Job 7
7
1Aghuḍum oye ạkigh oye dị ọkpaariom mọ ạghi ẹgham,
ạkigh ghuḍum dị odimom oḍighi ạḍighaagh dị ạkpar,
2ạkigh ẹbene dị ramoghi ghan esi uba oḍigh aani;
ạkigh oye oḍighi dị rakori ghan ruunmo ọdi.
3Ụnwanyu atum ụnwanyu mị ụ́moogh ịyaar ọrolom;
aḍughul etum ḍughul rịngo ghan ịmi ọto.
4Mem lọ mị ạmina ọnaani, amem mọ rediina ghan ni;
mị rakironaan ghan oomo phọ aḍughul phọ kamoghi mọ ẹnuun ẹḅaal.
5Ạsileegbem kụ imuza loor phọ ạmi;
ipholopol kụ imuza loor phọ ạmi;
aruuny kụ ramite ghan rọko ạmi.
6Asiḍughul-otu phọ ạmi reten ghan bịn dị oḍuom ologhi úlho,
eegborion oten epu ogbororiom oloom arukpe.
7Tụutughian ni, Ẹnaan, aghuḍum mọ ạmi aḍighi ookuugh bịn;
ọḅaal ologhi phọ ạmi masi ni eekuna.
8Nyina rịmiin ni ịmi nyịidipho, kụ ọlo nyịna ịmi kị́miin mun.
Eḍighi ịyaar lọ nyina ịwa ịmi, mị maten.
9-10Ịdipho ọotu rạagbenyenu ghan bọ kạḍua,
oye ramugh ghan bịn rátigheel ghan mun;
oomo awe lọ olegheri ghan nyọdi mowula nyọdi.
11Eeye, mị kátue aḅoorian.
Eghiḍim rꞌọghagh ologhi odi ni esi ạmi.
Mị kạkaaph ni.
12Eeghe kụ iḍighi kụ nyina rigonogha bọ ịmi?
Nyina regbiom ghan mọ mịna anonom ọphiiny ḍụghum?
13Mị ạmina ạwa ọnaani;
mị ạwa ophooghian esi eephina phọ ạmi.
14Kụ ọlo nyina — nyina rịdeghoghom ịmi rạmalha;
nyina rịngo ghan ịmi ịkaraph ạramalha,
15tụtu ẹnighe ghụn dị kọpur orum ạmi okiigh
kpạripe rꞌọrolom aloor ịminimiin phọ aḍien.
16Mị kátue mun. Mịpher ịmi ọrol phọ.
Ịwile ịmi. Aghuḍum ạmi ọ́moogh ịyaar oḍighinom.
17 #
Ạsuo 8.4; 144.3 Eeghia kụ iḍighi kụ oye ạman bọ ịduon ịyaar esi ạna?
Eeghia kụ iḍighi kụ nạ rapogh ghan bọ ịlo ọdi aḍighi?
18Nạ rapogh ghan nyọdi kakitonom tọrotoro ạḍiroor
kạdegh nyọdi aphogh tọrotoro amem.
19Nạ kápogh ẹnon ekpisi
tụtu ebia pịdi mị atue ạmin aani ịghor?
20Ịkaraph phọ ạmi eḍighi ni nyịna ịyaar ḍụghum, nạ okoriom otu ikoli?
Eeghe kụ iḍighi kụ nạ ụsighe bọ ịmi rạtuughaam dạph?
Mịna aḍighi ni igbogh ịiḅaghami ạngo nyịna ḍụghum?
21Nạ kátue ạsar ạbilenaan ịkaraph ạmi?
Nạ kátue ạbilenaan ịkaraph lọ mị aḍighi?
Kébia mị kaḍigh oḍi phọ ạmi
bịn mị maten mem dị nyina kịwa ịmi.
Currently Selected:
Job 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
