Joel 3
3
Ẹnaan keegboonaan ni ịiruen reelhe phọ
1Ọmoogh-we phọ ạḅem mọ,
“Mem mọ ọpo mị kaḍighi ni
ịdi aJuda rꞌaJeruselem kọḅile oḍum.
2Mị kaakpomoghi oomo areelhe
kụ ạpam bịdi atumom Eḍiiny Ọoruen.
Sịphe kụ ẹdi mị kasoph ọoruen ạngo bịdi
esi oomo ịpe bịdi moḍighi bọ we ạmi.
Bịdi mophorogh we Ịzirel ọwalalami ịnon areelhe
kụ ọbaayami Ịzirel, de phọ ạmi.
3Bịdi udi ẹdo olegheri
ọlo kạmoogh we phọ osiphi bọ.
Bịdi aal lephiri rꞌạnmanyaan ọrolomi dọl ạrebene
ịlo ọkpiom ạnmariir-erelhe rꞌamiim.
4 #
Azay 23.1-18; Izik 26.1—28.26; Ẹmos 1.9, 10; Zẹk 9.1-4; Mat 11.21, 22; Luk 10.13, 14 #
Azay 14.29-31; Jer 47.1-7; Izik 25.15-17; Ẹmos 1.6-8; Zẹf 2.4-7; Zẹk 9.5-7 “Nyina rẹwa ghan oḍighi ạmi ika, Taya, Saidon rꞌoomo areelhe aFilistia? Nyina rẹwa oḅulemian esi ịyaar ḍụghum? Pọ ịduon, mị kaagborion ni iḅulemian inyina! 5Nyina mẹsighe silva rꞌagol ạmi kụ ẹsighiogh eboom ẹelha phọ ạmi eḍighom ruutu iigbia phọ anyina. 6Nyina mẹsighiogh we aJuda rꞌaJeruselem ẹḍuanam esi dị ẹkelom ẹmha ạbidi kụ eboola we aGris. 7Nyịidipho mị kạsighe bịdi amiteghom riisi phọ nyina aal bọ bịdi. Mị kiḍighi inyina ịpe nyina meḍighi bọ bịdi. 8Mị kạḅogh ni nmụny rꞌạnmanyaan anyina ạngo we aJuda dị koboola bịdi we aSeba ẹekela ekpisi phọ. Mị Ọmoogh-we phọ mạḅem.
9“Igbeelom ọghaaph phọ ọphon eleenye reelhe phọ:
‘Ịnya ẹgham;
Ịmagh rephelegbe-ẹgham mọ anyina;
Iikpomoghi oomo awe ẹgham anyina kụ erelhe ẹghi!
10 #
Azay 2.4; Maik 4.3 Ịgurogh sinem ạrusua phọ anyina etene isiko
kụ sịleke ọsam mọ etene ịsoph.
Ghạlamo bụphe ịnyaam ụ́moogh bọ bịn kobe ni.
11Iigborion eru,
oomo anyina areelhe phọ ekoom bọ
kụ eekpomoghan sịphe Eḍiiny phọ.’”
Tom ạghiom, Ọmoogh-we, we ẹgham mọ ạna ozuom bịdi.
12“Mọmagh ni reelhe
mọ oru ọteeny Eḍiiny Ọoruen phọ.
Sịphe kụ ẹdi mị Ọmoogh-we phọ kạtol ude kụ asoph ọoruen
oomo areelhe phọ ekoom bọ.
13 #
Ogon 14.14-16;
Ogon 14.19, 20; 19.15 Bịdi ọmoogh ẹkaraph eḍighinom ịyaar;
iigbo bịdi elereghi ude ịdipho ịbiakpa
amem ibugha;
eghum bịdi ịdipho arughuuny avain ezeghe kụ emiim
tụtu amiim mamite ạapheleghian.”
14Ạsimuunir rꞌạsimuunir
odiighi Eḍiiny Ọoruen.
Ịsiphe kụ ẹdi aḍio Ọmoogh-we phọ
kẹnuun etu.
15Erumuḍio phọ rꞌụnwanyu phọ ekitonu ni ebil,
kụ ạraanaan phọ ị́muanan mun.
Ẹnaan kẹngo ni ooḅi ọghor weye phọ ọdi
16 #
Ẹmos 1.2
Ọmoogh-we phọ odi Eegum ạZayon kụ amoogha;
ẹḍogh ọdi edi sịphe Jeruselem kụ ẹḅa;
ade rꞌokuaḍio epiigha.
Kụ ọdi kaakpereghi ni we phọ ọdi.
17“Kụ nyina, awe Ịzirel, kegbi olegheri mọ mị kụ Ọmoogh-we Ẹnaan phọ anyina.
Mị atugh sịphe Zạyon, ẹeḅaraph iigbia phọ ạmi.
AJeruselem keḍighi ni ẹmha iigbia;
aruuruen kọ́kpar mun ópu nyọdi.
18“Mem mọ ọpo phọ, iizo ireeny avain kụ kekpereghiom rạaḅaraph phọ,
kụ kọmiin sịnam ạnyu ạtorobo eegbolom
kụ amuboom ạmuum kạtol oomo asikol aJuda.
Aḍikol kẹḍua Otu Ọmoogh-we phọ emite
kụ eeduom mụum Eḍiiny Akasia.
19“Ijipt keten ẹdala ịisaar
kụ Idom esi dị mephe,
ịdi eḍighi bọ bịdi uzuom de phọ aJuda
kụ ọze we phọ ạbidi dị ẹlo ọpioman ị́tol.
20-21Mị kaḅulemian esi ạbuphe ọze bọ;
Mị kạliom ni bụphe ọpioman bọ.
Kụ ọlo awe kotugh ghan Juda rꞌaJeruselem kꞌagee-pọ,
kụ mị Ọmoogh-we phọ kạtol sịphe ẹeḅaraph ạZayon.”
Currently Selected:
Joel 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
