịsephom inyina rꞌiimuma dị ẹmanam.
Kụ nyina egbi ọngo ọdi ịbiakpa rꞌamiim.
15Pula eeḍue phọ ẹpe ẹeḅaraph ạZayon;
tọ ạḅeni bịdi ọkaagh ẹḍogh kụ ạmagh ookpomoghan!
16Kpookpoomoghi we phọ eniin esi;
kookolobian bịdi ookpomoghan iigbia;
pạm ikumoor awe phọ arumom;
kookpomoghi nmụny phọ
rꞌạnmuny asipugh phọ kẹn.
Ghạlamo olhom rꞌạnir dị pụruku ạalan
ọwile ni osoph ạbidi oru aani!
17Ạbupinyon rịkia phọ rokumu bọ Ọmoogh-we phọ
ogbo enmeny phọ rꞌeḍighom Otu phọ,
omoghi ni kụ ọoḅereghi:
“Mọogh ọnma ighirigiir esi awe phọ ạna, Ọmoogh-we.
Kámeera ịnon areelhe ụḅitonaan iyira kụ ụnmoghoghoom iyira
esi ọḅem ghan mọ, ‘Ẹnaan phọ anyina edi ẹghen?’”
Ẹnaan iḅulemi ẹnuum sịphe ade phọ
18Pọ kụ amem dị Ọmoogh-we phọ aḍeenaan ḍịḅeeraan de phọ ọdi;
ọdi ạnma ni ighirigiir esi awe phọ ọdi.
19Ọdi ạphagharanaan bịdi:
“Nyịidipho mị kịngo inyina
ịbiakpa rꞌamiim rꞌạmunum-ọliv,
kụ kịgbaanyan ni inyina.
Ịnon areelhe kị́ḅitonaan mun inyina.
20Mị kạsighe ḍita igurubia phọ ẹḍua bọ ephunom mọ kụ eru
kụ aporogh iniin ịbadi ạkiom ẹdala ịisaar phọ.
Ḍịkool arisigh phọ ạbidi koporogh osumeeny Ọphiiny-Ạla phọ,
ḍita ọman phọ kosumeeny Ọphiiny aMeditarenian.
Ịpe emuughu bọ kepur ri.
Agey ni, ọdi muḍighi iboom ạraraar.
21“Iizo, kẹ́moogh oghiilaan,
ịmoogh ghụn iboh rꞌọḅaal ologhi.
Agey ni, Ọmoogh-we phọ muḍighi iboom ạraraar.
22Ịnam, kẹ́moogh oghiilaan;
Ạroogho phọ agbidiim;
ireeny phọ emuum iimuma phọ ạbidi,
kụ iimuma ireeny ạfig rꞌireeny avain emuza.
23“Weye ạZayon, ịmoogh ọḅaal ologhi,
ịmoogh iboh, esi ịpe Ọmoogh-we Ẹnaan phọ anyina miḍighinaan bọ inyina.
Ọdi mạtuugh ọlophia arunu dị ạkasian ịngo inyina;
ọdi miikuom ni inyina mụum unu dị ạmanam
rꞌọlophia unu phọ ịdipho ẹnon amem.
24Ariisi ọgbe ịbiakpa phọ kemuza ni,
ariini ịigaany ariisi omiimogh phọ kẹepheleghian rꞌamiim rꞌạmunum-ọliv.
25Mị kaḅulemi ịngo inyina ịpe epheeghu bọ
sịa phọ asita igurubia ẹraal bọ ịizupha phọ anyina.
Mị kụ ọdi arom bọ sita phọ iruom inyina.
26Nyịidipho nyina kẹmoogh eboom ẹlo olhe, kụ ẹgbaanyan.
Nyina keeseeny Ọmoogh-we Ẹnaan phọ anyina,
ọpo miḍighinaan bọ inyina iikia ạraraar.
We phọ ạmi kọ́ḅitonaan mun.
27Pọ kụ amem dị nyina, Ịzirel, kelegheri mọ mị odianan rꞌanyina,
kụ mọ mị Ọmoogh-we phọ,
mị kụ Ẹnaan anyina kụ ọnon ólho.
We phọ ạmi kọ́ḅitonaan mun.
Aḍio Ọmoogh-we phọ
28“Ruukuna phọ, Uwaloor phọ ạmi kasoorom oomo awe:
ạnmuny anyina rꞌạnmanyaan anyina kọkaaph ni ịpe mị agananami bọ;
ikumoor awe anyina kọmalha ni rạmalha
kụ ugheel ạnmuny anyina kọmiin ni uḍien.
29Mem mọ ọpo phọ, Uwaloor phọ ạmi kasoorom ni
ghạlamo rꞌạrebene, lephiri rꞌạnmariir.
30“Mị kamitiom ni reḍeenaan ẹpe ạnyu ạke rꞌịsien ade phọ
ọphurom ạruru dị aḍio phọ ạḍiphe retu:
ịḅaal kezuan ni, ạnian rꞌạroko ạmughi.
31 #
Mat 24.29; Mạk 13.24, 25; Luk 21.25; Ogon 6.12, 13 Erumuḍio phọ kekitonu ni eḍighi ufiri,
kụ ụnwanyu phọ ạtogh ịdipho ịḅaal,
kụ egbi ọteeny aḍio phọ Ọmoogh-we phọ katu bọ,
ḍiboom mọ aḍio phọ ạḍiphe keḍighan bọ ni elegh.
32 #
Iiḍ 2.17-21
#
Rom 10.13
Kụ ọlo oomo ạbulo ọmagh ḍien Ọmoogh-we phọ kọmoogh ni pẹleeny.
Ịdipho Ọmoogh-we phọ mạḅem bọ,
‘Buniin dị odi Jeruselem kokpetenaan ni;
Bụphe mị ạsaḅar bọ kosugha ni.’”
Currently Selected:
Joel 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
