Job 6
6
Job
1-2Eḍighi ịyaar dị ọsighe ịiḅaghami phọ rꞌọto phọ ạmi kụ ọtooghi,
3kẹemor epu ịisaar ọgbal ọphiiny phọ,
kụ iḍighi kụ ịgbagara ikpo ọnhu phọ ạmi kíḍighi iikia esi anyina.
4Ẹnaan Oomo Ịikpo phọ mạsighe ịkpina ụraph ịmi,
kụ ika phọ ạbidi melheeny loor ạmi.
Ẹnaan mẹkoolomi rạraar aruugu usomoriom ịmi.
5Ẹnam adool kụ ẹraal rọogho bịn mẹgbaanyan ni nyọdi.
Ḅịle kẹn ạnam raḅoorian ghan ni mem lọ rạtaal tụgharaghar ạroogho.
6Kụ ọlo ạnhian kụ katue ale eḍien dị ị́dugh, boph ụ́logh?
Eeghe ạḍidugh kụ edi ghan sịphe ẹphalaḅaal phọ edi ghan bọ eghelhe ạkenegh?
7Mị ụ́moogh ẹephua olhe ẹdo eḍien phọ ẹpe
kụ tọrotoro ịyaar lọ mị ale retu ghan ozu.
8Eeghe kụ iḍighi kụ Ẹnaan ịmi ị́ngo bọ ịlo mị ạlom?
Eeghe kụ iḍighi kụ ọdi ịiḅereghi phọ ạmi ọ́phagharanaan bọ?
9Mụghumo ọdi kameera ni ughiigh ịmi,
10mụghumo mị ulegheri ni mọ ọdi kaḍighi ni, mị mupeleghu ni esi iboh.
Mị múpogh ịphen repin bọ loor phọ ạmi.
Mị alegheri ni mọ Ẹnaan phọ oye aruukuan.
Mị kọ̋gbagharan ghan ịlo ọdi ạto.
11Edi ẹghen ịnyaam dị mịna ạmoogh ọrol ghan nịiniin eye?
Eeghe kụ iḍighi kụ mị odi ghan bọ ni rapooghu mem dị mị ụ́moogh oḍuom ologhi.
12Mịna aḍighiigh ḍụghum? Aloor phọ ạmina enaba ḍụghum?
13Ịnyaam ịmi ílho mun ọphelom aloor ạmi;
esi ílho dị mị kạki kụ ạmoogh ọloghonaan ạḍighaagh.
14Mem ịiḅaghami dị ẹrol ịduon mị ạkpe ọmoogh igey ạrighiri —
mụghumo mị mạḅitonaan Ẹnaan Oomo Ịikpo mụghumo mị ụ́ḅitonaan.
15Kụ ọlo nyina phọ, ạrighiri phọ ạmi, nyina riikeleghi ghan ịmi ịdipho asikol ạmuum
dị rẹkaraghar ghan mem lọ ọlophia ụ́loph.
16Ibikpo meekpereghiom sikol phọ,
17kụ ọlo, ẹghologhol reru, bịdi mephe,
bịn ude asikol phọ mẹgharaghar.
18Aḍita awe erelhe rope ghan ni loor esi ọwa ạmuum;
bịdi royeela ghan ni bịn tụtu komuughu ẹpe ade ophugh phọ.
19Aḍita awe erelhe dị ọḍua ẹpe Siba rꞌạTema rọwa ghan ni,
20kụ ọlo oḍuom ologhi phọ ạbidi ramuneen ghan ọgbal asikol phọ.
21Nyina ẹkigh sikol phọ ịpe phọ esi ạmi,
nyina ẹmiin dọl phọ ạmi kụ eḍuragh eḅula ọman esi oghiilaan.
22Mịna ụlhom ḍịen ni inyina ịyaar,
ọbo ọbo ụḅeni ni inyina mọ ikol ẹmhu ạmi eti-ọman oye,
23ọbo ọbo ọphel ạmi ḍịghaagh ẹpomoghian?
24Ẹnighe ni-a; ịtughemi ịmi ịḅeni ịmi ọpioman phọ ạmi.
Mị kaḅoorian ịnaghanan inyina.
25Igey ikpo ọnhu rekiton ghan ni ologhi oye,
kụ ọlo ọghaaph phọ anyina ọ́moogh ịyaar oḍighinom.
26Oḍuom ologhi ạmi maphe. Nyina rẹetughian ghan mọ ọghaaph phọ ạmi aḍighi ookuugh bịn;
kụ eeghe kụ iḍighi kụ nyina rẹpagharanaan ghan bọ?
27Nyina kẹsighe bụnyigo ạnmuny dị oḍighi rẹbene bịn epeghom abili?
Nyina ketue ni ẹsighe ọkaraghi ẹmhu-ọyaghiri anyina bịn ẹwaam ikpoki?
28Ịkaraghi ephogh risigh ạmi. Mị kạ́gba ọkpe.
29Nyina mẹghi ni ịdi mẹkasian. Kẹ́ki mun ekeeny ịiruen.
Késoph mun ọoruen epume. Mị odi ni elhiom.
30Kụ ọlo nyina rẹetughian ghan mọ mị rakue ni —
nyina rẹetughian ghan mọ mị úlegheri igey rꞌịkaraph.
Currently Selected:
Job 6: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
